ދިވެހި ރުފިޔާ ނިޝާނުގެ ގޮތުގައި ތާނައިގެ "ރ" އެއްގައި ހިމެނޭ ނިޝާނެއް (މޯލްޑިވްސް މަނިޓަރީ އޮތޯރިޓީ އެމްއެމްއޭ)އިން މިއަދު ތައާރަފުކޮށްފި އެވެ.
މި ނިޝާނަކީ ޑޮލަރާއި ޕައުންޑާއި ޔޫރޯގެ އިތުރުން ދުނިޔޭ އެހެން ހިސާބުތަކުގައި ބޭނުންކުރާ ފައިސާ ރަމްޒުކޮށްދޭ ނިޝާންތަކާ އެއްގޮތަށް ދިވެހި ރުފިޔާ ރަމްޒުކޮށްދޭ ނިޝާނެވެ.
އާންމުކޮށް ހުޅުވާލައިގެން ހޮވި ދިވެހި ރުފިޔާގެ ނިޝާން ފަރުމާކުރީ، މ.ސްޕޮޓްލައިޓް، ހުސެއިން ސުޖާއު އެވެ. މިދިޔަ އަހަރު މިކަމަށް ހުޅުވާލުމުން 70 ހުށަހެޅުމެއް ލިބިފައިވެ އެވެ. ސުޖާއުގެ ޑިޒައިން، ދިވެހި ފައިސާގެ ނިޝާންގެ ގޮތުގައި ކަނޑައެޅީ އެކަމަށް ހާއްސަކޮށްފައިވާ ފަންނީ ޖަޖުންގެ ޕެނަލަކުންނެވެ.
މި ނިޝާން އިންނަނީ ތާނަ އަކުރުގައި އެކުލެވޭ "ރ" އަކުރާ ދާދި އެއްކަހަލަ ގޮތަކަށެވެ. ތަފާތު ކަމަކީ މި ނިޝާންގައި ތާނަ އަކުރު "ރ" ގައި ކައްޗަށް އިތުރު އެއް ރޮނގުބުރި އިންނަ ކަމެވެ.
ރުފިޔާގެ ނިޝާން ތާރަފް ކުރުމަށް މިއަދު ބޭއްވި ރަސްމިއްޔާތުގައި އެންވަޔަރުމަންޓް މިނިސްޓަރު އައިމިނަތު ޝައުނާ ވިދާޅުވީ ދިވެހި ރުފިޔާއަށް ހާއްސަ ނިޝާނެއް ތައާރަފު ކުރުމަކީ ދިވެހިވަންތަކަމަށް އިތުރު ކުރެވޭ ކަމެއް ކަމަށެވެ.
"މި ނިޝާން ވީހާ ވެސް ފަސޭހައިން ބޭނުން ކުރެވޭނެ ގޮތްތައް ފަހިކުރުން ވަރަށް މުހިންމު. އެކަން ކުރުމަށް ޑިޖިޓަލް ޕްލެޓްފޯމުތަކުގައި ވެސް މި ނިޝާން ބޭނުން ކުރެވޭނެ ގޮތްވުން ވެސް ވަރަށް މުހިންމު،" ޝައުނާ ވިދާޅުވި އެވެ.
އެ ރަސްމިއްޔާތުގައި ވާހަކަ ދައްކަވަމުން އެމްއެމްއޭގެ ގަވަރުނަރު އަލީ ހާޝިމް ވިދާޅުވީ ދިވެހި ރުފިޔާގެ ނިޝާނަށް އާންމުން އަހުލުވެރިކޮށް، ވީހާވެސް ގިނަ ބަޔަކު ބޭނުންކުރާ އެއްޗަކަށް ހެދުމުގެ މަސައްކަތް ސަރުކާރާއެކު ފަށާފައިވާ ކަމަށެވެ.
އެގޮތުން މި ނިޝާން އިންޓަނޭޝަނަލް ފެންވަރެއްގައި ބަލައި ގަންނަ "ޔުނިކޯޑް ސްޓޭޑާޑް" ހޯދުމުގެ މަސައްކަތްތައް ކުރަމުން އަންނަ ކަމަށް ވެސް ގަވަރުނަރު ވިދާޅުވި އެވެ.
"ނިޝާން ފަރުމާކުރުމުގައި އަޅުގަނޑުމެން ބެލީ އާންމުންނަށް ފަސޭހައިން ބޭނުން ކުރެވޭނެ ފަދަ ޑިޒައިނެއް ހެދުމަށް،" ހާޝިމް ވިދާޅުވި އެވެ.
