ބަދުއަހުލާގީ އަމަލުތައް ހިންގާ މަންޒަރުތައް ފެންނަ ވީޑިއޯތަކުގެ މައްސަލައިގައިި ހައްޔަރުކޮށްފައިވާ ގާނޫނީ ވަކީލް ނާޒިމް އަބްދުއްސައްތާރުގެ ބަންދަށް ހަތް ދުވަހުގެ މުއްދަތެއް ކޯޓުން ޖަހައިފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު ނާޒިމް ސައްތާރު އިއްޔެ ހައްޔަރު ކުރީ ވެލިގަނޑު ރިސޯޓްގައި ހުއްޓަ އެވެ.
އެއް ޖިންސުން ޖިންސީ ގުޅުން ހިންގި ކަމުގެ ތުހުމަތުގައި ހައްޔަރުކުރި ނާޒިމްގެ ބަންދާ މެދު ގޮތެއް ނިންމަން މިއަދު ހާޒިރު ކުރީ އއ. ރަސްދޫ މެޖިސްޓްރޭޓް ކޯޓަށެވެ. ނާޒިމް ބަންދުގައި ބަހައްޓައިގެން ފުލުހުންގެ ތަހުގީގު ގެންދިއުމުގެ ބޭނުމަށް ހަތް ދުވަހުގެ މުއްދަތެއް ޖެހި އެވެ.
ނާޒިމް ހައްޔަރުކޮށްފައިވަނީ ސިޔާސީ މަގުސަދެއްގައި ކަމަށް ނަޝީދު ވަނީ ވިދާޅުވެފަ އެވެ. އެހެންވިޔަސް ފުލުހުން ބުނާ ގޮތުގައި ތަހުގީގީ އިޖުރާއަތްތައް ހިންގަމުން ދަނީ މިހާތަނަށް ފޮރެންސިކް ތަހްލީލުތަކުން ކަށަވަރުކުރެވިފައިވާ ވީޑިއޯ އެވިޑެންސްތަކުގައި ހިމެނޭ މީހުންގެ މައްޗަށެވެ.
މީގެ ތެރޭގައި ތަހުގީގަށް މީހުން ހައްޔަރުކުރުމާއި މިފަދަ މައްސަލަތަކުގައި އެކަށީގެންވާ މީންވަރަށް ހެއްކާއި ގަރީނާ ހޯދިފައިވާ ދައުލަތުގެ އެކި އިދާރާތަކުގައި މަސައްކަތްކުރާ ފަރާތްތައް ނިސްބަތްވާ އޮފީސްތަަކަށް އެމީހުންގެ މައްސަލަތައް ތަހުގީގު ކުރަމުންދާކަން އަންގަމުންދާ ކަމަށް ފުލުހުންގެ އޮފިޝަލް ވިދާޅުވި އެވެ.
ނާޒިމްގެ އިތުރުން, ފުލުހުންގެ ޑްރަގް އެންފޯސްމަންޓް ޑިޕާޓްމަންޓުގައި މަސައްކަތް ކުރާ އަބްދުއްރަހްމާން ރަފީއު އަދި ކުރީގެ މަޖިލިސް މެންބަރު މުހައްމަދު ނަޝީދު (ކާނަލް) ވެސް އެއް ޖިންސުން ގުޅުން ހިންގި ކަމުގެ ތުހުމަތުގައި އިއްޔެ ވަނީ ހައްޔަރުކޮށްފަ އެވެ.
ކާނަލް ނަޝީދުއާއި ފުލުސް އޮފިސަރުގެ ބަންދާ މެދު ގޮތެއް ނިންމަން މިއަދު ކްރިމިނަލް ކޯޓަ ގެންދިޔަ އެވެ. އެ މީހުންގެ ބަންދާ މެދު ގޮތެއް ކަނޑައަޅަން ބާއްވާ ޝަރީއަތުގެ މަޖިލީސް ކްރިމިނަލް ކޯޓުގައި މި ވަގުތު ކުރިއަށް އެބަ ދެ އެވެ.
މި ތިން މީހުންނަކީ ވެސް ސޯޝަލް މީޑިއާއަށް ލީކުކޮށްފައިވާ ވީޑިއޯތަކުން ފެންނަ ކަމަށް ބެލެވޭ މީހުންގެ ތެރޭގައި ހިމެނޭ ތިން މީހުނެވެ. މި މީހުންނާއެކު ކޮންމެ ވީޑިއޯއަކުން ވެސް ފެންނަ ކަމަށް ބުނަނީ ބަންގްލަދޭޝްގެ ރައްޔިތެއް ކަމަށް އަލަމްގީރް އެވެ.
އަލަމްގީރް ވެސް ހައްޔަރުކޮށް ބަންދުގައި ބަހައްޓައިގެން ފުލުހުން ގެންދަނީ ތަހުގީގު ކުރިއަށް ގެންދަމުންނެވެ. މި މަހުގެ 18 ވަނަ ދުވަހު ކްރިމިނަލް ކޯޓުން ވަނީ އަލަމްގީރްގެ ބަންދަށް 15 ދުވަހުގެ މުއްދަތެއް ޖަހައިފަ އެވެ.
