ރައީސް އިބްރާހިމް މުހައްމަދު ސޯލިހު ވެރިކަމުގެ ދެ ވަނަ ދައުރަކަށް ކުރިމަތިލެއްވުމަކީ އެމްޑީޕީއަށް ރަނގަޅު ގޮތެއް ނޫން ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
މަޖިލީހުގެ "އާސްކް ސްޕީކާ" ޕްރޮގްރާމްގައި, އެމްޑީޕީގެ ޕްރައިމަރީއިން ނާކާމިޔާބުވެއްޖެނަމަ އިތުރު ބޭފުޅަކަށް ތާއީދުކުރައްވާނަންތޯ ސުވާލުކުރެއްވުމުން ނަޝީދު ވިދާޅުވީ ކޮންމެ އިންތިހާބެއްގައި ވެސް ވާދަކުރައްވަނީ މޮޅުވާން ކަމަށެވެ. އެހެންކަމުން ކުރިއަށް އޮތް އިންތިހާބުން ވެސް ކާމިޔާބު ވާނެ ކަމަށް ގަބޫލުކުރައްވާ ކަމަށެވެ.
"އަޅުގަނޑަށް ފެންނަ ފެނުމުގައި ރައީސް އިބްރާހިމް މުހައްމަދު ސޯލިހު ދެ ވަނަ ދައުރަކަށް ކުރިމަތި ލެއްވުން އެއީ އެމްޑީޕީއަށް ރަނގަޅު ގޮތެއް ނޫން،" ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި 2018 ވަނަ އަހަރުގެ ރިޔާސީ އިންތިހާބުގައި ވާދަކުރެއްވުމުގެ ޝައުގާއެކު ފޮރިން މިނިސްޓަރު އަބްދުالله ޝާހިދު ބައްދަލުކުރެއްވި އެވެ. ނަމަވެސް, އެ އިންތިހާބުގައި ވާދަކުރުމަށް އެންމެ ރަނގަޅު ބޭފުޅަކީ ރައީސް ސޯލިހު ކަމަށް، ޝާހިދުގެ އަރިހުގައި ވިދާޅުވީ އެމަނިކުފާނު ކަމަށް ނަޝީދު ވިދާޅުވި އެވެ.
އެހެންނަމަވެސް, ޝާހިދަކީ ވެސް ވެރިކަން ކުރުމުގެ ހުރިހާ ރުކުނެއް ފުރިހަމަވާ ބޭފުޅެއް ކަން ގަބޫލުކުރައްވާ ކަމަށް ނަޝީދު ވިދާޅުވި އެވެ.
"ދެން މި ކުރިއަށް އޮތް ތަނުގައި ރިޔާސީ ކެންޑިޑޭޓެއްގެ ގޮތުގައި އެމްޑީޕީން ނިކުންނާނީ ތިން ވަނަ ބޭފުޅެއްތޯ އެ ސުވާލު އެމްޑީޕީ ހުރިހާ މެންބަރުން ވެސް ކުރައްވާނެ، އަޅުގަނޑު ގަބޫލުކުރަނީ މި ސުވާލުތަކުގެ ޖަވާބު ކުރިއަށް މިއޮތް ހަފްތާތަކުގެ ތެރޭގައި ލިބޭނެ،" ނަޝީދު ވިދާޅުވި އެވެ.
ދެ ވަނަ ދައުރެއްގެ ޝައުގު ރައީސް ފާޅުކުރެއްވި
އެމްޑީޕީގައި ދެ ފެކްޝަނެއް ވަނީ އުފެދިފަ އެވެ. އެމްޑީޕީގެ ރައީސް ނަޝީދު އިތުރުން ރައީސް ސޯލިހު ވެސް ހުންނެވީ ރިޔާސީ ރޭހަށް ނުކުންނަވާ ގޮތަށެވެ.
އެންމެ ފަހުން ރައީސް ސޯލިހު ބޭއްވެވި ނޫސްވެރިންގެ ބައްދަލުވުމުގައި ރައީސް ވަނީ ދެ ވަނަ ދައުރަކަށް ޝައުގުވެރިކަން ހުރިކަން ހާމަކުރައްވާފަ އެވެ. އަދި ވިދާޅުވީ, އެމަނިކުފާނަކީ އަންނަ އިންތިހާބު އެމްޑީޕީއަށް ކާމިޔާބު ކުރުމަށް "ޗޮއިސް" ކަމަށެވެ.
ރައީސް ސޯލިހު ވިދާޅުވީ، އަންނަ ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރާނެ ކެނޑިޑޭޓު ކަނޑައަޅާނީ ޕާޓީގެ ކޮންގްރެސްއިން ކަމަށެވެ.
އެމްޑީޕީގެ އެ ދެ ލީޑަރުންގެ މެދުގައި ހިޔާލު ތަފާތުވުންތައް އިތުރުވެފައިވާއިރު، ނަޝީދު ބޭނުންފުޅު ވަނީ ބަރުލަމާނީ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލު ކުރުމަށް ފަހު އެމަނިކުފާނު ބޮޑުވަޒީރަކަށް ވުމަށެވެ. އެކަން ނުވާނަމަ 30 ޕަސެންޓު ވޯޓުން ރާއްޖޭގެ ރައީސް ކަމަށް އާދެވޭ ގޮތަށް ގާނޫނު އަސާސީ އިސްލާހު ކުރުމަށާއި، އެމްޑީޕީގެ ރިޔާސީ ޕްރައިމަރީއަށް ނުކުންނަވަން ނަޝީދު ބޭނުންފުޅުވެ އެވެ.
