ވިލާ ކޮލެޖުގައި ސެޕްޓެމްބަރު މަހު ފަށާ ކޯސްތަކުގައި ބައިވެރިވުމުގެ ފުރުސަތު ހުޅުވާލައިފި އެވެ.
ރާއްޖޭގެ އެންމެ ބޮޑު ޕްރައިވެޓް ކޮލެޖުގެ ސެޕްޓެމްބަރު މަހުގެ އިންޓޭކުގައި ޖުމްލަ 127 ކޯހެއް ފަށާއިރު، އޭގެ ތެރޭގައި މާސްޓާސް ފެންވަރުގެ 16 ކޯހާއި، ޕޯސްޓް ގްރެޖުއޭޓް ޑިޕްލޮމާ/ ސެޓްފިކެޓް ފެންވަރުގެ 9 ކޯހަކާއި، ޑިގްރީ ފެންވަރުގެ 36 ކޯހަކާއި، ޑިޕްލޮމާ ފެންވަރުގެ 26 ކޯހާއި ފައުންޑޭންޝަން ފެންވަރުގެ 17 ކޯހެއް ހިމެނެ އެވެ. އަދި ސެޓްފިކެޓް 3 ފެންވަރުގެ 16 ކޯހަކާއި ސެޓްފިކެޓް 2 ގެ އެއް ކޯސް ފެށުމަށް ވަނީ ހަމަޖެހިފައެވެ.
އޭސީސީއޭގެ ކޯސްތަކާއި އޭސީސީއޭ ކިޔަވާ ދަރިވަރުންނަށް އެކްސެލެރޭޓް އަދި އޮކްސްފޯޑް ބްރުކްސް ޔުނިވާސިޓީގެ ބީއެސްސީ އޮނާސް އިން އެޕްލައިޑް އެކައުންޓިން ކޯހުގެ ފުރުސަތު ވެސް ވަނީ ހުޅުވާލައިފަ އެވެ. ޗާޓަޑް އިންސްޓިޓިއުޓް އޮފް މެނޭޖްމަންޓް އެކައުންޓެންޓްސް (ސީމާ) ގެ ސެޓްފިކެޓް ލެވެލް، ޕްރޮފެޝަނަލް ލެވެލް، މެނޭޖްމެންޓް ލެވެލް އަދި ކެޓްގެ ލެވެލް 1، 2، 3 އަށް ކިޔަވައި ދިނުމަށް ވަނީ ނިންމައިފަ އެވެ.
ދަރިވަރުން އަތުން އެއްވެސް ފައިސާއެއް ނުނަގައި ކިޔަވައިދޭ ކޯސްތައް ވެސް ސެޕްޓެމްބަރުގައި ފަށަ އެވެ. އެއީ ސްކިލްސް ފޯ ރެޒިލިއަންޓް ވޯކް ފޯސްގެ ދަށުން ހިންގާ ހައުސް ކީޕިން، އިންވެންޓްރީ މެނޭޖުމެންޓު ވޯޓާ ސްޕޯޓްސް އާއި ޓިކެޓިން އަދި ރިޒަވޭޝަނާއި ޓުއާ ގައިޑް ފަދަ ކޯސްތަކެކެވެ. އޭގެ އިތުރުން ޔުނިވާސަލް ފައުންޑޭޝަންއިން ހިންގާ ޓޫރިޒަމް ދާއިރާއަށް 50 ޒުވާނުން ތަމްރީނުކުރުމުގެ ޕްރޮގްރާމެވެ.
ކޯސްތަކުގައި ބައިވެރިވުމުގެ ފަހު މުއްދަތަކީ އޯގަސްޓް 11 އެވެ. މި އިންޓޭކުގެ ކޯސްތައް އޮންލައިންކޮށާއި، ހައިބްރިޑް އަދި ފޭސް ޓު ފޭސްކޮށް ކުރިއަށް ގެންދެ އެވެ.
ވިލާ ކޮލެޖުގެ ދަރިވަރުން ފީ ދެއްކުމަށް ލުއި ފަސޭހަ ކުރުމަށްޓަކައި ސެމިސްޓާގެ ފީ އެއްފަހަރާ ދެއްކުމުގެ ބަދަލުގައި މަހުން މަހަށް ދެއްކުމުގެ ފުރުސަތު ވެސް ލިބޭނެ ކަމަށް ކޮލެޖުން ބުނެ އެވެ. އަދި ސަރުކާރުގެ ހިލޭ ސަރުކާރުން ހަމަޖައްސާފައިވާ ފުރަތަމަ ޑިގްރީއަށް ހިލޭ ކިޔެވުމުގެ ސްކީމުގެ ދަށުން ވެސް ވިލާ ކޮލެޖްގެ ކޯސްތަކުގައި ކިޔެވޭނެ އެވެ.
