ރޯމް (އޯގަސްޓް 2) - ސްޕެއިންގެ ގައުމީ ޓީމުގެ ކުރީގެ މިޑްފީލްޑަރު ސެސްކް ފަބްރެގަސް އިޓަލީގެ ދެ ވަނަ ޑިވިޝަންގެ ކްލަބެއް ކަމަށްވާ ކޯމޯ އަށް ސޮއިކޮށްފި އެވެ.
ސްޕެއިންގެ ގައުމީ ޓީމާ އެކު 2010 ވަނަ އަހަރު ވޯލްޑް ކަޕް ކާމިޔާބުކުރި ފަބްރެގަސް، ކޯމޯ އަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ.
ކުރިން އާސެނަލް އާއި ބާސެލޯނާ އަދި ޗެލްސީ އަށް ކުޅުނު ފަބްރެގަސް ,36, އެންމެ ފަހުން ކުޅުނީ ފްރާންސްގެ މޮނާކޯ އަށެވެ. އެކަމަކު، މިދިޔަ ސީޒަންގައި އިންޖަރީގެ ގިނަ މައްސަލަތަކެއް ކުރިމަތިވެ، މާ ގިނަ މެޗެއް ނުކުޅެވުނެވެ. މޮނާކޯގެ ސީނިއާ ޓީމަށް މިދިޔަ އަހަރުގެ ސެޕްޓެމްބަރު މަހުގެ ފަހުން ފަބްރެގަސް ނުކުޅެ އެވެ.
އިޓާލީގެ ސީރިއާ ބީގައި އޮތް ކޯމޯ އަކީ 1907 ވަނަ އަހަރު އުފެދުނު ކްލަބެކެވެ. މިދިޔަ ސީޒަން އެ ޓީމު ނިންމާލީ ސީރިއާ ބީގެ 13 ވަނައިގަ އެވެ.
"މިއީ ފައިސާ ބޭނުންވެެގެން އަހަރެން ނިންމި ނިންމުމެއް ނޫން،" ކޯމޯއާ ގުޅުމަށް ފަހު ނޫސްވެރިންނާ ވާހަކަދައްކަމުން ފަބްރެގަސް ބުންޏެވެ. "އަހަރެން ބެލީ އަހަރެން ޝައުގުވެރިވާ ކަހަލަ ޕްރޮޖެކްޓެއް ހޯދަން،"
ފަބްރެގަސް ބުނީ ދެ އަހަރު ދުވަހުގެ ކޮންޓުރެކްޓެއް ކޯމޯއާ އެކު ހެދި ނަމަވެސް، ދިގު މުއްދަތަށް އެ ކްލަބާއެކު ކުރިއަށް ދިއުމަށް ހިޔާލުކުރާ ކަމަށެވެ. އަދި އެ ކްލަބުގެ ހިއްސާދާރުންނަށް ވުމަށް ވެސް ޝައުގުވެރިވާ ކަމަށެވެ.
ބާސެލޯނާގެ ޔޫތު ޓީމުގައި ހުއްޓައި، ފަބްރެގަސް ޒުވާން އުމުރުގައި 2003 ވަނަ އަހަރު އާސެނަލަށް ގެނައީ އޭރު އެ ޓީމުގެ ކޯޗަކަށް ހުރި އާސެން ވެންގާ އެވެ. ވެންގާގެ ބެލުމުގެ ދަށުން ޑިވެލޮޕްވެ، ތަފާތު މޮޅަށް ކުޅުނު ފަބްރެގަސް ވަނީ އާސެނަލް ކެޕްޓަން ބޭންޑް އަޅައިގެން ވެސް ކުޅެފަ އެވެ.
އާސެނަލް ދޫކޮށް ފަބްރެގަސް 2011 ވަނަ އަހަރު ބާސެލޯނާ އަށް ބަދަލުވީ 35 މިލިއަން ޑޮލަރުގެ ފީ އަކަށެވެ. އެކަމަކު، ތިން ސީޒަނަށް ފަހު ފަބްރެގަސް އަށް ޖެހުނީ ބާސެލޯނާ ދޫކޮށްލާށެވެ. އޭނާ އަލުން 2014 ވަނަ އަހަރު ޗެލްސީ އަށް ބަދަލުވީ 40 މިލިއަން ޑޮލަރުގެ އަގަކަށެވެ. އެ ފަހަރު ޗެލްސީން ފަބްރެގަސް ގަތީ، އާސެނަލް އަލުން ފަބްރެގަސް ގަންނަން ބޭނުމެއް ނުވުމުންނެވެ.
ޗެލްސީ އަށް 2018 ވަނަ އަހަރުގެ ނިޔަލަށް ކުޅުނު ފަބްރެގަސް ދެން ބަދަލުވީ އެންމެ ފަހުން ކުޅުނު މޮނާކޯ އަށެވެ. އެ ގޮތުން 2019 ވަނަ އަހަރުގެ ޖެނުއަރީ މަހުގެ ތެރޭގައި މޮނާކޯ އިން ފަބްރެގަސްގެ ސޮއި ހޯދީ ފުރަތަމަ ލޯން ޑީލެއްގަ އެވެ. އެކަމަކު، މޮނާކޯ އިން ފަހުން އެ އެއްބަސްވުން ދާއިމީ ކުރީ މި މަހުގެ ނިޔަލަށެވެ.
އާސެނަލާ އެކު ފަބްރެގަސް ވަނީ އެފްއޭ ކަޕް ޗެމްޕިއަންކަން ހޯދައިފަ އެވެ. ބާސެލޯނާއާ އެކު ސްޕެނިޝް ލީގާއި ކޮޕަ ޑެލް ރޭ (ސްޕެނިޝް ކަޕް)، ސްޕެނިޝް ސުޕަ ކަޕް، ޔުއެފާ ސުޕަ ކަޕް އަދި ކްލަބް ވޯލްޑް ކަޕް ޗެމްޕިއަންކަން ހޯދި އެވެ. ޗެލްސީއާ އެކު ޕްރިމިއާ ލީގު ދެ ފަހަރާއި އެފްއޭ ކަޕާއި ލީގު ކަޕް އަދި ޔޫރޮޕާ ލީގު ހޯދި އެވެ.
