ރ. އަލުފުށި ފަޅުން ބިން ހިއްކައިގެން އެ ރަށުގައި އެއާޕޯޓެއް ތަރައްގީކުރުމުގެ މަސައްކަތް ކުރަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ޑްރެޖަރު އެ ރަށަށް ހިނގައްޖެ އެވެ.
އަލިފުށީ އެއާޕޯޓު މަޝްރޫއަކީ އެމްޓީސީސީއަށް ޑިޒައިން އެންޑް ބިލްޑް އުސޫލުން 451 މިލިއަން ރުފިޔާއަށް، ދެ އަހަރުން ނިންމާގޮތަށް މިދިޔަ އަހަރުގެ ސެޕްޓެމްބަރުގައި ހަވާލުކުރި މަޝްރޫއެކެވެ. މިއީ އެމްޓީސީސީން މިހާތަނަށް ހިންގާ އެންމެ ބިޔަ މަޝްރޫއެވެ.
މި މަޝްރޫއުގެ ދަށުން އަލިފުށީގެ 50.5 ހެކްޓަރުގެ ބިން ހިއްކާއިރު، އޭގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީ އާއި ގެދޮރުވެރިކަމުގެ ބޭނުމަށް ހާއްސަކުރާ ބިމެކެވެ. ބާކީ އޮތް 40.5 ހެކްޓަރަކީ 1200 މީޓަރުގެ ރަންވޭއެއް އޮންނަ އެއާޕޯޓަށް ހާއްސަ ސަރަހައްދެކެވެ.
އެހެން މަޝްރޫއުތަކުގައި އެމްޓީސީސީގެ "މަހާ ޖައްރާފު" ބޭނުންކުރަމުން ދިއުމާ ގުޅިގެން މަސައްކަތް ފެށުން ލަސްވިނަމަވެސް، އެމްޓީސީސީއަށް އަލަަށް ގެނައި ޑްރެޖަރު މިއަދު ވަނީ އެ ރަށު ފަޅަށް ވައްދާފަ އެވެ.
އަލިފުށީގައި އެއާޕޯޓެއް އެޅުމަކީ ކުރިން ރޭވިފައި އޮތް ކަމެއް ނޫނެވެ. އެ މަޝްރޫއު އިއުލާނުކުރީ ކުއްލިއަކަށެވެ. މިކަމާ ގިނަ ބަޔަކު ވަނީ ކަންބޮޑުވުން ފާޅުކޮށް، ސަރުކާރަށް ފާޑުކިޔާފަ އެވެ. އެންމެ ބޮޑު ކަންބޮޑުވުމަކަށްވީ އަތޮޅުގައި ގިނަ ރިސޯޓުތަކެއް އޮންނަ ދެކުނު ފަޅީގައި އެއާޕޯޓެއް ނާޅާ، އެކަހެރިކޮށް އޮންނަ އަލިފުށީގައި އެއާޕޯޓެއް އަޅާތީ އެވެ.
މިހާރު އެ އަތޮޅުގައި އެއާޕޯޓެއް އޮންނަ އިފުރަކީ ވެސް އުތުރު ފަޅީގައި އޮންނަ ރަށެކެވެ. މިކަމާ ކަންބޮޑުވުން ފާޅުކުރި މެމްބަރުންގެ ތެރޭގައި ސަރުކާރުގެ މައި ޕާޓީ އަދި މަޖިލިހުގައި ސުޕާ މެޖޯރިޓީ އޮންނަ އެމްޑީޕީ އާއި އިދިކޮޅު މެމްބަރުންނާއި އާންމުން ހިމެނެ އެވެ.
މިހާތަނަށް ސަރުކާރުން މި މައްސަލައިގައި ސާފު ޖަވާބެއް ދީފައި ނުވެ އެވެ. ނުސީދާކޮށް ބުނަނީ މިއީ މީހުން ދިރިއުޅޭ ކޮންމެ ރަށަކުން 20 މިނިޓުން ދަތުރުކުރެވޭ ދުރުމިނުގައި އެއާޕޯޓެއް އޮންނަން ރައީސް އަބްދުﷲ ޔާމީންގެ ސަރުކާރުގައި ފެށި، އަދި މި ސަރުކާރުން ދަމަހައްޓަމުން އަންނަ ސިޔާސަތުގެ ތެރެއިން ކުރާ ކަމެއް ކަމަށެވެ.
އެހެން މީހުން ހިތްހަމަ ނުޖެހުނު ނަމަވެސް އަލިފުށީ ރައްޔިތުން ވަނީ ސަރުކާރުގެ މި ނިންމުމަށް މަރުހަބާ ކިޔާ، މިއީ އަލިފުށީގެ އިގުތިސޯދު ބަދަލުކޮށްލާނެ ކަމެއް ކަމަށް ބުނެފަ އެވެ.
