އުރީދޫ ދިވެހި ޕްރިމިއާ ލީގުގައި މިރޭ ކްލަބް އީގަލްސް އިން 3-1 އިން ދަ ގްރާންޑޭ ސްޕޯޓްސް ކްލަބް ބަލިކޮށް، ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާ ގާތަށް ޖެހިލަައިފި އެވެ.
ލީގުގެ އެއް ވަނައިގައި މާޒިޔާ އޮތީ 14 މެޗުން 39 ޕޮއިންޓް ހޯދައިގެންނެވެ. ދެ ވަނައިގައި އީގަލްސް އޮތީ 15 މެޗުން 37 ޕޮއިންޓާ އެކު އެވެ. މާޒިޔާ އިން މާދަމާ ހަވީރު ކްލަބް ގްރީން ސްޓްރީޓްސް ބަލިކޮށްފިނަމަ ލީގުގެ އެއް ވަނައިގައި އަލުން ފަސް ޕޮއިންޓަށް ލީޑު ދެމެހެއްޓޭނެ އެވެ.
އީގަލްސް އިން މި މެޗު ފެށީ ފުރަތަމަ އެގާރައިގައި ތަޖިކިސްތާން މިޑްފީލްޑަރު ޒަރްޑިއޭވް ޖަމާލުއްދީން އާއި ރެއާލް މެޑްރިޑްގެ ސީ ޓީމަށް (ޔޫތު ޓީމަށް) ކުޅުނު ބްރެޒިލްގެ މިޑްފީލްޑަރު، ބްރޫނޯ ވިނީޝިއުސް ހިމަނައިގެންނެވެ. އެކަމަކު، ފުރަތަމަ ހާފުގައި ލިބުނު އަނިޔާއެއްގެ ސަބަބުން ޖަމާލުއްދީންގެ ބަދަލުގައި އެންހެލް މުނޯޒް ކުޅެންއެރިއިރު، ދަ ގްރާންޑޭގެ އާޖެންޓީނާގެ ފޯވާޑް ހޫގޯ ނިކޮލަސް ވެސް ވަނީ އަނިޔާގެ ސަބަބުން ފުރަތަމަ ހާފުގައި ބަދަލުކޮށްފަ އެވެ.
ގްރާންޑޭގެ ޑިފެންޑަރު އިވާން (ކ) ކައިރިން އީގަލްސްގެ ރިޒޭ ބޯޅަ ހިފައިގެންދަނީ.--- ފޮޓޯ: އިމޭޖަސް.އެމްވީ
މިރޭ އީގަލްސްގެ ފުރަތަމަ ހަމަލާ ފޮނުވާލީ އަހުމަދު ރިޒްވާން (ރިޒޭ) އެވެ. މެޗުގެ ހަތް ވަނަ މިނިޓްގައި ދަ ގްރާންޑޭގެ ދެ ކުޅުންތެރިން ކައިރިން ދެމިގަތުމަށް ފަހު އޭރިއާބޭރުން ރިޒޭ ޖެހި ބޯޅަ ދިޔައީ ހުރަސްދަނޑިމަތިންނެވެ. އެކަމަކު، އޭގެ ދެ މިނިޓް ފަހުން ރިޒޭ ދިން މޮޅު ބޯޅައަކުން ބްރޫނޯ ވަނީ ގޯލެއް ޖަހައި އީގަލްސް އަށް ލީޑުނަގައިދީފަ އެވެ. ބްރޫނޯ މި ގޯލު ޖެހީ ދަ ގްރާންޑޭގެ ކީޕަރު، ލެބަނަންގެ މުހައްމަދު ތަހާ ކައިރިން ނައްޓާފަ އެވެ.
