މާލޭގެ ގެއެއްގެ ތެރޭގައި ޒަހަމް ތަކަކާއެކު މަރާލާފައި އޮތް އަންހެނަކު ފެނިގެން އެ ސަރަހައްދުގައި ފުލުހުން ހަރަކާތްތެރިވާން ފަށައިފި އެވެ.
އަންހެންމީހާ މަރާލާފައި އޮއްވާ ފެނިފައިވަނީ ހ. ޝީރީންވިލާގެ 9 ވަނަ ފަންގިފިލާއިންނެވެ. އެނގިފައިވާ ގޮތުގައި، އެގޭގައި މަރާލާފައި އޮއްވާ ފެނުނީ ޏ. ފުވައްމުލަކަށް އުފަން ޝިއާއު މުހައްމަދު ސައީދު އެވެ.
އޭނާގެ ހަށިގަނޑު ދުށް ބައެއް މީހުން ބުނި ގޮތުގައި، އޭނާ މަރާލުމަށްފަހު ވަނީ އަތާއި ފައިވެސް ބުރިކޮށްލައިފަ އެވެ. އޭނާގެ އަތް ބުރިކޮށްލާފައިވަނީ އުޅަނބޮއްޓާ ހަމައިންނެވެ.
އަތާއި ފައިގެ އިތުރުން އަންހެން މީހާގެ ބޯވެސް ބުރިކޮށްލަން މަސައްކަތް ކޮށްފައިވާ ކަމަށް ވެސް މައުލޫމާތު ލިބިފައިވެ އެވެ. ނަމަވެސް، ބޯ އެއްކޮށް ބުރިވެފައިނުވާ ކަމަށްވެ އެވެ.
އެކަމަކު މީގެން އެއްވެސް މައުލޫމާތެއް ރަސްމީ އެއްވެސް ފަރާތަކުން އަދި ޔަގީންކޮށްދީފައެއް ނުވެ އެވެ.
ނަމަވެސް، ފުލުހުން އެ މީހާގެ ހަށިގަނޑު ނެރުނު އިރު ދެ ބޮޑީ ބޭގް ވެސް ނެރުނެވެ. އެހެންވެ، ގުނަވަންތައް ބުރިކޮށްލާފައި ހުރި ކަމުގެ ވާހަކަތަކަށް ބާރުލިބެ އެވެ.
ޝިއާއު މަރުގެ ތުހުމަތު ކުޅަދާނަ ސްކޭޓަރު ސާހިލަށް!
މި ހާދިސާގައި ފުލުހުން މިހާތަނަށް ހާމަ ކޮށްފައިވާ ހަމައެކަނި މައުލޫމާތަކީ އެ ހާދިސާ ހިނގައިގެން އުޅޭ ކަމާއި އެކަމާ ގުޅިގެން މީހަކު ހައްޔަރުކޮށްފައިވާ ކަމެވެ.
ނަމަވެސް "އަދަދު"އިން ހޯދި މައުލޫމާތު އެނގުނީ މި މައްސަލާގައި ހައްޔަރުކޮށްފައި ވަނީ ސްކޭޓް ބޯޑިން މުބާރާތް، ޖުގާޑް ސްކޭޓްބޯޑިން ގޭމް އޮފް ސްލޭޓް ކޮންޓެސްޓުން ފަހުރުވެރި ވަނަތަކެއް ހޯދާފައިވާ އަލީ ޝާހިލް، 23 ކަމެވެ.
ކަލާފާނު ސްކޫލުން ތައުލީމު ހާސިލްކުރި ޝާހިލަށް އެ މުބާރާތުން އެއް ވަނަ އާއި އެކްސްްޕްރެޝަން ސެޝަންގެ ތިން ވަނަ ވެސް ވަނީ ލިބިފަ އެވެ.
މި މަރާ ގުޅިގެން ފުލުހުން އިތުރު މައުލޫމާތެއް ދީފައިނުވި ނަމަވެސް، ހ. ޝީރީންވިލާގެ ކައިރީ އެ ވަގުތު ތިބި މީހުން ބުނި ގޮތުގައި، ޝާހިލް ހައްޔަރުކޮށްފައި ވަނީ އެ ސަރަހައްދުންނެވެ. އަދި ފުލުހުން އޭނާ އެ ގޭގެ އެ ފްލޯ އަށް ގެންގޮސް ވަރަށް ގިނަ އިރު އެތާނގައި ވެސް ގެންގުޅުނު ކަމަށްވެ އެވެ.
ޝިއާއުގެ ހަށިގަނޑު ތަހުގީގަށް ގަލޮޅު މޯޗަރީ އަށް ލާފައިވާއިރު މިއީ މި އަހަރު މާލޭގައި ހިންގި އެންމެ ރަހުމުކުޑަ އެއް މަރެވެ.
