ރޯމް (ޖުލައި 18) - ހިލޭ ޓްރާންސްފާއެއްގައި އާޖެންޓީނާގެ ފޯވާޑް، ޕައޮލޯ ޑިބާލާގެ ސޮއި ހޯދަން އިޓަލީގެ ގިނަ ޓީމުތަކަކުން މަސައްކަތް ކުރަނިކޮށް އޭނާ ގެންނަން ރޯމާގެ ކޯޗު ހޯސޭ މޮރީނިއޯ ފޯނުން ގުޅުމާ އެކު އެ ޑީލް ނިމުމުގެ ފުރުސަތު ބޮޑުވެއްޖެ އެވެ.
މިދިޔަ ސީޒަނުގެ ނިޔަލަށް ޔުވެންޓަސްގައި ހުރި ޑިބާލާ، 28، ގެ ކޮންޓްރެކްޓް އާ ނުކުރަން އެ ކްލަބުން ވަނީ މާ ކުރިން ނިންމައިފަ އެވެ.
ރިޕޯޓްތައް ބުނާގޮތުން ޔުވެންޓަސް އިން 2025 ވަނަ އަހަރާ ހަމައަށް ޑިބާލާ އަށް އާ ކޮންޓްރެކްޓެއް ދިނީ އެންމެ ފަހުން ހުރި ކޮންޓްރެކްޓްގައި ލިބޭ މުސާރަ އަށް ވުރެ ކުޑަ އަދަދަކަށް އެއްބަސްވުމަށެވެ. އެކަމަކު، ޑިބާލާ ބޭނުންވި ކުރިން ލިބެމުން އައި މުސާރަ އަށް ވުރެ ބޮޑު އަދަދެކެވެ. ޑިބަލާ އެންމެ ފަހުން ޔުވެންޓަސްގެ ކޮންޓްރެކްޓްގައި ހުރީ ބޯނަހާ އެކު އަހަރަކު 16 މިލިއަން ޑޮލަރު ލިބޭ ގޮތަށެވެ. ޔުވެންޓަސް އިން ކޮންޓްރެކްޓް އާ ކުރަން ޑިބާލާ އަށް ހުށަހެޅީ އަހަަރަކު ބޯނަހާ އެކު 14 މިލިއަން ޑޮލަރެވެ.
އާ ކްލަބެއް ހޯދަން ޑިބާލާގެ އޭޖެންޓް ޖޯޖް އަންޓުން، ގިނަ ގޮތްގޮތުން މަސައްކަތް ކުރިއިރު، އެއްވެސް ކްލަބަކުން ޑިބާލާ ކިޔާ މުސާރަ ދޭން ދެކޮޅުވުމުން އޭނާ އަށް އޮތީ މިހާތަނަށް ކްލަބެއް ހަމަނުޖެހި އެވެ. ފަހަކަށް އައިސް ޑިބާލާ ހޯދުމުގެ ރޭހުގައި ވާދަކުރީ އިޓަލީގެ ނަޕޯލީ އާއި އިންޓަ މިލާން އަދި ރޯމާ އެވެ.
އެންމެ ފަހުން ރޯމާ އިން އެ ޑީލްގައި ކުރިއެރުން ހޯދީ އެ ޓީމުގެ ކޯޗު ހޯސޭ މޮރީނިއޯ ފޯނުން ގުޅައި ރޯމާގައި އޮތް ފުރުސަތުތަކާއި އެ ކްލަބްގެ ސްޕޯޓިން ޕްރޮޖެކްޓް ޑިބާލާ އަށް ކިޔައިދިނުމުންނެވެ.
ސްކައި އިޓަލީން ރިޕޯޓްކުރާގޮތުގައި ޑިބާލާ ވަނީ ތިން އަހަރުގެ ކޮންޓްރެކްޓެއްގައި ރޯމާ އަށް ސޮއިކުރަން ނިންމައިފަ އެވެ. ޑިބާލާ ރޯމާ އަށް ބަދަލުވާނީ ކުރިން ލިބެމުން އައި ވަރަށް ވުރެ ކުޑަ މުސާރަ އަކަށެވެ.
އާޖެންޓީނާގެ އިންސްޓިޓިއުޓޯ ދޫކޮށް ޑިބާލާ އެންމެ ފުރަތަމަ 2012 ވަނަ އަހަރު ބަދަލުވީ އިޓަލީގެ ޕަލާމޯ އަށެވެ. ޕަލާމޯގައި މޮޅު ކުޅުމެއް ދައްކައި، 2015 ވަނަ އަހަރު ޔުވެންޓަސް އަށް ޑިބާލާ ސޮއިކުރީ ޖުމްލަ އެއްކޮށް 44 މިލިއަން ޑޮލަރަށެވެ.
ޔުވެންޓަސްގައި ޑިބާލާ ހޭދަކުރި ހަތް ވަރަކަށް އަހަރު ތެރޭ އޭނާ ވަނީ އެ ޓީމަށް ކުޅެދިން 293 މެޗުން 115 ގޯލު ޖަހައި، 48 ގޯލު ޖަހަން ފުރުސަތު ތަނަވަސްކޮށްދީފަ އެވެ. އެ ޓީމާ އެކު ޖުމްލަ 12 ތަށި އުފުލާލި އެވެ.
