އަންނަ ދިރާސީ އަހަރު ފެށުމުގެ ކުރިން މާލެ ޖަލު ހުސްކޮށް ގައިދީން ހުޅުމާލެ ޖަލަށް ބަދަލުކޮށް ނިންމުމަށް މަސައްކަތް ކުރަމުން އަންނަ ކަމަށް ކަރެކްޝަނުން ބުނެފި އެވެ.
މާލެ ޖަލުގައި ތިބި ގައިދީން ހުޅުމާލެ ޖަލަށް ބަދަލު ކުރާނެ ކަމަށް ބުނެފައި ވަނީ މިދިޔަ އަހަރު އެވެ.
ކަރެކްޝަންގެ މީޑިއާ އޮފިޝަލް "އަދަދު" އަށް ވިދާޅުވީ މާލެ ޖަލުގައި ތިބި ގައިދީން އެއްކޮށް ހުޅުމާލެ ޖަލަށް ބަދަލުކޮށް ނިންމައި، މާލެ ޖަލު ބަންދު ކުރުމަށް މަސައްކަތް ކުރަމުންދާ ކަމަށެވެ. އެކަން ނިންމާލެވޭނެ ސީދާ ތާރީހެއް ނޭނގުނު ނަމަވެސް, އޮފިޝަލް ވިދާޅުވި ގޮތުގައި އަންނަ އޯގަސްޓް މަހު ފެށޭ ދިރާސީ އާ އަހަރުގެ ކުރިން މަސައްކަތް ނިންމާލުމަށް އަންނަނީ މަސައްކަތް ކުރަމުންނެވެ.
ހޯމް މިނިސްޓްރީން ކުރިން ބުނެފައި ވަނީ މި އަހަރު ޖަލުގައި ތިބި ގައިދީން ބަދަލު ކުރަން ފަށާނެ ކަމަށާއި އެއާއެކު ރިމާންޑު ޖާގައަށް 400 ވަރަކަށް ޖާގަ އިތުރުކުރެވިގެންދާނެ ކަމަށެވެ.
ބައެއް މީޑިއާތަކަށް ހޯމް މިނިސްޓްރީގެ ސްޓޭޓް މިނިސްޓްރު އަލީ ނަޒީރު ވިދާޅުވެފައި ވަނީ ކުރިއަށް އޮތް ދިރާސީ އާ އަހަރުގެ ކިޔެވުން އަންނަ މަހު ފަށާއިރު، އަލަށް އަޅާ ދަރުމަވަންތަ ސްކޫލާ އިންވެގެން ހުރި މާލޭ ޖަލުގައި ގައިދީން ނުތިބޭނެ ކަމަށެވެ.
ހޯމް މިނިސްޓަރު އިމްރާން އަބްދުﷲ މީގެ ކުރިން ވިދާޅުވެފައި ވަނީ އޭގެ ސަބަބުން ރިމާންޑު ކުށްވެރިންނަށް، ގާނޫނުތަކުގައި ބުނާފަދަ ހައްގުތައް ލިބުމުގެ ފުރިހަމަ މަގު ތަނަވަސްވެގެންދާނެ ކަމަށެވެ.
"ހުކުމް ކުރެވިފައިވާ ގައިދީންނަށް އެމީހުންނަށް ލިބިދޭންޖެހޭ ހައްގުތަކާއި ފޯރުކޮށްދޭންޖެހޭ ވަސީލަތްތަކާއި، އެހީތެރިކަން ފޯރުކޮށްދިނުމުގެ މަގު ވެސް ފަހިކުރެވިގެންދާނެ, ހަމައެހެންމެ ޖަލުގެ އޮފިސަރުންނަށް، މަސައްކަތްކުރުމުގެ ފަސޭހަ މާހައުލެއް ގާއިމުކުރެވި، އޮފިސަރުންނަށް ލިބެންޖެހޭ ލުއިތައް ލިބޭނެ ގޮތްތައް ފަހިކުރެވިގެންދާނެ،" މިނިސްޓަރު ވިދާޅުވެފައިވެ އެވެ.
އެޑިޓަރުގެ ނޯޓް: މި ހަބަރުގައި މާލޭ ޖަލު ހުސްކުރުވޭނެ ދުވަހެއް ނޭނގޭ ކަމަށް ކަރެކްޝަނުން ބުނި ކަމަށް ލިޔެފައިވަނީ މައުލޫމާތުގެ އޮޅުމެއްގެ ސަބަބުންނެވެ. އެކަމަށްޓަކައި ކިޔުންތެރިން ކިބައިން މާފަށް އެދެމެވެ.
