ރޭ މާލޭގައި ސައިކަލަކާއި ޕިކަޕެއް ޖެހި ހިނގި އެކްސިޑެންޓުގައި ސައިކަލް ދުއްވަން އިން މީހާ ޕިކަޕުގެ ޑްރައިވަރަށް ހަމަލާ ދިނުމަށް ފަހު ފިލާފައިވާތީ އެ މީހާ ހޯދުމުގެ މަސައްކަތް ފުލުހުން ފަށައިފި އެވެ.
އެ އެކްސިޑެންޓް ހިނގާފައި ވަނީ މަޖީދީ މަގާއި އަލިކިލޭފާނު މަގު ގުޅޭ ހިސާބުން ރޭ 7:28 ހާއިރު އެވެ.
ފުލުހުންގެ އޮފިޝަލަކު "އަދަދު"އަށް ވިދާޅުވީ އެ އެކްސިޑެންޓުގައި މަރާމާރީ ހިންގި ކަމަށް ބުނާ މައްސަލައެއް ހުށަހަޅާފައިވާ ކަމަށެވެ. އަދި ސައިކަލު ދުއްވަން އިން މީހާ ހޯދުމުގެ މަސައްކަތް ކުރަމުންދާ ކަމަށް ވެސް އޮފިޝަލު ވިދާޅުވި އެވެ.
"މާރާމާރީ ހިންގުމަށްފަހު ސައިކަލު ދުއްވަން އިން މީހާ ވަނީ ފިލާފައި. އަދި އެ މީހާ ހޯދުމުގެ މަސައްކަތް ދަނީ ކުރަމުން،" އޮފިޝަލް ވިދާޅުވި އެވެ.
އޭނާ ވިދާޅުވީ ޕިކަޕު ދުއްވަން އިނީ 34 އަހަރުގެ ބިދޭސީއެއް ކަމަށާއި އޭނާއަށް ފަރުވާ ދިނުމަށް ހޮސްޕިޓަލަށް ގެންގޮސްފައިވާ ކަމަށެވެ.
ޕިކަޕުގެ ޑްރައިވަރަށް ލިބުނު އަނިޔާތަކުގެ ތަފްސީލެއް ފުލުހުން ހާމައެއް ނުކުރެ އެވެ. ނަމަވެސް ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި އަނިޔާ ވެފައި ވަނީ އޭނަގެ ނޭފަތަށެވެ.
