އެމެރިކާގެ ރައީސް ޖޯ ބައިޑެން މެދުއިރުމައްޗަށް ކުރައްވާ ފުރަތަމަ ދަތުރުގައި ސައުދީ އަރަބިއްޔާއަށް ވަޑައިގެންނެވުމުގެ ކުރިން ބުދަ ދުވަހު އިޒްރޭލުގައި މަޑު ކުރައްވައިފި އެވެ.
ބައިޑެންގެ މި ދަތުރުގައި އިޒްރޭލާއި ސައުދީގެ ވެރިން އަދި ފަލަސްތީނުގެ ރައީސްއާ ބައްދަލުކުރައްވާނެ އެވެ.
ބައިޑެންގެ ސަރުކާރު 2021 ވަނަ އަހަރު މަސައްކަތް ފެށި ފަހުން، މެދުއިރުމައްޗަށް ސުލްހަ ގެންނަން އެމެރިކާއިން އެކަށީގެންވާ މަސައްކަތް ނުކުރާތީ ފަލަސްތީނުން ކަންބޮޑުވުން ފާޅުކޮށްފައިވެ އެވެ.
އެހެން ނަމަވެސް މި ދަތުރުގެ ފޯކަސް އެންމެ ބޮޑަށް އޮންނާނީ ސައުދީގައި ހޭދަކުރައްވާ ވަގުތަށް ކަމަށް ބެލެވެ އެވެ. އެއީ ސައުދީގެ އިންސާނީ ހައްގުތަކުގެ ރެކޯޑަށް ބައިޑެން ހަރުކަށިކޮށް ފާޑުވިދާޅުވެފައި ވާތީ އެވެ.
އަންނަ ހޮނިހިރު ދުވަހު ވަލީ އަހުދު އަމީރު މުހައްމަދު ބިން ސަލްމާންއާ ބައްދަލުކުރައްވަން ހަމަޖެހިފައިވާ އިރު، ގިނަ ބަޔަކު ދަނީ ބައިޑެންއާ މެދު ހިތްހަމަނުޖެހުން ފާޅުކުރަމުންނެވެ.
އެމެރިކާގެ ޖާސޫސީ އިދާރާތަަކުން ބުނާ ގޮތުގައު އިސްތަންބޫލްގައި ހުންނަ ސައުދީ ކޮންޒިއުލޭޓް ތެރޭގަައި 2018 ވަނަ އަހަރު ނޫސްވެރިޔާ ޖަމާލް ހަަޝޮގްޖީ މަރާލައި، ފޮތިފޮތިކޮށްލީ ވަލީ އަހުދުގެ އަމުރު ކުރެއްވުމުންނެވެ. ނަމަަވެސް އެއީ ދޮގު ތުހުމަތެއް ކަމަށް ވަލީ އަހުދު ވިދާޅުވެފައިވެ އެވެ.
އެ ހާދިސާއާ ގުޅިގެން ބައިޑެން ވިދާޅުވެފައި ވަނީ ސައުދީ އަރަބިއްޔާއަކީ ބައިނަލްއަަގްވާމީ މުޖުތަމައުއާ "އެކަހެރިވެގަނެގެން އުޅޭ" ދައުލަތެއް ކަމަށެވެ. އަދި ސައުދީއާ ދުރު ހާރިޖީ ސިޔާސަތަކަށް ވައުދުވެވަޑައިގެންނެވި އެވެ.
މިދިޔަ ހޮނިހިރު ދުވަހު ދަަ ވޮޝިންޓަން ޕޯސްޓުގައި ޝާއިއުކުރެއްވި އޮޕް-އެޑެއްގައި ބައިޑެން ވަނީ ސަައުދީއަށް ކުރައްވާ ދަތުރު ދިފާއު ކުރައްވާފަ އެވެ. އެމަނިކުފާނު ވިދާޅުވީ "އަމާޒަކީ ގުޅުން ހަލާކު ނުކޮށް، މިސްރާބު ބަދަލު ކުރުން" ކަމަށެވެ.
