ލަންޑަން (ޖޫން 27) - އެމެރިކާގެ މަހުޖަނު ޓޮޑް ބޯލީ، ޗެލްސީ ގަތުމަށް ފަހު އޭނާގެ ލީޑަޝިޕުން ބޭނުންވާ ބަދަލުތައް ގެންނަން ފުރުސަތު ދޭން ޗެލްސީގެ ޓެކްނިކަލް އެންޑް ޕާފޯމަންސް އެޑްވައިޒަރުގެ މަގާމު ދޫކޮށްލަން ކުރީގެ ކީޕަރު ޕީޓަ ޗެކް ނިންމައިފި އެވެ.
ބޯލީގެ ޓީމުން އަންނަނީ ޗެލްސީ ހިންގާ މޮޑެލަށް ބަދަލުތަކެއް ގެންނަން ނިންމައިފަ އެވެ. އޭގެ ފިޔަވަޅުތަކަށް ފުރުސަތު ދޭން ޗެލްސީގެ ޗެއާމަން ބްރޫސް ބަކް އާއި ޑިރެކްޓަރު މަރީނާ ގްރަނޯސްކާއިއާ އަދި ޗެކް ވަނީ މި މަހުގެ ނިޔަލަށް ޗެލްސީގެ މަގާމުތައް ދޫކޮށްލަން ނިންމައިފަ އެވެ.
"މިދިޔަ ތިން އަހަރު ޗެލްސީ އަށް ހިދުމަތްކުރަން މި ލިބުނު ފުރުސަތު ފަހުރުވެރިކަމާ އެކު ފާހަގަކުރަން. މި ކްލަބް މިހާރު މި ހިންގަމުން އަންނަ އާ ލީޑަޝިޕުން ބޭނުންވާ ގޮތަށް ކްލަބް ހިންގަން އަހަންނަށް އެންމެ ރަނގަޅު ގޮތަކީ އެއްކައިރިވެލުން. އެހެންވެ، މަގާމު ދޫކޮށްލަން ނިންމައިފިން،" ޗެކް، 40، ޗެލްސީ ދޫކޮށްލާކަން ކަށަވަރުކޮށްދެމުން ބުނެފައިވެ އެވެ.
ޔޫކްރެއިން ހަނގުރާމަ މައްސަލައިގައި ރަޝިއާގެ މަހުޖަނު، ރޯމަން އަބްރަމޮވިޗަށް ކުރިމަތިވި ސިޔާސީ ފިއްތުންތަކާ ހެދި ޗެލްސީ ވިއްކާލަން ޖެހުނުއިރު، ދިގު މުއްދަތަކަށް ފަހު އެކަން ނިމުނީ މިދިޔަ މަހު ފަހުކޮޅުގަ އެވެ.
ޗެލްސީގެ އާ ވެރިންގެ ބެލުމުގެ ދަށުން ކްލަބްގެ އޮނިގަނޑަށް ގެންނަން ނިންމާފައިވާ ބަދަލުތަކުގެ ހެޔޮ ނަތީޖާ ފެންނާނެ ކަމުގެ އުންމީދު އެބައޮތް ކަމަށް ޗެކް ވަނީ ބުނެފަ އެވެ.
ޗެލްސީން އެންމެ ފުރަތަމަ ޗެކްގެ ސޮއި ހޯދީ 2004 ވަނަ އަހަރު، ހޯސޭ މޮރީނިއޯގެ ކޯޗުކަމުގަ އެވެ. އެ ޓީމަށް 11 އަހަރު ކުޅެދިނުމަށް ފަހު ޗެކް ވަނީ 2015 ވަނަ އަހަރު އާސެނަލަށް ބަދަލުވެފަ އެވެ. ވިހި އަހަރު މަތީ ފަންތީ ފުޓްބޯޅަ ކުޅުމަށް ފަހު ޗެކް ކުޅުމުން ރިޓަޔާކުރީ 2019 ވަނަ އަހަރު އެވެ.
އޭގެ ފަހުން، ޗެލްސީގެ ސްޕޯޓިން އެންޑް ޕާފޯމަންސްގެ މަގާމުގެ ޒިންމާއާ ހަވާލުވެ، މިހާތަނަށް އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ޓީމުގެ ކުޅުންތެރިންގެ ޕާފޯމަންސް އެނަލައިޒްކުރުމާއި ޓްރާންސްފާ މާކެޓްގައި ކްލަބަށް ބޭނުންވާ ކުޅުންތެރިން ދެނެގަތުމުގައި ޓެކްނިިކަލް ޓީމަށް އެހީތެރިކަން ފޯރުކޮށްދިނެވެ.
