ސްރީ ލަންކާގެ ރައީސް ގޮތަބަަޔާ ރާޖަޕަކްސަ މިރޭ ދަންވަރުގެ ވަގުތެއްގައި އެ ގައުމުން ފިއްލަވައި، ދިވެހިރާއްޖެއަށް ވަޑައިގެންފި އެވެ.
ރައީސް ގޮތަބަޔާ ރާއްޖެ ވަޑައިގެންފައި މި ވަނީ މިއަދުގެ ވަގުތެއްގައި އިސްތިއުފާ ދެއްވާނެ ކަމަށް މީގެ ތިން ދުވަސް ކުރިން އެމަނިކުފާނު އިއުލާން ކުރައްވާފައި އޮއްވަ އެވެ.
ސްރީ ލަންކާގެ ރައީސް ރާއްޖެ ގޮތަބަޔާ، 73، ވަޑައިގަތީ ހަނގުރާމަމަތީ ކުޑަ މަތިންދާބޯޓެއްގައި ކަމަށްވެ އެވެ. މިއަދު އިސްތިއުފާ ދެއްވުމުގެ ކުރިން ރާއްޖެ ވަޑައިގެންނެވިއިރު ސްރީ ލަންކާގެ ރައީސް މަގާމުގައި ހުންނަވަނިކޮށް ހައްޔަރު ކުރުން ގާނޫނު އަސާސީ ހުއްދައެއް ނުދެ އެވެ.
"އަދަދު" އަށް މައުލޫމާތު ދިން އިތުބާރު ހިފޭ މަސްދަރުތަކުން ބުނީ ގޮތަބަޔާ ރާއްޖެ ވަޑައިގެންނެވީ މާލެ ގަޑިން 2:50 ގަ އެވެ. އޭގެ ގަޑިއެއްހާއިރު ކުރިން ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުޅުލޭ އެއާޕޯޓުން ވަނީ ފެނިފަ އެވެ. ގޮތަބަޔާ ރާއްޖެ ވަޑައިގެންނެވި ބޯޓު ހުޅުލެއިން ފުރާފައި ވަނީ 4:40 ހާއިރެވެ. ފުރިއިރު އެއާޓްރެފިކް އެޕްލިކޭޝަންތައް އިމިގްރޭޝަނަށް ދައްކާފައެއް ނުވެ އެވެ.
ގޮތަބަޔާއަށް ރާއްޖެ ވަޑައިގެންނެވުނީ އިމިގްރޭޝަންގެ އޮފިޝަލުން އެކަމާ ދެކޮޅު ހެދުމުން، ފުރަން މަސައްކަތް ކުރާތާ 24 ގަޑިއިރު ވެއެތުވި ފަހުން ކަމަށް އޭއެފްޕީން ބުނެ އެވެ. ގޮތަބަޔާއާއެކު އޭނާގެ އަނބިމީހާ އާއި ބޮޑީގާޑާއެކު ޖުމްލަ ހަތަރު މީހަކު ވަޑައިގެންނެވި ކަމަށްވެ އެވެ.
ގޮތަބަޔާ ރާއްޖެ ވަޑައިގެންނެވުމުގެ ކުރިން ފުރަތަމަ އުޅުއްވީ އަވައްޓެރި އިންޑިއާއަށް ވަޑައިގަންނަވަން ކަމަށް އޭއެފްޕީން ބުނެ އެވެ. ރާއްޖެ ވަޑައިގެންނެވީ މިލިޓަރީ ބޯޓެއް އިންޑިއާގައި ޖެއްސުމުގެ ހުއްދަ ވަގުތުން ނުލިބުމުން ކަމަށްވެ އެވެ.
ގޮތަބަޔާ އެންމެ ފުރަތަމަ ވަޑައިގަންނަވަން ބޭނުންވެވަޑައިގެންނެވީ ޑުބާއީއަށް ކަމަށްވެ އެވެ. ނަމަވެސް ވީއައިޕީން ފުރަން ހުއްދަ ނުދީ، އާންމުންނާއެކު ވަޑައިގަންނަވަންޖެހޭނެކަން އެނގިވަޑައިގަތުމުން މަޑުކުރެއްވީ ކަމަށްވެ އެވެ. އެގޮތަށް މަޑުކުރެއްވުމުގެ ސަބަބުން ޑުބާއީއަށް ފުރި ހަތަރު ފްލައިޓު އެމަނިކުފާނަށް ނޭރުނު ކަމަށްވެ އެވެ.
މިދިޔަ ހޮނިހިރު ދުވަހު ސްރީ ލަންކާގެ އާންމުންގެ ވަރަށް ގިނަ ބަޔަކު އެއްވެ ގޮތަބަޔާގެ ގެކޮޅަށް ހިސޯރު ކުރުމުގެ ކުޑައިރުކޮޅެއް ކުރިން އޭނާ ވަނީ އާއިލާއާއެކު ފިއްލަވާފަ އެވެ.
titledesc
