ސްރީލަންކާގެ ރައީސް ގޮތަބަޔާ ރާޖަޕަކްސަ މިރޭ އިސްތިއުފާ ދެއްވިއިރު އެމަނިކުފާނު ރާއްޖެ މަގުން ސިންގަޕޫރަށް ވަޑައިގަތުމުގައި ދިވެހި ސަރުކާރުން އަދާ ކުރި ދައުރަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިރޭ ތައުރީފް ކުރައްވައިފި އެވެ.
މިވަގުތު ސިންގަޕޫރުގައި ހުންނެވި ގޮތަބަޔާގެ އިސްތިއުފާ ސިޓީ އެ ގައުމުގެ ގާނޫނު ހަދާ މަޖިލީހަށް ލިބުނުތާ ކުޑަ ވަގުތުކޮޅެއްފަހުން މިރޭ 7:06 ގައި ނަޝީދު އިނގިރޭސިބަހުން ޓުވިޓާގައި ލިިޔުއްވީ ލަންކާގެ ރައީސް އެ ގައުމުގައި ތާށިވެ، ފުރާނަފުޅަށް ގެއްލުންވާނެ ކަމަށް ބެލެވޭ ހާލަތެއްގައި ހުންނެވި ނަމަ އަދިވެސް އިސްތިއުފާ ނުދެއްވީސް ކަމަށެވެ.
"އަޅުގަނޑު ގަބޫލުކުރާ ގޮތުގައި ރައީސް ގޮތަބަޔާ އަދިވެސް ލަންކާގައި ހުންނެވި ނަމަ، ފުރާނަ ގެއްލޭނެ ކަމުގެ ބިރު އޮތުމާއެކު އިސްތިއުފާ ނުދެއްވީސް،" ނަޝީދު ވިދާޅުވި އެވެ. "[މިކަމުގައި] ދިވެހި ސަރުކާރުން ވިސްނުންތެރިކަމާއެކު އެޅި ފިޔަވަޅުތަކަށް އަޅުގަނޑު ސާބަސް ދެން. އަޅުގަނޑުގެ ހެޔޮ ދުއާ ސްރީ ލަންކާގެ ރައްޔިތުންނަށް"
ރިޕޯޓުތައް ބުނާ ގޮތުގައި ގޮތަބަޔާ އިސްތިއުފާގެ ސިޓީ ރައްދު ކުރެއްވީ ސިންގަޕޫރުގައި ހުންނަވާ އީމެއިލްގެ ޒަރިއްޔާއިންނެވެ. ގޮތަބަޔާގެ އިސްތިއުފާ މަޖިލީހުން އަދި އިއުލާނު ނުކުރައްވަ އެވެ. އޭގެ ކުރިން އެ ސިޓީއަކީ ސައްހަ ސިޓީއެއްކަން ކަށަވަރު ކުރަންޖެހެ އެވެ.
ރައީސް ގޮތަބަޔާ ރާއްޖެ ވަޑައިގެންނެވީ އެމަނިކުފާނުގެ ދެ ބޮޑީގާޑުންނާއި އަނބިކަނބަލުންނާއެކު އަންގާރަ ދުވަހުގެ ދަންވަރު 2:50 ގައި ސްރީ ލަންކާގެ އަސްކަރީ އުޅަނދެއްގަ އެވެ. ސިންގަޕޫރަށް ވަޑައިގަތީ ރާއްޖޭގައި 32 ގަޑިއިރު ހޭދަ ކުރެއްވުމަށްފަހު އެވެ.
ގޮތަބަޔަ ރާއްޖެ ވަޑައިގަތީ މިދިޔަ ހޮނިހިރު ދުވަހު އެމަނިކުފާނުގެ ގެކޮޅަށް ލަންކާގެ އާންމުން ވަދެގަތުމުގެ ކުޑައިރުކޮޅެއް ކުރިން ފިއްލެވުމަށްފަހު އެވެ. ފުރަތަމަ މަސައްކަތް ކުރެއްވި ކަމަށްވަނީ ޑުބާއީއަށް ވަޑައިގަތުމަށެވެ.
ރައީސް ގޮތަބަޔާ ރާއްޖެ ވަޑައިގެންނެވިއިރު ވައުދުވެވަޑައިގެންފައި އޮތީ އިއްޔެ މެންދުރު އިސްތިއުފާ ދެއްވާނެ ކަމަށެވެ. ފަހުން ރާއްޖޭގައި ހުންނަވައި ގާނޫނު ހަދާ މަޖިލީހުގެ ރައީސަށް ފޯނުން ގުޅުއްވައި ރޭ ދަންވަރު 12:00 ޖެހުމުގެ ކުރިން އިސްތިއުފާ ދެއްވާނެ ކަމަށް ވިދާޅުވި އެވެ.
ގޮތަބަޔާ އިސްތިއުފާ ނުދެއްވި ނަމަވެސް މަގާމުގެ ބާރުތަކާއި މަސްއޫލިއްޔަތުތައް ވަނީ އިއްޔެ ބޮޑުވަޒީރު ރަނިލް ވިކްރަމަސިންހައާ ހަވާލު ކުރައްވައިފަ އެވެ. އެހެންކަމުން ވަގުތީ ގޮތުން ރައީސްގެ ބާރުތައް މިހާރު އޮތީ ރަނިލް އަތުގަ އެވެ.
ގޮތަބަޔާ ރާއްޖެ ވަޑައިގެންނެވީ ލަންކާގެ ރައްޔިތުން އެމަނިކުފާނުގެ ގެކޮޅަށް ވަދެގަތުމުގެ ކުޑަ އިރުކޮޅެއް ކުރިން ފިއްލެވުމަށްފަހު އެވެ. އެންމެ ފުރަތަމަ އެމަނިކުފާނު މަސައްކަތް ކުރެއްވީ ޑުބާއީއަށް ވަޑައިގަތުމަށެވެ. ނަމަވެސް ވީއައިޕީން ވަޑައިގަތުމަށް ލަންކާގެ އިމިގްރޭޝަނުން ހުއްދަ ނުދިނުމުން، އަސްކަރީ އުޅަނދެއްގައި ރާއްޖެ ވަޑައިގަތީ އެވެ.
އަނބިކަނބަލުންނާއި ދެ ބޮޑީގާޑުންނާއެކު ރާއްޖެ ވަޑައިގެންނެވި ދެ އިންޖީނުލީ އެންޓެނޮވް-32 މަރުކާގެ ބޯޓުގައި އެމަނިކުފާނު ރާއްޖެ ގެންނެވުމަށް ސްރީ ލަންކާގެ އެއާފޯސްއަށް އަމުރު ކުރެއްވީ ހުދު އެމަނިކުފާނަށް ލިބިވަޑައިގެންފައިވާ ރިޔާސީ ބާރުގެ ދަށުންނެވެ.
