އުރީދޫ ދިވެހި ޕްރިމިއާ ލީގުގައި މިއަދު ހަވީރު ކްލަބް އީގަލްސް އަތުން 1-0 އިން މޮޅުވެ، ޓީސީ ސްޕޯޓްސް ކްލަބް ލީގުގެ ތިން ވަނައިގައި ހަމަޖެހިލައިފި އެވެ.
މިއީ އީގަލްސްގެ ކޯޗުކަމާ މުހައްމަދު އާތިފް (އާތީ) ހަވާލުވިފަހުން ކުޅުނު ފަސް މެޗުގެ ތެރެއިން ބަލިވި ފުރަތަމަ މެޗެވެ. މިއީ މި ފަހަރު ލީގުގައި ޓީސީން އީގަލްސް ބަލިކުރި ފުރަތަމަ ފަހަރެވެ. ޕްރެޒިޑެންޓްސް ކަޕްގައި އީގަލްސް އަތުން ޓީސީ ވަނީ 1-0 އިން މޮޅުވެފަ އެވެ.
ލީގުގައި ޖެހިޖެހިގެން ހޯދި ތިން ވަނަ މޮޅާ އެކު ޓީސީ ލީގުގެ ތިން ވަަނައިގައި އޮތީ 17 މެޗުން 26 ޕޮއިންޓާ އެކު އެވެ. ހަތަރެއްގައި އޮތް ކްލަބް ވެލެންސިއާ އަށް ވަނީ 16 މެޗުން 22 ޕޮއިންޓް ލިބިފަ އެވެ.
އީގަލްސް ލީގުގެ ދެ ވަނައިގައި އޮތީ 17 މެޗުން 40 ޕޮއިންޓް ހޯދައިގެންނެވެ. އީގަލްސް ބަލިވުމުން އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ލީގުގެ އެއް ވަަނައިގައި އަށް ޕޮއިންޓުގެ ލީޑެއް ނަގަން ވަނީ ފުރުސަތު ލިބިފަ އެވެ. މާޒިޔާ މި ވަގުތު އެއް ވަނައިގައި އޮތީ 16 މެޗުން 45 ޕޮއިންޓް ހޯދައިގެންނެވެ. މާޒިޔާ މާދަމާރޭ ކުޅޭނީ ސުޕަ ޔުނައިޓެޑް ސްޕޯޓްސް (ސަސް)އާ އެވެ.
މިއަދުގެ މެޗަށް ނުކުތްއިރު އީގަލްސްގެ ޑިފެންޑަރު އަހުމަދު ނޫމާން (ހެލްމެޓް) ވަނީ އަލުން ފުރަަތަމަ އެގާރައިގައި ހިމަނައިފަ އެވެ. އަނެއްކޮޅުން، ޓީސީން ވަނީ ޒުވާން މިޑްފީލްޑަރު، އަލީ އިޝްފާގު ހަސަން މަޖީދު އާއި ފޯވާޑް މުހައްމަދު މުސްލިހު (މުއްޓި) އަށް ފުރަތަމަ އެގާރައިން ފުރުސަތު ދީފަ އެވެ. މިއީ 19 އަހަރުން ދަށުގެ ޔޫތު ޗެމްޕިއަންޝިޕްގައި މަހިބަދޫ ސްޕޯޓްސް ކްލަބްގެ ކެޕްޓަންކަން ކުރި އިޝްފާގަށް ފަހަކަށް އައިސް ޓީސީން އަންނަނީ ގިނަ ފުރުސަތު ދެމުންނެވެ.
އީގަލްސް އިން މެޗު ފަށައިގެން ކުރިއަށް ޖެހިގެން ކުޅެމުންދިޔައިރު، އެ ޓީމުގެ އެޓޭކްތައް ހުއްޓުވަން ޓީސީ ޑިފެންޑަރުން ދިޔައީ ރަނގަޅު ކުޅުމެއް ދައްކަމުންނެވެ. ޓީސީން މެޗުގައި ޖެހި ހަމައެކަނި ލަނޑު ކާމިޔާބުކުރީ މެޗުގެ 23 ވަނަ މިނިޓްގަ އެވެ. މިއީ ޓީސީގެ މިސްރު ފޯވާޑް އޮމަރު ސަލާހު އީގަލްސް ކުޅުންތެރިއަކު ކައިރިން ނައްޓާފައި ގޯލު ކުރިމައްޗަށް ހުރަސްކޮށްލި ބޯޅައެއް، އީގަލްސްގެ ހެލްމެޓު ފައިގައި ޖެހިފައި ވަން ގޯލެކެވެ.
ޓީސީގެ މިސްރު ޑިފެންޑަރު އަލާ (ކ) އީގަލްސްގެ ކެޕްޓަން ސިފާއު ކައިރިން ބޯޅަ ފޮނުވާލަނީ.--- ފޮޓޯ: އިމޭޖަސް.އެމްވީ/ ނައުޝަމް ވަހީދު
ނަތީޖާ ހަމަހަމަކުރަން އީގަލްސް އިން ކުރިއަށް ޖެހިގެން ކުޅެ، މެޗުގެ 26 ވަނަ މިނިޓްގައި އެ ޓީމުގެ އަހުމަދު ރިޒްވާން (ރިޒޭ) ރަނގަޅު ހަމަލާއެއް ފޮނުވާލި އެވެ. އޭރިއާތެެރެއިން ޓީސީގެ ކުޅުންތެރިއަކު ކައިރިން ނައްޓާފައި ޖެހި ޝޮޓް އަމާޒުވީ ޓީސީގެ ކީޕަރު ސްރީ ލަންކާގެ ސުޖަން ޕެރޭރާ އަތަށެވެ.
