ކ. މާފުށީ ޖަލަށް ވަގަށް ވަންނަން މަސައްކަތް ކުރި ދެ މީހުންގެ ތެރެއިން އެކަކު ގާތްގަނޑަކަށް ހަތަރު މަސް ދުވަހަށް ޖަލަށް ލުމަށާއި އަނެކަކު ގާތްގަނޑަކަށް ދޮޅު ލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފި އެވެ.
މި މައްސަލާގައި އެނގި ހުރެ ހުއްދަ ނޫން ތަނަކަށް ވަންނަން އުޅުމުގެ ކުށުގެ ދައުވާ އުފުލާފައިވަނީ ރ. މަޑުއްވަރީ، ފެހިއަލި، އިސްމާއީލް ހައްމާދު އަދި ނ. މަނަދޫ، ކެރީބިއަން، އިބްރާހީމް ޖަޒުލާންގެ މައްޗަށެވެ.
ދައުލަތުން ކޮށްފައިވާ ދައުވާގައިވާ ގޮތުން، އެ ދެ މީހުން ޖަލަށް ވަންނަން އުޅުނީ ސެޕްޓެމްބަރު 22، 2019 ގެ މެންދަމު ދޭއް ޖަހާކަށް ހާއިރެވެ. ދައުވާގައި ބުނަނީ އެ ދެ މީހުން މާފުށީ ޖަލުގެ އިރު ދެކުނު ފަރާތުން ހުއްދަ ނެތި އެ ރޭ ޖަލަށް ވަންނަން މަަސައްކަތް ކޮށްފައިވާ ކަމަވެ.
އެ ދެ މީހުން އެ ސަރަހައްދަށް ވަނީ ޑިންގީއެއްގަ އެވެ. އެއީ އުޅަނދު އަދި މީހުން ވަނުން މަނާ ސަރަހައްދެއްކަން އަންގައިދޭ ބޯޑެއް ވެސް ބަަހައްޓާފައިވެ އެވެ. މާފުއްޓާ 10 ވަރަކަށް ފޫޓު ދުރުގައި ޑިންގީ ބޭއްވުމަށް ފަހު އެ ސަރަހައްދަށް ދިޔައީ މޫދުގައި ފަތައިގެނެވެ.
ޖަލުގެ އިރު ދެކުނު ފަރާތު ފާރަށް ދެ މީހުން އެރުމަށް ފަހު އެ ސަރަހައްދުގައި ފުލުހުން ހަރަކާތްތެރިވާކަން އެނގުމުން ދެ މީހުން ވެސް ފާރުން ފުންމާލި އެވެ. އަދި ދުވެފައި ގޮސް އަނބުރާ މޫދަށް އެރިގަތެވެ. އެކަމަކު ފުލުހުން ކުރި މަސައްކަތުން ދެ މީހުން ވެސް އަތުލައިގަތް ކަމަށް ދައުވާގައިވެ އެވެ.
ހައްމާދުއާއި ޖަޒުލާން ވެސް ވަނީ ކުށަށް އިންކާރު ކޮށްފަ އެވެ.
އެ ދެ މީހުންގެ މައްޗަށް ކުށް ސާބިތުވުމުން ދައުލަތުން ވަނީ ފަސް ޝަފައީ ހެއްކާއި ކިތާބީ ހެއްކެއް ހުށަހަޅައިފަ އެވެ. ޝަފައީ ހެކިންގެ ތެރޭގައި ހިމެނެނީ ކަރެކްޝަންސްގެ ދެ އޮފިސަރަކާއި އޭރު ސީންގައި ހަރަކާތްތެރިވި ތިން ފުލުސް އޮފިސަރުންނެވެ. ކިތާބީ ހެއްކެއްގެ ގޮތުގައި ހުށަހެޅީ ފުލުހުން ތައްޔާރު ކުރި ފޮޓޯ ރިޕޯޓެކެވެ.
ދައުލަތުން ހުށަހެޅި ހެކިންގެ ހެކިބަހުން ކުށް ސާބިތުވާ ކަމަށް މައްސަލަ ބެއްލެވި ގާޒީ އަލީ އާދަމް ނިންމެވި އެވެ.
މި މައްސަލާގައި ދައުވާ އުފުލު ހައްމާދު ހަތަރު މަހާއި 24 ދުވަހުގެ މުއްދަތަކަށް ޖަލަށް ލުމަށް ހުކުމްކޮށްފައިވެ އެވެ. އޭނާ ޖަލުގައި ހޭދަކުރި މުއްދަތު އުނިކުރުމުން ޖަލު ހުކުމުން ދެން ތަންފީޒު ކުރަން ޖެހޭ މުއްދަތަކީ ހަތަރު މަހާއި ހަ ދުވަހެވެ.
ޖަޒުލާން ވަނީ އޭނާގެ އަދަބު ޖޫރިމަނާއަށް ބަދަލުކޮށްދިނުމަށް އެދިފަ އެވެ. އޭނާ މިހާރު ގެންދަނީ ލޮޖިސްޓިކް މެނޭޖަރެއްގެ ގޮތުގައި ކުންފުންޏެއްގައި މަސައްކަތް ކުރަމުންނެވެ. އަދި އޭނާއަށް މަަހަކު 12،000 ރުފިޔާގެ މުސާރައެއް ލިބޭ ކަން ވަނީ ފާހަގަކޮށްފަ އެވެ.
އެ ކަމަށް ރިއާޔަތްކޮށް ޖަޒުލާންގެ އަދަބު ވަނީ ޖޫރިމަނާއަށް ބަދަލުކޮށްދީފަ އެވެ. އެ ގޮތުން ހަ މަސް ދުވަހުގެ މުއްދަތެއް ތެރޭގައި 53،600 ރުފިޔާގެ ޖޫރިމަނާއެއް މީރާއަށް ދެއްކުމަށް ހުކުމް ކުރެއްވި އެވެ.
