މާލޭގެ ގެއެއްގެ ތެރެއަށް ގްރޫޕް ހަދައިގެން ވަދެ ތިބި ބަޔަކު މާރާމާރީ ހިންގައި ތިން މީހަކު ޒަހަމްކޮށްލައިފި އެވެ.
ފުލުހުން ބުނި ގޮތުގައި ރޭ 10:45 ހާއިރު ހިނގި އެ މާރާމާރީގައި ޒަހަމްވެ ހޮސްޕިޓަލަށް ގެންގޮސް ފަރުވާ ދީފައިވަނީ 23 އަހަރުގެ ފިރިހެނަކާއި 35 އަހަރުގެ ފިރިހެނަކާއި 36 އަހަރުގެ ފިރިހެނަކަށް ކަމަށެވެ.
ޒަހަމްވި މި މީހުންނަށް ލިބުނު އަނިޔާގެ ތަފްސީލެއް ފުލުހުން ނުދެ އެވެ. އެކަމަކު މި ނޫހަށް އެނގިފައިވާ ގޮތުގައި މާރާމާރީ ހިންގާފައި ވަނީ މާފަންނުގެ އައިޓަމްސް ފިހާރަ ކައިރީގަ އެވެ.
އެއީ މާލޭގައި ހަރަކާތްތެރިވާ ނުރައްކާތެރި ގޭންގެއް ހަރަކާތްތެރިވާ ހިސާބެކެވެ. މީގެ ކުރިން އެ ހިސާބުގައި ވަޅި ޖަހައި 14 އަހަރުގެ ފިރިހެން ކުއްޖަކު ވަނީ މަރާލައިފަ އެވެ.
ރޭ މާރާމާރީ ހިންގި މައްސަލާގައި މިހާތަނަށް އެއްވެސް މީހަކު ހައްޔަރު ކޮށްފައި ނުވާ ކަމަށް ފުލުހުން ބުންޏެވެ. އަދި އެ މައްސަލަ ފުލުހުން އިތުރަށް ތަހުގީގު ކުރަމުންދާ ކަމަށް ފުލުހުން ބުންޏެވެ.
