ދަރުމަވަންތަ ސްކޫލުގެ އާ އިމާރާތް ހުންނަނީ މާލޭ ޖަލާ އިންވެގެން ކަމަށް ވުމުން، ދަރިވަރުންނަށް ނޭދެވޭ އަސަރުކުރާތީ އެ ޖަލު ހުސްކުރަން ސަރުކާރުން އަނެއްކާ ވެސް ނިންމައިފި އެވެ.
ހޯމް މިނިސްޓްރީގެ ދަށުން ހިންގާ ހުރިހާ އެެޖެންސީތައް ބައިވެރި ވެގެން އެ މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ކަރެކްޝަނަލް ސާވިސްގެ އެސިސްޓެންޓް ކަމިޝަނާ އޮފް ޕްރިޒަންސް މުހައްމަދު އާސިފު ވިދާޅުވީ މާލޭ ޖަލު ހުސްކުރުނަށް ޓަކައި އެ ޖަލުގައި ތިބި ގައިދީން ބަދަލުކުރާނީ މާފުށި ޖަލަށާއި އައްސޭރި ޖަލަށް ކަމަށެވެ. އޭނާ ވިދާޅުވީ މާލޭ ޖަލުގައި ތިބި ބައެއް ގައިދީން މާފުށި ޖަލަށް ބަދަލުކުރުމަށް ޓަކައި މާފުށި ޖަލުގެ ގައިދީންނަށް ބަދަލު ގެނެސް ޖާގަ އިތުރުކުރާނެ ކަމަށެވެ.
"އަޅުގަނޑުގެ އުއްމީދަކީ ދެވަނަ ޓާމުގެ ކިޔެވުން ފެށެން ވާއިރަށް، އަޅުގަނޑުމެން މާލޭ ޖަލު ހުސްކުރުމުގެ މަސައްކަތް ނިންމައިލުން އެއީ އަޅުގަނޑުމެންގެ ވަރަށް ބޮޑު ފޯކަސް،" އާސިފު ވިދާޅުވި އެވެ.
މާލެ ޖަލުހުސްކުރުމުގެ މަސައްކަތާ އެކު އެކުގައި ކުރިއަށް ގެންދާ އަނެއް މަސައްކަތަކީ އޭނާ ވިދާޅުވި ގޮތުގައި މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ދަނާލުގެ ކައިރީގައި ހުންނަ "އެނެކްސް ވަން" އިމާރާތަށް ބައެއް ބަދަލުތައް ގެނެއުމުގެ މަސައްކަތެވެ. އެއީ އޭނާ ވިދާޅުވި ގޮތުގައި ކޯޓަށް ހާޒިރުކުރުމަށާއި ބޭސްފަރުވާއަށް މާލެ ގެންނަ ގައިދީން ވަގުތީ ގޮތުން ބޭތިއްބުމަށެވެ.
މި ހިނގާ 2023 ވަނަ އަހަރުގެ ދިރާސީ އަހަރުގެ ކިޔެވުން ފެށުމުގެ ކުރިން މާލޭ ޖަލު ހުސް ކުރާނެ ކަމަށް މީގެ ކުރިން 2022 ވަނަ އަހަރުގައި ވެސް ސަރުކާރުން ބުނެފައިވެ އެވެ. އެފަހަރު ނިންމީ މާލޭ ޖަލުގައި ތިބި ގައިދީން ހުޅުމާލޭ ޖަލަށް ބަދަލު ކުރުމަށެވެ.
