ސްވިޑަން އާއި ފިންލޭންޑް ނޭޓޯއާ ގުޅުމަށް ތާއީދު ކުރާ ކަމަށް ތުރުކީއިން އެންމެ ފަހުން ބުނެފި އެވެ.
އެ ދެ ގައުމުން ނޭޓޯއާ ގުޅެން ބޭނުންވާކަން އިއުލާން ކުރުމާ އެކު ތުރުކީއިން އެންމެ ފުރަތަމަ އެކަމާ ދެކޮޅު ހެދި އެވެ.
އެގޮތުން އެ ދެ ގައުމުން ޓެރަރިޒަމަށް ތާއީދު ކުރާ ކަމަށް ތުހުމަތު ކުރި އެވެ. އެގޮތަށް ބުނީ ތުރުކީގައި ހަރަކާތްތެރިވާ ކުރުދީ ހަނގުރާމަވެރިންނަށް އެ ދެ ގައުމުގައި މިނިވަންކަމާ އެކު އުޅުމުގެ ފުރުސަތު ދޭތީ އެވެ.
ސްވިޑަން އާއި ފިންލޭންޑް ނޭޓޯއާ ގުޅުމާ މެދު ރަޝިއާއިން ހިތްހަމަނުޖެހެ އެވެ. ރަަޝިއާއިން ޔޫކްރެއިންގައި ހަނގުރާމަ ފެށީ ވެސް ނޭޓޯ ފުޅާ ކުރަން އުޅޭ މައްސަލައިގަ އެވެ.
ޔޫކްރެއިނަށް ނޭޓޯގެ މެމްބަރުކަން ދިނުން ހުއްޓުވުމުގެ މަގްސަދުގައި ހަނގުރާމަ ފެށި ނަމަވެސް، މިހާރު އުތުރު ޔޫރަޕްގެ ދެ ގައުމެއް މި ވަނީ އެ އަސްކަރީ ކޯލިޝަނާ ގުޅެން ނިންމާފަ އެވެ.
އަަންގާރަ ދުވަހު ތުރުކީ އާއި ސްވިޑަން އަދި ފިންލޭންޑްގެ ފޮރިން މިނިސްޓަރުން ވަނީ ސެކިއުރިޓީއާ ގުޅޭ އެއްބަސްވުމެއްގައި ސޮއިކޮށްފަ އެވެ.
ނޭޓޯގެ ސެކެޓްރީ ޖެނެރަލް ޖެންސް ސްޓޮލްޓެންބާގް ވިދާޅުވީ ހަނގުރާމަވެރިން ކަމަށް ބެލެވޭ މީހުން ތުރުކީއަށް ފޮނުވުމުގެ މަސައްކަތް ވަރުގަދަ ކުރަން ސްވިޑަންއިން އެއްބަސްވި ކަމަށެވެ.
އޭގެ އިތުރުން ތުރުކީއަށް ހަތިޔާރު ވިއްކުމާ ދެކޮޅަށް އެ ދެ ގައުމުން އަޅާފައިވާ ފިޔަވަޅުތައް އުވާލަން ވެސް އެއްބަސްވެފައިވެ އެވެ.
ތުރުކީގެ ރައީސް ތައްޔޮބް އުރުދުގާންގެ އޮފީހުން ބުނީ އެ ގައުމުން ބޭނުންވި ކަންކަން ހާސިލްވެއްޖެ ކަމަށެވެ.
ނޭޓޯގައި ބައިވެރިވުމަށް އެދި ފިންލޭންޑާއި ސްވިޑަންގެ ފަރާތުން ފޯމު ހުށަހެޅީ އެ ދެ ގައުމުގެ ސަފީރުން، ނޭޓޯގެ މައި މަރުކަޒަށް ވަޑައިގެން، ސްޓޮލްޓެންބާގްއާ ބައްދަލުކުރެއްވުމަށް ފަހު މޭ މަހު އެވެ.
މީގެ ކުރިން މި ދެ ގައުމަކީ އަސްކަރީ ގޮތުން ވަކި އަތަކަށް ނުޖެހޭ ދެ ގައުމެވެ.
ނަމަވެސް ޔޫރަޕްގެ އެންމެ އުތުރުގައި އޮންނަ ދެ ގައުމުގެ ޒަމާންވީ ވިސްނުން ބަދަލުވީ ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުންނެވެ.
