ގާނޫނުއަސާސީގައި ބަޔާންކޮށްފައިވާ ގޮތުގެ މަތީން، ވަޒީރުން ރައްޔިތުންގެ މަޖިލީހަށް ހާޒިރުކޮށް ކުރާ ސުވާލުތަކަށް ދޭ ޖަވާބަކާ ގުޅިގެން، އިތުރު ސުވާލު ކުރަން ލިބޭ ވަގުތު 30 މިނެއްޓާ ހަމައަށް އިތުރުކުރަން މަޖިލީހުގެ ކަމާގުޅޭ ކޮމިޓީން ފާސްކުރި އިސްލާހު މަޖިލީހުން މިއަދު ފާސްކޮށްފި އެވެ.
މަޖިލީހުގެ ގަވައިދުގައިވާ ގޮތުން، ނޯޓިސްް ފޮނުވައިގެން ކުރާ ސުވާލަކަށް ވަޒީރަކު ދޭ ޖަވާބަކާ ގުޅިގެން ނުވަތަ އޭނާއާ ކުރެވުނު ސުވާލަކާ ގުޅިގެން ނޯޓިސް ދިނުމެއްނެތި އަނގަބަހުން އިތުރު ސުވާލުކުރުމުގެ ފުރުސަތު ސުވާލުކުރި މެމްބަރަށާއި އެހެން މެމްބަރުންނަށް ލިބިގެންވެ އެވެ.
މިގޮތުން ދެވޭ ފުރުސަތުގައި ސުވާލެއް ކުރަން ކޮންމެ މެމްބަރަކަށް 45 ސިކުންތު ލިބޭއިރު، ވަޒީރަކާ އިތުރު ސުވާލު ކުރުމާއި، ޖަވާބުދިނުމުގެ ވަގުތު ކުރިއަށް ގެންދާނީ، ގިނަވެގެން 20 މިނެއްޓު ވަންދެން ކަމަށް އެ ގަވައިދުގައި ވަނީ ބަޔާންކޮށްފަ އެވެ.
ނަމަވެސް، ވަޒީރުންނާ އިތުރު ސުވާލު ކުރަން ވަގުތު ދިނުމާ ގުޅޭގޮތުން ބައެއް މެމްބަރުންގެ ކަންބޮޑުވުންތަކާއެކު، އެކަން ބެލުމަށް ކޮމިޓީއަށް ފޮނުއްވީ މަޖިލީހުގެ އަމީންއާންމެވެ.
ކޮމިޓީގެ އިއްތިފާގުން ފާސްކުރީ ވަޒީރުންނާ އިތުރު ސުވާލު ކުރުމުގެ ވަގުތު ޖުމްލަ 30 މިނެއްޓާ ހަމައަށް ކުރިއަށް ގެންދެވޭ ގޮތަށް ބަދަލުކުރުމަށެވެ.
ކޮމިޓީގެ ރިޕޯޓަށް ހެންވޭރު ދެކުނު ދާއިރާގެ މެމްބަރު. ހުސައިން ޝަމީމް ވަނީ މި 30 މިނިޓު ގުނަން ފަށާނީ ނޯޓިސް ދިން ސުވާލަށް ޖަވާބު ދީ ނިމޭ ހިސާބުން ކަމަށް ހުށަހަޅާފަ އެވެ. މި އިސްލާހަށް ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގް ވަނީ ތާއީދުކުރައްވާފަ އެވެ.
މި ހުށަހެޅުމާއެކު، ރައްޔިތުންގެ މަޖިލީހުގެ ޖަލްސާގައި މިއަދު ނެގި ވޯޓުގައި މި އިސްލާހު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 31 މެންބަރުންގެ އިއްތިފާގުންނެވެ.
