މާލޭ ރައްޔިތުންނަށް ބަންޑާރަ ގޯތީގެ ގޮތުގައި 5000 ގޯތި ދޫކުުރުމަކީ އެންމެ އިންސާފުވެރި ގޮތެއް ކުރެވޭނެ ކަމެއްގެ ގޮތުގައި ނުދެކޭތީ، އެ ކަން ބަލައިދިނުމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު މޫސާ ސިރާޖު ރައްޔިތުންގެ މަޖިލީހަށް ސިޓީއެއް ފޮނުއްވައިފި އެވެ.
"ބިންވެރިޔާ-ގެދޮރުވެރިޔާ" ގެ ނަމުގައި މާލޭ ރައްޔިތުންނަށް ބަންޑާރަ ގޯތީގެ ގޮތުގައި ދޫކުރާ ގޯއްޗާއި ފްލެޓަށް އެދުމުގެ ފުރުސަތު މިހާރު ވަނީ ހުޅުވާލާފަ އެވެ. އެހެންނަމަވެސް ގޯތި ދިނުމާމެދު، ބައެއް މީހުން އަންނަނީ ގިނަ ކަންބޮޑުވުންތަކެއް ފާޅުކުރައްވަމުންނެވެ.
"ދައުލަތުގެ ދަރަނި 100 ބިލިއަނަށް އަރައި ދަރަނި ނުދެއްކޭނެ ކަމުގެ ބަހުސް އިންތިހާއަށް ބޮޑުވެފައިވާ ހާލަތުގައި ހަތަރު ލައްކައެއްހާ މީހުންގެ އާބާދީގެ ތެރެއިން 5000 އާއިލާއަށް 48 ބިލިއަން ރުފިޔާގެ އަގުހުރި ބިން ހިލޭ ދިނުމަކީ ބޮޑު ބޭއިންސާފެއް ކަމުގައި އަޅުގަނޑު ދެކެން. އަދި މިއީ ބޯހިޔާވަހިކަމަށް އެންމެ ބޮޑަށް ޖެހިފައިވާ، ފައިސާ ދައްކާ ގޮތަށް ހިޔާ ފްލެޓު ދޫކުރި މީހުންނަށް ކުރާ މަލާމާލަތަކަށް ނޫނީ ނުވާނެ," ސިރާޖު ފޮނުވި ސިޓީގައި ވިދާޅުވެފައިވެ އެވެ.
ސިރާޖު ފޮނުއްވި ސިޓީގައި ވަނީ މާލެ ސަރަހައްދުގެ ބިމުގެ ޑިމާންޑު އިންތިހާއަށް ބޮޑުވެފައި، އަގުބޮޑު އިރު، ގޯތި ދޫކުރުމަށް ވުރެ ފްލެޓު ދޫކުރުން އެއީ މާ އެދެވޭ ކަމެއް ކަމުގައި ގަބޫލުކުރާ ކަމަށް ވިދާޅުވެފަ އެވެ.
މާލޭގެ ރައްޔިތުން ހިމެނޭހެން ރާއްޖޭގެ ހުރިހާ ރައްޔިތުންނަށް ގޯތި ލިބެން ޖެހޭ ކަމަށް ގަބޫލުކުރައްވާ ކަމަށާއި އެހެންނަމަވެސް މާލޭ ސަރަހައްދުން ގޯތި ދޫކުރުމަކީ އިންސާފުވެރި ގޮތެއް ނޫން ކަން ފާހަގަކޮށް، ސިރާޖު ވަނީ ގޯތީގެ ގޮތުގައި ދޫކުރާ ބިންތައް ބީލަމަށް ލައިގެން ވިއްކައިފިނަމަ ދައުލަތަށް ލިބޭނެ ކަމަށް އަންދާޒާ ކުރާ ފައިސާގެ އަދަދު ބަލައިދިނުމަށް މަޖިލީހުގައި އެދިވަޑައިގެންފަ އެވެ.
މާލެ ސަރަހައްދަށް އަމާޒުކޮށް ސަރުކާރުން ކުރިއަށް ގެންދާ އަދި ރާވާފައިވާ މަޝްރޫއުތަކުގެ ތަފްސީލު، ރައީސް އިބްރާހިމް މުހައްމަދު ސޯލިހު ދެއްވީ ރައްޔިތުންގެ މަޖިލިސް މިއަހަރަށް ހުޅުވަން މިދިޔަ އޭޕްރިލް މަހު ބޭއްވި ޖަލްސާގައި އިއްވެވި ރިޔާސީ ބަޔާނުގަ އެވެ.
އެގޮތުން، ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދޭނެ ކަމަށް ރައީސް އެ ދުވަހު އިއުލާނުކުރެއްވި އެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ.
