ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންނަވައި ހިންގަވާ "އިންޑިއާ އައުޓް" ހަރަކާތް ހުއްޓުވުމަށް ގާނޫނީ ގޮތުން ހުރަސްތަކެއް ހުރިނަމަ، އެކަން ހައްލުކުރުމަށް ކަމާ ގުޅޭ ގާނޫނުތައް އިސްލާހު ކުރުމަށް ރައްޔިތުންގެ މަޖިލީހަށް ހުށަހެޅުމަށް ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ)އިން ނިންމި ނިންމުން މަޖިލީހުން މިއަދު ފާސްކޮށްފި އެވެ.
"އިންޑިއާ އައުޓް" ކެމްޕޭނާ މެދު ކަންބޮޑުވުން ފާޅުކުރައްވައި މަޖިލީހުގެ ރައީސް މުހައްމަދު ނަޝީދު ހުށަހެޅުއްވި މައްސަލަ ފުޅާ ދާއިރާއެއްގައި ބަލަން އެ ކޮމިޓީއަށް ހުށަހެޅުއްވީ ވެސް އެމަނިކުފާނެވެ.
މި މައްސަލަ ދިރާސާކުރުމަށް ފަހު، ކޮމިޓީން އެކުލަވާލާފައިވާ ރިޕޯޓުގައި، ކޮމިޓީގެ ހޯދުންތަކުގެ ތެރޭގައި 24 ކަމެއް ވަނީ ހިމަނާފައިވެ އެވެ.
ކޮމިޓީ ރިޕޯޓުގައި އިންޑިއާއާ ދެކޮޅަށް ހިންގާ ކެމްޕޭނަކީ ރާއްޖޭގެ ސުލްހަ މަސަލަސްކަން ނަގައިލުމުގެ ނިޔަތުގައި، ރާއްޖެއާއި އިންޑިއާއާއެކު އޮތް ޒަމާންވީ ބަދަހި ގުޅުމަށާއި ރާއްޖޭގެ ތަރައްގީއަށާއި މި ސަރަހައްދުގެ ސަލާމަތާއި ހަމަޖެހުމާއި އަމާންކަން ދެމެހެއްޓުމަށް ބައިނަލްއަގުވާމީ ފެންވަރުގައި ކުރަމުން އަންނަ މުހިންމު މަސައްކަތަކަށް ހުރަސްއެޅުމަށް ރާވައިގެން ހިންގަމުންގެންދާ ކެމްޕޭނެއް ކަން އެނގޭ ކަމަށް ބުނެފައިވެ އެވެ.
އަދި، މި ކެމްޕެއިނުގެ ސަބަބުން ދެ ގައުމަށް ވެސް އޭގެ ނޭދެވޭ އަސަރު ކުރާ ކަން ފާހަގަކޮށްފައިވެ އެވެ. މިގޮތުން، މިކަމަކީ ރާއްޖޭގެ އިގުތިސޯދީ ރައްކާތެރިކަމާއި އިޖްތިމާއީ ނިޒާމުތަކަށް ބޮޑު ބުރައެއް އުފުލަންޖެހޭނެ ކަމެއްކަމުގައި ގަބޫލުކުރެވޭ ކަމަށް ރިޕޯޓުގައި ފާހަގަކޮށްފައިވެ އެވެ.
ކޮމިޓީގެ ރިޕޯޓު މަޖިލީހުން މިއަދު ފާސްކޮށްފައިވަނީ 33 މެންބަރުންގެ އިއްތިފާގުންނެވެ.
މި ކެމްޕެއިން ހުއްޓުވަން ދިމާވާ ގާނޫނީ ހުރަސްތައް ނައްތާލަން މަޖިލީހުން މިއަދު ފާސްކުރިއިރު، ރާއްޖޭގެ ހާރިޖީ މަސްލަހަތަށް ގެއްލުން ދިނުމަކީ ޖިނާއީ ކުށަކަށް ހެދުމަށް ގާނޫނަށް އިސްލާހު ގެނައުމަށް، އެޓާނީ ޖެނެރަލްގެ އޮފީހުން ރައީސް އޮފީހަށް ބިލެއް ވަނީ ފޮނުވާފަ އެވެ.
