ލަންޑަން (އޮގަސްޓް 10) - މީގެ ދެ އަހަރު ކުރިން ޗެލްސީ އަށް ފަސް އަހަރުގެ ކޮންޓްރެކްޓެއްގައި ގަތް، ޖަރުމަނުގެ ފޯވާޑް ޓިމޯ ވާނާ، އޭނާ ކުރިން ކުޅުނު އާރްބީ ލައިޕްޒިގަށް އަލުން ބަދަލުވެއްޖެ އެވެ.
ޗެލްސީން 2020 ވަނަ އަހަރުގެ ޖޫން މަހު ވާނާގެ ސޮއި ހޯދީ ލައިޕްޒިގަށް 55 މިލިއަން ޑޮލަރުގެ ފީއެއް ދައްކާގޮތަށެވެ. ދެ އަހަރު ފަހުން ލައިޕްޒިގުން އަލުން ވާނާ ގެނައިިއިރު، ދެއްކި ޓްރާންސްފާ ފީއެއް ރަސްމީކޮށް އެއްވެސް ކްލަބަކުން ހާމަނުކުރެ އެވެ.
ރިޕޯޓްތައް ބުނާގޮތުން ލައިޕްޒިގުން ވަނީ ވާނާގެ ސޮއި ހޯދަން 30 މިލިއަން ޑޮލަރުގެ ފީއެއް ޗެލްސީ އަށް ދޭން ނިންމައިފަ އެވެ. ވާނާ، 26، ވަނީ ލައިޕްޒިގާ އެކު ހަތަރު އަހަރުގެ ކޮންޓްރެކްޓެއް ހަދައިފަ އެވެ.
ވާނާ ބުނީ އަލުން ލައިޕްޒިގަށް އާދެވުމަކީ ލިބިގެންދިޔަ ވަރަށް ބޮޑު ހިތްހަމަ ޖެހުމެއް ކަމަށާއި 2016-2020 އަށް ލައިޕްޒިގުގައި ދެއްކި ކުޅުމަށް ވުރެ ރަނގަޅު ކަންތައްތަކެއް މި ފަހަރު އެ ޓީމާ އެކު ހޯދަން ބޭނުންވާ ކަމަށެވެ.
"ލައިޕްޒިގަށް އެންމެ ގިނަ ގޯލު ޖަހައިދިން ކުޅުންތެރިޔާގެ ގޮތުގައި ހުރެ، އަހަރެން މި ޓީމު ދޫކޮށްލީ. އަލުން އެނބުރި އައިސް ވެސް އަހަރެން ބޭނުންވަނީ ފަސް އެނބުރި ބެލުމެއް ނެތި މަސައްކަތް ކުރަން،" ލައިޕްޒިގަށް މީގެ ކުރިން 159 މެޗުން 95 ގޯލު ޖެހި ވާނާ ބުންޏެވެ.
ޗެލްސީ އަށް ކުޅުނުއިރު ވާނާގެ ގޯލު ޖެހުމުގެ ރެކޯޑް ފެނުނީ ދަށްކޮށެވެ. ޗެލްސީ އަށް ކުޅެދިން 89 މެޗުން ޖެހުނީ 23 ގޯލެވެ. ލީގަށް އެކަނި ބަލާނަމަ 56 މެޗުން ޖެހުނީ 10 ގޯލެވެ.
ޗެލްސީގައި އަމިއްލަ ރެކޯޑްތައް ދަށް ނަމަވެސް ވާނާ ވަނީ އެ ޓީމާ އެކު ގިނަ ކާމިޔާބީތަކެއް ހޯދައިފަ އެވެ. އެ ގޮތުން ޗެމްޕިއަންސް ލީގާއި، ޔުއެފާ ސުޕަ ކަޕް އަދި ކްލަބް ވޯލްޑް ކަޕްގެ ޗެމްޕިއަންކަން ހޯދި އެވެ.
ވާނާ އަކީ މި ފަހަރުގެ ޓްރާންސްފާ މާކެޓްގައި ޗެލްސީ ދޫކޮށް ކުރީގެ ކްލަބާ ގުޅުނު ދެ ވަނަ ކުޅުންތެރިޔާ އެވެ. ވާނާގެ ކުރިން ރޮމެލޫ ލުކާކޫ ވަނީ ޗެލްސީ ދޫކޮށް ކުރިން ކުޅުނު އިންޓަ މިލާނަށް ލޯން އުސޫލުން ބަދަލުވެފަ އެވެ.
ޗެލްސީން މިދިޔަ އަހަރު ލުކާކޫގެ ސޮއިހޯދީ 98 މިލިއަން ޕައުންޑް (135 މިލިއަން ޑޮލަރު)ގެ ފީ އަކަށެވެ. އެއީ އެ ކްލަބުން އެއް ކުޅުންތެރިއަކަށް ހަރަދުކުރި އެންމެ ބޮޑު ފީ އެވެ. ކުރިއަށް އޮތް ސީޒަނަށް ލުކާކޫގެ ލޯން ފީގެ ގޮތުގައި އިންޓަ އިން ޗެލްސީ އަށް ފުރަތަމަ ދައްކާނީ 8.3 މިލިއަން ޑޮލަރެވެ. ލުކާކޫ ޓީމުގައި ހިމެނިގެން، އިންޓަ އިން އިޓާލިއަން ލީގު ނޫނީ އެހެން ބޮޑު މުބާރާތެއް ކާމިޔާބުކޮށްފިނަަމަ އިންޓަ އިން އިތުރު 4.2 މިލިއަން ޑޮލަރު ދައްކާނެ އެވެ.