ލީޑުފުޅާކުރަން މެޗުގެ 32 ވަނަ މިނިޓްގައި ޓީސީން ފުރުސަތެއް ހޯދި އެވެ. އެ ޓީމުގެ ފުލްބެކް، ހަމްދޫން އަބްދުލް ލަތީފް އީގަލްސްގެ ތިން ކުޅުންތެރިން ކައިރިން ދެމިގަތުމަށް ފަހު ދިނީ މުއްޓި އަށެވެ. މުއްޓި ޖެހި ބޯޅަ އީގަލްސްގެ ކީޕަރު ހަަސަން އަލީފް އިބްރާހިމް ވަނީ މަތަކޮށްފަ އެވެ.
މެޗުގެ 38 ވަނަ މިނިޓްގައި އޭރިއާބޭރު ރޮނގުކައިރިން އީގަލްސްގެ ސްޕެއިން މިޑްފީލްޑަރު، އެންހެލް މުނޯޒް ތިރިތިރިން ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ. ފުރަތަމަ ހާފުގެ އިތުރު ވަގުތުގައި އީގަލްސްގެ އިމްރާން ނަޝީދު (އިންމަ) އަށް ރަނގަޅު ފުރުސަތެއް ލިބުނެވެ. އީގަލްސްގެ ހަސަން ރާއިފް އަހުމަދު (ހަންނަ) ކުޅުންތެރިއަކު ކައިރިން ނައްޓާފައި ވަދެ، ގޯލު ކުރިމައްޗަށް ހުރަސްކޮށްލި ބޯޅަ އިންމަ ފޮނުވާލި ނަމަވެސް ދިޔައީ ބޭރަށެވެ.
ދެ ވަަނަ ހާފްގެ ކުޅުން ފެށިގެން ފަސް ވަނަ މިނިޓްގައި އީގަލްސް އަށް ނަތީޖާ ހަމަަހަމަކުރަން ލިބުނު ޕެނަލްޓީ އަކުން ރިޒޭ ޖެހި ބޯޅަ ދިޔައީ ހުރަސްދަނޑި މަތިންނެވެ. މިއީ ޓީސީގެ ޑިފެންޑަރު، މުހައްމަދު އަޖުފާން އޭރިއާތެރެއިން އީގަލްސްގެ އިންމަ އަށް ކުރި ފައުލަކަށް ދިން ޕެނަލްޓީ އެކެވެ.
އޭގެ ފަހުން އީގަލްސް އިން ޓީސީ ހާފްގެ ތެރޭގައި ބޯޅަ ހިފަަަހައްޓައިގެން ގިނަ އެޓޭކްތަކެއް ކުރި އެވެ. އެ ގޮތުން ރިޒޭ ނެގި ހުރަހެއް އެ ޓީމުގެ އެހެން ކުޅުންތެރިއަކަށް ލިބުމުގެ ކުރިން ޓީސީގެ ޑިފެންޑަރުން ވަނީ އެ ބޯޅަ ސަލާމަތްކޮށްފަ އެވެ. އީގަލްސްގެ ބްރެޒިލް ފޯވާޑް ބްރޫނޯ ވިނީޝިއުސް ޖެހި ޝޮޓް ދިޔައީ އަރިމަތިން ބޭރުންނެވެ.
މެޗުގެ 81 ވަނަ މިނިޓްގައި އީގަލްސް އަށް ލިބުނު ހިލޭ ޖެހުމަކުން ރިޒޭ ހުރަސްނެގުމުގެ ބަދަލުގައި ތިރިތިރިން ހަންނަ އަށް ދިން ބޯޅަ ފޮނުވާލުމުން ގޯލުގެ ދަނޑީގައި ޖެހިފައި، ބޯޅަ އަމާޒުވީ ކީޕަރު ސުޖަން އަތަށެވެ.
އިތުރު ވަގުތުގައި އީގަލްސްގެ ރިޒޭ އަށް ވަނީ ރަނގަޅު ދެ ފުރުސަތު ލިބިފަ އެވެ. ޓީސީގެ އަޖުފާން ފަހަތަށް ދިން ބޯޅައެއް ހޯދައި، ރިޒޭ ޖެހި ބޯޅަ ހުރަސްދަނޑިއަށް އަމާޒުވި އެވެ. އޭގެ ފަހުން ކޯނަރަކުން ހަންނަ ނެގި ބޯޅަ ރިޒޭ، އޭރިއާތެރެއިން ވޮލީ އަކުން ފޮނުވާލި ނަމަވެސް އެ ބޯޅަ ފެނުޖެހިފައި ދިޔައީ ހުރަސްދަނޑި މަތިންނެވެ.
ލީގުގައި މިރޭ ކުޅޭ މެޗުގައި ޔުނައިޓެޑް ވިކްޓަރީ (ޔޫވީ) ބައްދަލުކުރާނީ ދަ ގްރާންޑޭ ސްޕޯޓްސް ކްލަބާ އެވެ. މެޗު ފަށާނީ 21:00 ގަ އެވެ.
