ބަދުއަހުލާގީ އަމަލުތައް ހިންގާ މަންޒަރުތައް ފެންނަ ވީޑިއޯތަކުގެ މައްސަލައިގައިި ހައްޔަރުކޮށްފައިވާ ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު ނަޝީދު (ކާނަލް) އާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓުގައި މަސައްކަތް ކުރާ އަބްދުއްރަހްމާން ރަފީއުގެ ބަންދަށް މުއްދަތު ޖަހައިފި އެވެ.
ކާނަލް ނަޝީދު އާއި އަބްދުއްރަހްމާން ރަފީއު ބަންދުގައި ބަހައްޓައިގެން ފުލުހުންގެ ތަހުގީގު ކުރިއަށް ގެންދިއުމަށް ޓަކައި މިއަދުގެ ވަގުތެއްގައި ކްރިމިނަލް ކޯޓަށް ވަނީ ހާޒިރުކޮށްފަ އެވެ. އަދި ކޯޓުން ވަނީ ދެ މީހުންގެ ބަންދަށް 15 ދުވަހުގެ މުއްދަތެއް ޖަހައިފަ އެވެ.
ބަންގުލަދޭޝްގެ ރައްޔިތެއް ކަމުގައިވާ އެމްޑީ އަލަމްގީރްއާ އެކު އެއް ޖިންސުން ޖިންސީ ގުޅުން ހިންގި ކަމަށް ތުހުމަތު ކުރެވޭ މީހުންގެ ތެރެއިން މިހާތަނަށް ތަހުގީގަށް އެކަށީގެންވާ ހެއްކާއި ގަރީނާ ހޯދިފައިވާ މީހުން ކޯޓު އަމުރެއްގެ ދަށުން ހައްޔަރުކުރުމުގެ މަސައްކަތް ފުލުހުން ފަށާފައިވާ ކަމަށް އިއްޔެ ވަނީ ބުނެފަ އެވެ.
އެ ގޮތުން ސޯޝަލް މީޑިއާއަށް ލީކުކޮށްފައިވާ އެކި ވީޑިއޯތަކުން ފެންނަ ކަމަށް ބެލެވޭ ތިން މީހަކު މިހާތަނަށް ހައްޔަރުކޮށްފައިވާ ކަން އެނގެ އެވެ.
އެއީ ކާނަލް ނަޝީދުއާއި އަބްދުއްރަހްމާން ރަފީއުުގެ އިތުރަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު އަދި ގާނޫނީ ވަކީލު ނާޒިމް ސައްތާރެވެ.
ނާޒިމްގެ ބަންދަށް ވެސް ކޯޓުން ވަނީ ހަތް ދުވަހުގެ މުއްދަތެއް ޖަހައިފަ އެވެ. އޭނާގެ ބަންދާ މެދު ގޮތެއް ނިންމީ އއ. ރަސްދޫ މެޖިސްޓްރޭޓް ކޯޓުންނެވެ. އެނާ ހައްޔަރު ކުރީ އެ ރަށް ކައިރީ ރިސޯޓަކުންނެވެ.
އަބްދުއްރަހްމާން ރަފީއު ހައްޔަރުކޮށްފައިވަނީ ފުލުހުންގެ ވަޒީފާއިން ސަސްޕެންޑުކޮށް އޭނާގެ ޖިނާއީ އަދި ޑިސިޕްލިނަރީ މައްސަލަ ވެސް ބަލަމުން ދަނިކޮށެވެ. އަދި ކާނަލް ނަޝީދުއާއި ނާޒިމް ސައްތާރުގެ ޕާސްޕޯޓް ވެސް ހިފަހައްޓާފައި ވަނިކޮށެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި މި މައްސަލައިގައި މީހުން ހައްޔަރު ކުރުން ލަސްވީ ވީޑީއޯ އާއި ފޮޓޯތަކުގެ ސައްހަކަށް ކަށަވަރުކޮށް އެފަދަ އެވިޑެންސްތަކުގައި ހިމެނޭ މީހުންގެ އައިޑެންޓީޓީ ފޮރެސިކް ތަޙްލީލުން ކަށަވަރުކުރުމަށް ވަގުތު ނެގުމުގެ ސަބަބުންނެވެ.
އަދި، ބައެއް ފަރާތްތަކުން އެކި މަގްސަދުތަކުގައި ސައްހަ ނޫން ފޮޓޯ ހަދައި އާންމުކުރުމާއި މިފަދަ ވިޑީއޯތަކުގައި ބައެއް ފަރާތްތައް ހިމެނޭކަމަށް ގަސްތުގައި ދޮގު ހަބަރު ފަތުރާފައިވާ ކަން ވެސް ފާހަގަކޮށްފައިވެ އެވެ.
މި މައްސަލައިގައި ފުލުހުންގެ މަސައްކަތަށް ނުފޫޒު ފޮރުވައި ވަކި ބައެއްގެ މައްސަލަތައް ނުބަލައި ނުވަތަ މަޑު ޖައްސާލުމަށް ފުލުހުންނަށް އަންގަމުންދާ ވާހަކަ ވެސް ފުލުހުން ވަނީ ދޮގުކޮށްފަ އެވެ.
