މެންޗެސްޓާ (އޮގަސްޓް 9) - މެންޗެސްޓާ ޔުނައިޓެޑުން ބޮލޯނިއާ އަށް ކުޅެމުން އަންނަ އޮސްޓްރިއާގެ ފޯވާޑް، މާކޯ އާނައޮޓޮވިޗާއި ޔުވެންޓަސްގެ ފްރާންސް މިޑްފީލްޑަރު އޭޑްރިއަން ރަބިއޯ ގަންނަން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ކުރިން ޕްރިމިއާ ލީގުގައި ސްޓޯކް ސިޓީ އާއި ވެސްޓް ހޭމް ޔުނައިޓެޑަށް ކުޅުނު އާނައޮޓޮވިޗް، 33، އަށް ޔުނައިޓެޑުން ކުރި ނުވަ މިލިއަން ޑޮލަރުގެ ބިޑަށް އާނައޮޓޮވިޗް މިހާރު ކުޅެމުން އަންނަ ބޮލޯނިއާ އިން ވަނީ ނޫނެކޭ ބުނެފަ އެވެ.
ބޮލޯނިއާ އިން އާނައޮޓޮވިޗް ވިއްކާލަން ކިޔާ އަގު އުޅެނީ 15 މިލިއަން ޑޮލަރާ ގާތުގަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުން ޔުނައިޓެޑަށް ބަދަލުވާން ބޭނުންވާތީ އާނައޮޓޮވިޗް އެކަން ރަސްމީކޮށް ބޮލޯނިއާ މެނޭޖްމަންޓަށް ވަރަށް އަވަހަށް އަންގާނެ އެވެ. އާނައޮޓޮވިޗް ބޭނުންވަނީ ކޮންމެ ގޮތެއް ހަދާފައި ވިޔަސް ޔުނައިޓެޑާ ކަހަލަ ބޮޑު ޓީމަކާ ގުޅެން ލިބުނު ފުރުސަތުގެ ބޭނުންހިފަން ކަމަށް އިނގިރޭސި ދި ޓެލެގްރާފް ނޫހުން ވަނީ ރިޕޯޓްކޮށްފަ އެވެ.
ޔުވެންޓަސްގެ ޕްރެކްޓިހެއްގެ ތެރެއިން ރަބިއޯ: އޭނާ މި ފަހަރުގެ ޓްރާންސްފާ މާކެޓްގައި ކްލަބް ބަދަލުކުރުމުގެ ފުރުސަތު ބޮޑު
ބާސެލޯނާގެ ފްރެންކީ ޑި ޔޯން ގަންނަން ފާއިތުވި ދެ މަހެއްހާ ދުވަހު ޔުނައިޓެޑުން ކުރި މަަސައްކަތުގައި އަލި މަގެއް ނުފެނެ އެވެ. އެކަން ދިގުލައިދާތީ އާއި މި ފަހަރުގެ އިނގިރޭސި ޕްރިމިއާ ލީގުގެ ފުރަތަމަ މެޗުގައި ޔުނައިޓެޑް އަމިއްލަ ދަނޑުގައި ބްރައިޓަން އަތުން ބަލިވުމުން ޔުނައިޓެޑްގެ ކޯޗު އެރިކް ޓެން ހާގް ވަނީ އާ މިޑްފީލްޑަރެއް ހޯދުން އަަވަސްކޮށްލަން އެ ކްލަބްގެ ސީނިއާ މެނޭޖްމަންޓަށް ހުށަހަޅައިފަ އެވެ.
އިޓަލީގެ ބައެއް ނޫސްތަކުން ރިޕޯޓްކުރާގޮތުގައި ޔުނައިޓެޑުން މިހާރު ވަނީ ޔުވެންޓަސްގެ ރަބިއޯ ގަންނަން އެ ކްލަބާ އެކު އަނގަބަހުން އެއްބަސްވުމަކަށް އަތުވެފަ އެވެ. އެއީ 15-18 މިލިއަން ޑޮލަރުގެ ޑީލެއްގަ އެވެ.
ޕީއެސްޖީ ދޫކޮށް ޔުވެންޓަސްއާ 2019 ވަނަ އަހަރު ހިލޭ ޓްރާންސްފާއެއްގައި ގުޅުނު ރަބިއޯ މި ވަގުތު ޔުވެންޓަސްގެ ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. އެހެންވެ، ޔުވެންޓަސް އިން ބޭނުންވަނީ މި ފަހަރުގެ ޓްރާންސްފާ މާކެޓްގެ ތެރޭގައި ރަބިއޯ އަށް ރަނގަޅު ފީއެއް ލިބޭނަމަ ދޫކޮށްލާށެވެ.
ފްރާންސްގެ މީޑިއާ ރިޕޯޓްތައް ބުނާގޮތުން ރަބިއޯގެ އޭޖެންޓް، އޭނާގެ މަންމަ ވެރޯނިކް ވަނީ ޔުނައިޓެޑްގެ އޮފިޝަލުންނާ ބައްދަލުވުންތަކެއް ބާއްވައި، ރަބިއޯގެ ޓްރާންސް ކަންކަމާ މެދު އެއްބަސްވުމަކަށް އަތުވެފަ އެވެ.
