އައްޑޫ ސިޓީ އަދި ދެކުނުގެ ބައެއް އަތޮޅުތަކަށް އުދަ އަރައި ގޭގެއަށް ބޮޑެތި ގެއްލުންތަކެއްވަމުން އެބަ ދެ އެވެ.
އައްޑޫ ސިޓީގެ ހުރިހާ ރަށަކަށް އުދައަރަމުންދާ ކަމަށާއި ނަމަވެސް އެންމެ ބޮޑު ގެއްލުމެއް ލިބެމުންދަނީ މަރަދުއަށް ކަމަށް އެ ސިޓީގެ މޭޔަރު އަލީ ނިޒާރު "އަދަދު" އާ ވާހަކަ ދައްކަވަމުން ވިދާޅުވި އެވެ.
"އަދި ލިބުނު ގެއްލުން ވަޒަން ކުރަން ވެސް ނޭނގޭ. އަޅުގަނޑު މިވަގުތު ވެސް މި ހުރީ އުދަ އަރާފައި އޮތް ގެއެއްގައި،" އޭނާ ވިދާޅުވި އެވެ.
އުދަ އެރި މަންޒަރު ފެނުނު، ހެރިޓޭޖް މިނިސްޓްރީގައި މަސައްކަތް ކުރައްވާ ނާޖިހް ދީދީ ވިދާޅުވީ ވަރަށް ބޮޑަށް އުދަ އެރި ކަމަށާއި ހަންކެޑެ ބްރިޖު އަޅާ ސަރަހައްދަށް ވެސް ބޮޑު ގެއްލުމެއްވި ކަމަށެވެ.
"އަދިވެސް އަރަމުންދަނީ، މަރަދޫ، ހިތަދޫ. އަޅުގަނޑު ހުއްޓާ ހަންކެޑޭ ބޭރުން ބްރިޖުން އަޅަން ހިއްކާފައި އޮތް ސަރަހައްދެއް ގިރައިގެންދިޔަ،" އޭނާ ވިދާޅުވި އެވެ.
ނާޖިހް ވިދާޅުވީ ކޮންމެ އަހަރަކު ވެސްް މި މޫސުމުގައި އައްޑުއަށް އުދަ އަރާ ކަމަށެވެ. އަދި އެކި ފަހަރު އެކި ވަރަށް ގެއްލުންވާއިރު ބައެއް ފަހަރު ބޮޑެތި ގެއްލުން ވެސް މީގެ ކުރިންވެފައިވާ ކަމަށެވެ.
"އާންމުކޮށް ފުއްޓަރު ފަރާތަށް މި މޫސުމާ ދިމާކޮށް، އެހެންޏާ ވެސް ގެއްލުންވޭ،" އޭނާ ވިދާޅުވި އެވެ.
އައްޑޫގެ އިތުރުން ތ. އަތޮޅުގެ ބައެއް ރަށްތަކަށް ވެސް ވަނީ އުދަ އަރައިފަ އެވެ. އެގޮތުން އެ އަތޮޅު ގާދިއްފުއްޓަށް ވަނީ ވަރަށް ބޮޑަށް އުދަ އަރައިފަ އެވެ.