ދަ ގްރާންޑޭ އަށް އެއްވަރުކޮށްދޭން މެޗުގެ 31 ވަނަ މިނިޓްގައި އިސްމާއިލް މަފާޒް އިބްރާހިމް ނެގި ހުރަހަކުން އެ ޓީމުގެ އިސްމާއިލް ނަޒީހު ބޮލުން ޖެހި ބޯޅަ އީގަލްސްގެ ކީޕަރު ހަސަން އަލީފް އިބްރާހިމް ވަނީ މަތަކޮށްފަ އެވެ. ދަ ގްރާންޑޭ އިން ފުރުސަތު ނަގާލިތާ ފަސް މިނިޓް ފަހުން އީގަލްސް އިން ވަނީ ރިޒޭގެ ގޯލުން ލީޑުފުޅާކޮށްފަ އެވެ. މެޗުގެ 35 ވަނަ މިނިޓްގައި ދަ ގްރާންޑޭގެ ޑިފެންޑަރުން ހެދި ގޯހެއްގެ ފައިދާނަަަގައި، ރިޒޭ މި ގޯލު ޖެހީ ދަ ގްރާންޑޭގެ ކީޕަރު ތަހާ ބޯމަތިން އޮއްސާލައިގެންނެވެ.
ދެ ވަނަ ހާފް ފަށައިގެން ދަ ގްރާންޑޭ އިން ފުރަތަމަ ހާފަށް ވުރެ ރަނގަޅަށް ކުޅުނެވެ. އެ ގޮތުން އެ ޓީމުގެ މަފާޒް އޭރިއާތެރެއަށް ބޯޅަ ހިފައިގެން ވަދެ، ޖެހި ބޯޅަ އަމާޒުވީ ގޯލުގެ އަރިމަތީ ދާގަނޑަށެވެ.
ދަ ގްރާންޑޭގެ އުސާމާ (ކ) ކައިރިން އީގަލްސްގެ ހަންނަ ބޯޅަ ހިފައިގެންދަނީ.--- ފޮޓޯ: އިމޭޖަސް.އެމްވީ
އީގަލްސް އިން ތިން ވަނަ ގޯލު ޖެހީ މެޗުގެ 84 ވަނަ މިނިޓްގަ އެވެ. ހާފުގެ މެދެއްހާ ހިސާބުން ހިލޭ ޖެހުމެއް އީގަލްސް އަށް ލިބުމުން އެ ޓީމުގެ ކެޕްޓަން، ހުސެއިން ސިފާއު ޔޫސުފް (ކުރޯ) އަވަހަށް ކުޅެ، މަތިން ރިޒޭ ހުރި ފަޅި އަށް ލި ބޯޅަ ހިފައިގެން އޭރިއާތެެރެއަށް ވަދެ އޭނާ ވަނީ ހަމަޖެހިލާފައި ގޯލަށް ބޯޅަ ވައްދާލައިފަ އެވެ.
އީގަލްސް އިން ތިން ވަނަ ގޯލެއް ޖެހިތާ މިނިޓެއް ފަހުން ދަ ގްރާންޑޭ އިން ވަނީ ގޯލެއް ޖަހައިފަ އެވެ. މެޗުގެ 86 ވަނަ މިނިޓްގައި ދަ ގްރާންޑޭގެ އަބްދުﷲ ޖުނައިދު (ޖެންނެ) ނެގި ހުރަހަކުން މަފާޒް ވަނީ އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލައިފަ އެވެ. ޖެހިގެން އައި މިނިޓްގައި ކައުންޓަ އެޓޭކަކުން ދެ ވަނަ ގޯލެއް ޖަހަން ދަ ގްރާންޑޭ އަށް ފުރުސަތެއް ލިބުނެވެ. އެ ޓީމުގެ މުހައްމަދު ލަޔާން އަހުމަދު ހުސްކޮށް އޭރިއާތެރެއަށް ވަދެ، ޖެހި ބޯޅައިގައި ބާރެއް ނެތްއިރު، ކީޕަރު އަލީފް ވަނީ ބޯޅަ އަތަށް ނަގައިފަ އެވެ.
ގްރާންޑޭ ވަނީ މި ސީޒަނުގައި އީގަލްސްއާ ދެކޮޅަށް ކުޅުނު ހަތަރު މެޗުން ވެސް ބަލިވެފަ އެވެ. ލީގުގައި ދަ ގްރާންޑޭ އެންމެ ފުލުގައި އޮތީ 15 މެޗުން އެއް ޕޮއިންޓާ އެކު އެވެ.
