ޖަޕާނުގެ ކުރީގެ ބޮޑު ވަޒީރު ޝިންޒޯ އަބޭ އަވަހާރަކޮށްލަން ހަމަލާ ދިން މީހާއަކީ "ވަކި ގްރޫޕަކާ" ދެކޮޅަށް ހިތުގައި ރުޅިވެރިކަން އޮތް މީހެއް ކަމަށް ފުލުހުންގެ ތަަހުގީގީ ޓީމުން ބުނެފި އެވެ.
ހަމަލާ ދިން ކަމަށް ތުހުމަތު ކުރެވޭ އުމުރުން 41 އަހަރުގެ ޓެޓްސުޔާ ޔަމަގާމީ ގަބޫލު ކުރި ގޮތުގައި އަބޭއަކީ އެ ގްރޫޕުގެ މެމްބަރެކެވެ. އަބޭގެ ހަށިކޮޅަށް އޭނާ ބަޑި ޖެހީ އެހެންވެގެން ކަމަށް ފުލުހުން ބުންޏެވެ. ނަމަވެސް އެއީ ކޮން ގްރޫޕެއް ކަމެއް ހާމަކޮށްފައެއް ނުވެ އެވެ.
ސިޔާސީ ކެމްޕެއިން ހަރަކާތެއްގައި ވާހަކަ ދައްކަވަނިކޮށް އަބޭގެ ހަށިކޮޅަށް ބަޑި ޖެހުމުން، ހުކުރު ދުވަހު ހެނދުނު ހޮސްޕިޓަލަށް ގެންދިޔަަ ނަމަވެސް، ފަސް ގަޑިއިރު ފަހުން އެމަނިކުފާނު އަވަހާރަވި އެވެ.
ފުލުހުން ބުނީ ގޭގައި އަމިއްލައަށް އުފެއްދި ބަޑިއަކުން ހަމަލާ ދިން ކަމަށް ޓެޓްސުޔާ ޔަމަގާމީ އެއްބަސްވެފައިވާ ކަމަށެވެ.
އަބޭއަކީ ޖަޕާނުގައި އެންމެ ގިނަ ދުވަހު ބޮޑު ވަޒީރުކަން ކުރެއްވި ލީޑަރެވެ. އުމުރުން 67 އަަހަރުގައި އެމަނިކުފާނު އަވަހާރަވުމުން، މުޅި ޖަޕާނަށް ވަނީ ކުއްލި ސިހުމެއް އައިސްފަަ އެވެ. އެ ގައުމަކީ ބަޑީގެ ހަމަލާތައް މަދު، އާންމު ގޮތެއްގަައި ވަރަށް ރައްކާތެރި ގައުމެކެވެ.
ހަަމަލާ ދިނުމުގަައި ހަރަކާތްތެރިވީ ޓެޓްސުޔާ ޔަމަގާމީ އެކަނަިތޯ ބެލުމުގެ މަސައްކަތް ފުލުހުން އަދިވެސް ދަނީ ކުރަމުންނެވެ. އޭގެ އިތުރުން، އޭނާގެ ހިތުގައި ނަފުރަތު އުފެދިފައި އޮތް ގްރޫޕްގެ އެހެން މެމްބަަރުން ތިއްބައި، އަބޭއަށް ވަަކިން ޓާގެޓް ކުރީ ކީއްވެތޯ ވެސް ފުލުހުން ސާފު ކުރާނެ އެވެ.
