ޖަޕާނުގެ ވެރިރަށް ޓޯކިޔޯގައި 2008 ވަނަ އަހަރު ވަޅިން ހަމަލާ ދީ ހަތް މީހުން މަރާލުމުގެ ފަހަތުގައި ހުރި އުމުރުން 39 އަހަރުގެ ގާތިލް ދަންޖައްސައިފި އެވެ.
ޓޮމޮހީރޯ ކާތޯގެ އެ އަމަލަކީ ފަހުގެ ތާރީހެއްގައި ޖަޕާނުގައި ގިނަ އަދަދެއްގެ ބަޔަކު އެއް ފަހަރާ މަރާލައި، މުޅި ގައުމު ސިއްސުވާލި ބިރުވެރި އަމަލެކެވެ.
އަކިހަބާރާ ޝޮޕިން ޑިސްޓްރިކްޓުގައި މެންދުރު ވަގުތު ގިނަ ބަޔަކު ހިނގާ ބިނގާވެ އުޅެނިކޮށް، ކާތޯ އެންމެ ފުރަތަމަ ގޮސް އެ މީހުންގެ ގައިގައި ޖެއްސީ ބޮޑު ލޮރީއަކުންނެވެ.
ލޮރީއިން ޖެއްސުމުން ތިން މީހުން މަރުވި އެވެ. އޭގެ ފަހުން ލޮރީއިން ފައިބައި، ކައިރީގައި ތިބި މީހުންނަށް ވަޅިން ހަމަލާ ދޭން ފެށި އެވެ.
ވަޅިން ހަމަލާ ދިނުމުން ހަތަރު މީހުން މަރުވެ، ހަތަރު މީހުންނަށް އަނިޔާވި އެވެ. އެ އަނިޔާވެރި އަމަލު ހިންގި އިރު ކާތޯގެ އުމުރުން 25 އަހަރެވެ.
އޭނާ ހައްޔަރު ކުރީ އަކިހަބާރާ ޑިސްޓްރިކްޓުންނެވެ. ޝަރީއަތުގެ ތެރޭގައި ކުށަށް އިއުތިރާފުވެ، ކާތޯ ބުނީ އެކަން ކުރީއޮންލައިންކޮށް މީހުން އޭނާއަށް ބުލީ ކުރާތީ އައި ރުޅީގައި ކަމަށެވެ.
ޖަޕާނުގެ ނޫސްތަކުން ބުނީ ކާތޯގެ އުމުރުން 39 އަހަރުގައި އަންގާރަ ދުވަހު ދަންޖައްސައި މަރުގެ ހުކުމް ތަންފީޒު ކުރީ ޓޯކިޔޯ ޑިޓެންޝަން ސެންޓަރުގައި ކަމަށެވެ.
މިއީ ޖަޕާނުގައި މި އަހަރު ތަންފީޒު ކުރި ފުރަތަމަ މަރުގެ ހުކުމެވެ. މިދިޔަ އަހަރުގެ ޑިސެމްބަރު މަހު ވެސް ތިން ތިން ކުށްވެރިން ދަން ޖެއްސި އެވެ.
މަރުގެ ހުކުމް އިއްވާފައިވާ 100 އަށް ވުރެ ގިނަ ކުށްވެރިން ޖަޕާނުގެ ޖަލުތަކުގައި އެބަ ތިއްބެވެ.
