ދިވެހި އަސްކަރިއްޔާގެ ހުއްދައާއެކު ލަންކާގެ ރައީސް ފިއްލަވައިގެން ދިވެހިރާއްޖެއަށް ގެނައުން ކުއްވެރިކޮށް، އެ ނިންމުން ނިންމާފައިވާ ގޮތް ސާފުކޮށްދިނުމަށް އިދިކޮޅު ޕީޕީއެމް ހަރަކާތުން ސަރުކާރަށް ގޮވާލައިފި އެވެ.
ރޭ ދަންވަރުގެ ވަގުތެއްގައި 'ސިއްރުން' ގޮތަބަޔަ ރާއްޖެއަށް ކުރެއްވި ދަތުރު ކުއްވެރިކޮށް، އެކަމާ ގުޅިފައި ހުރި ކަންބޮޑުވުންތައް ހިއްސާކޮށް ޕީޕީއެމުން ނެރުނު ބަޔާނުގައި ބުނެފައިވަނީ، ގޮތަބަޔަ އަށް ދިވެހި ސަރުކާރުން ހިމާޔަތްދޭން ނިންމުމަކީ ސިޔާސީ މަސްރަހު ހޫނުވެ، އިގްތިސާދު ފުނޑިފައި އޮތް ލަންކާގައި ތިބި ދިވެހި ރައްޔިތުން ނުރައްކަލަކަށް ހުށަހެޅިދާނެ ވަރުގެ ކަމެއް ކަމަށެވެ. އެހެންކަމުން ގޮތަބަޔަ ގެ ދަތުރުގެ ހަގީގަތާއި އެ ނިންމުން ނިންމި ގޮތް ހާމަކޮށް ޖަވާބުދާރީވުމަށް ގޮވާލާފައިވެ އެވެ.
ލަންކާގެ އަސްކަރީ މަތިންދާބޯޓެއްގައި ރޭ ކުއްލިއަކަށް ގޮތަބަޔަ ރާއްޖެ ވަޑައިގަތުމުން އެ މައްސަލަ ހޫނުވެ އެތައް ބައެއްގެ ފާޑުކިޔުން އަމާޒުވެފައިވާއިރު، ފޮރިންމިނިސްޓްރީން ވެސް މިހާތަނަށް އެއްވެސް ބަހެއް އެކަމުގައި ބުނެފައި ނުވެ އެވެ.
ޕީޕީއެމުން ބުނީ، ގޮތަބަޔާ ރާޖަޕަކްސާ ފިއްލަވައިގެން ދިވެހި ސަރުކާރާއި އަސްކަރިއްޔާގެ ހިމާޔަތުގައި ރާއްޖެ ގެނައުމަކީ ދިވެހި ރައްޔިތުން ބަލައިގަންނާނޭ ކަމެއް ނޫން ކަމަށެވެ.
"މިޖަރީމާ ހިންގާފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާއި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ގުޅިގެންކަން ވަރަށް ފާޅުކަން ބޮޑުކޮށް އެނގެން އޮތުމާއެކު، މިކަމުގެ ހަގީގަތް ހާމަކޮށްދެއްވައި ދިވެހި އަދި ލަންކާ ރައްޔިތުންނަށް ފޮރިން މިނިސްޓރ ޢަބްދުﷲ ޝާހިދާއި ރައީސް އިބްރާހީމް މުހައްމަދު ސާލިހު ޖަވާބުދާރީވުމަށް ގޮވާލަމެވެ،" ޕީޕީއެމްގެ ބަޔާނުގައި ބުނެފައިވެ އެވެ.
ލަންކާ ރައްޔިތުންގެ އިހުސާސްތަކާއި ދެކޮޅަށް ދިވެހި ސަރުކާރުން އަމަލުކޮށް އެގައުމުގެ ރައީސަށް ހިމާޔަތް ދިނުމުގެ ސަބަބުން އެގައުމުގައި ދިރިއުޅޭ އެތައް ހާސް ދިވެހިން ނުރައްކަލަށް ހުށަހެޅިގެން ދިޔުމުގެ ޒިންމާ ދިވެހި ސަރުކާރުން ނަގަންޖެހޭނެ ކަމަށް ވެސް އެ ބަޔާނުގައި ބުނެފައިވެ އެވެ. އެހެންކަމުން އެ ޒިންމާ ނަންގަވައި، ލަންކާގައި ތިބި ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ އަވަސް ފިޔަވަޅުތައް އެޅުއްވުމަށް ވެސް ގޮވާލާފައިވެ އެވެ.
ގޮތަބަަޔާގައުމުން ފިއްލަވައި ރާއްޖެއަށް ވަޑައިގެންފައިވާތީ, އެ ގައުމުގައި މުޒާހަރާތައް ވަނީ މިހާރު ފަފެށިފަ އެވެ.
ލަންކާގެ ރިޔާސީ ގަނޑުވަރު ކައިރީގައި މުޒާހަރާ ފަށާފައިވާއިރު, މުޒާހަރާގެ ބައިވެރިން ގެންދަނީ ގޮތަބަޔާ ރާއްޖޭން ހިމާޔަތް ދިނުމުން އެކަމާ ދެކޮޅަށް ނުރުހުން ފާޅުކުރަމުންނެވެ. އަދި, ގޮތަބަޔާ ވީއެންމެ އަވަހަކަށް ރާއްޖެ އަނބުރާ ފޮނުވާލުމަށް ވެސް މުޒާހަރާގައި ދަނީ ގޮވަމުންނެވެ.
