ނޫސްވެރިޔާ އަހްމަދު ރިލްވާން ގެއްލުވާލުމުގެ ޖަރީމާއަށް މިއަދު އަށް އަހަރު ފުރިފައިވާއިރު އެކަމުގެ ފަހަތުގައި ތިބި މީހުން މިނިވަންކަމާ އެކު ތިބުމުގެ ކަންބޮޑުވުން ރާއްޖޭގައި އިންސާނީ ހައްގުތަކާއި ޑިމޮކްރަސީ ކުރިއެރުވުމަށް ވަކާލާތުކުރާ އެސޯސިއޭޝަން ފޯ ޑިމޮކްރަސީ އިން ދަ މޯލްޑިވްސް އިން ފާޅުކޮށްފި އެވެ.
މިނިވަން ނިއުސްގައި މަސައްކަތް ކުރި ނޫސްވެރިޔާ ރިލްވާން ގެއްލުވާލާފައި ވަނީ އޯގަސްޓް 7، 2014 ގަ އެވެ. އެ ޖަރީމާއަށް މިއަދު އަށް އަހަރު ފުރުމާ ގުޅިގެން ނެރުނު ނޫސްބަޔާނެއްގައި އެ ޖަމިއްޔާއިން ބުނީ "ރިލްވާން އަށް ހަމަލާދީފައި ވަނީ އޭނާއަކީ އިސްލާމްދީނާ ދެކޮޅު މީހެއްކަމަށް ތުހުމަތުކުރާ ބައެއް" ކަމަށެވެ.
އެ މައްސަލައާ ގުޅިގެން މިދިޔަ ޖޫން މަހު ހައްޔަރު ކުރި އިސްމާއިލް އަބްދުއްރަހީމް އާދަމް (އިސޫ) އާއި އަހުމަދު އިސްމާއިލް (ބުރު އަހަނދު) އަދި އަހުމަދު މުއާޒް (ގަޓް މުއާ) ގެ މައްޗަށް ވަނީ ދައުވާ ވެސް އުފުލާފަ އެވެ. އެކަމަށް އެ އެސޯސިއޭޝަނުން މަރުހަބާ ކިޔާފައިވެ އެވެ.
"އެހެންނަމަވެސް ހަގީގަތަކީ، އެކަން ހިންގުމުގެ ފުރަގަހުގައި ތިބި މީހުން އަދިވެސް މިނިވަންކަމާ އެކު ތިބިކަމެވެ. އަދި، އެއީ ރިލްވާންއެކޭ އެއްފަދައިން އިތުރު އެތައް ބަޔަކަށް ބިރުދައްކައި، އިންޒާރުދީފައިވާ ބައެކެވެ،" މިކަމާ ގުޅިގެން ނެރުނު ބަޔާނުގައި ބުނެފައިވެ އެވެ.
ރައީސް ސޯލިހު ވެރިކަމަށް ވަޑައިގެން ފުރަތަމަ ދުވަހު، ގެއްލުވާލާފައިވާ މީހުންނަށް ގޮތް ނޭނގޭ މަރުތައް ތަހުގީގު ކުރުމަށް ރިޔާސީ ކޮމިޝަނެއް އުފެއްދެވި އެވެ. އަދި ރިލްވާން އަދި ޔާމީން ރަޝީދުގެ މައްސަލަ އެންމެ މުހިންމު ކަމެއްގެ ގޮތުގައި ތަހުގީގު ކުރަން ފެށި އެވެ.
"ރިލްވާން ގަދަކަމުން ގެއްލުވައިލި މައްސަލަ ތަހުގީގުކުރުމަށް ހުރަސްއަޅައި، މައްސަލައާ ގުޅުންހުރި ކަމަށް ބެލެވޭ މީހުން ދިވެހިރާއްޖެއިން ފިލައިގެން ދިއުމަށް އެހީތެރިވެދީ އަނެއްބަޔަކު ރައްކާތެރިކޮށްދިން ރައީސް އަބްދުﷲ ޔާމީން އަބްދުލްގައްޔޫމުގެ ވެރިކަމުގައި ރިލްވާންގެ އާއިލާއިން ހަތަރު އަހަރުވަންދެން އަނިޔާ ތަހައްމަލުކުރި އެވެ. އިތުރު ހަތަރު އަހަރު ދުވަހު އާއިލާއިން އިންތިޒާރުކުރީ ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންނެވި އިންސާފަށެވެ،" މިއަދު ނެރުނު ބަޔާނުގައި ބުނެފައިވެ އެވެ.
މި ޖަރީމާގެ އަސްލު ހޯދައި ދިނުމަށް ރައީސް ސޯލިހު ވެވަޑައިގެންނެވި ވައުދަކީ އެމަނިކުފާނަށް އެތައް ބަޔަކު ވޯޓު ދިން ސަބަބެއް ކަމަށް ވެސް ބަޔާންކޮށްފައިވެ އެވެ.
"ރިލްވާން ގަދަކަމުން ގެއްލުވައިލުމުގެ ފުރަގަހުގައި ތިބި މީހުން އިންސާފުގެ ކުރިމައްޗަށް ނުގެނެވޭހާ ހިނދަކު ރައީސް ސޯލިހުގެ ރިޔާސީ ވައުދުތައް ފުއްދަވައިދެއްވި ކަމަށް ގަބޫލުނުކުރެވޭނެ ކަން އެމަނިކުފާނަށް އަޅުގަނޑުމެން ހަނދުމަކޮށް އަރުވަމެވެ،" އަދިވެސް އެ މައްސަލައިގައި މާ ބޮޑެތި ކުރިއެރުންތަކެއް ހޯދިފައިނުވާ ކަންބޮޑުވުން އޮތްކަން ހާމަކުރަމުން އެ ބަޔާނުގައި ބުނެފައިވެ އެވެ.
ރިލްވާންގެ މައްސަލައިގައި މަރު ކޮމިޝަނުގެ ތަފްސީލު ރިޕޯޓެއް ވެސް ހާމަ ކުރި އެވެ. ރާއްޖޭގައި އުޅޭ އަލްގައިދާ ގެ ގޮތްޕަކަށް އިނގިލި ދިއްކުރުމަށްފަހު، ރިޕޯޓުގައި ބުނެފައި ވަނީ ރިލްވާން ޝަހީދުކޮށްލާފައިވާ ކަމަށެވެ.
ރިލްވާން މަރާލީ އޭނާއަކީ މުރުތައްދެއް ކަމަށް ކަނޑައަޅައި އެ ޖަމާއަތް ތެރޭގައި ހުކުމް ކުރުމަށްފަހު ދީނުގެ ނަމުގައި ކަމަށް ވެސް މަރު ކޮމިޝަނުން ބުންޏެވެ. އަދި ރިލްވާން މަރާލީ ޝަހާދަތުގެ ދެކަލިމަ އޭނާ ކިޔައި ކިޔައި އޮއްވާ ކަމަށް ވެސް ކޮމިޝަނުން ހާމަ ކުރި އެވެ.
