ޗައިނާގެ ބެލްޓް އެންޑް ރޯޑް މަޝްރޫއާ ވާދައަށް ޖީ7 އިން ހެދި ޕްލޭންގެ ދަށުން ތަަރައްގީވަމުންދާ ގައުމުތަކަށް 600 ބިލިއަން ޑޮލަރުގެ ފަންޑުން ހޭދަކުރާނެ ގޮތުގެ ތަފްސީލް ނިންމައިފި އެވެ.
ޕާޓްނާޝިޕް ފޯ ގްލޯބަލް އިންފްރާސްޓްރަކްޗާ އެންޑް އިންވެސްޓްމަންޓް (ޕީޖީއައިއައި) ގެ ދަށުން އެންމެ ފުރަތަމަ އެ ސްކީމް ލޯންޗު ކުރީ މިދިޔަ އަހަރުގެ ޖީ7 ގެ ބައްދަލުވުންތަަކުގަ އެވެ.
އެ ސްކީމްގެ ތަފްސީލްތައް ނިންމާފައިވާ އިރު، އެމެރިކާގެ ރަައީސް ޖޯ ބައިޑެން ވިދާޅުވީ އޭގެން ހުރިހާ އެންމެންނަށް ވެސް ފައިދާ ވާނެ ކަމަށެވެ.
ޗައިނާއިން ފެށި ބެލްޓް އެންޑް ރޯޑް މަޝްރޫއުގެ ސަބަބުން ގައުމުތައް ދަރަނީގެ ދަންތުރައެއްގައި ބެދޭ ކަމަށް ހުޅަނގުގެ ގައުމުތަކުން ތުހުމަތު ކުރެ އެވެ.
"މިއީ އެހީއެއް ނުވަތަ ހިލޭ ސާބަހަށް ދޭ ފައިސާއެއް ނޫން. އެކަން ސާފު ވާން ޖެހޭ. މިއީ ހުރިހާ އެންމެންނަށް ވެސް ފައިދާ ވާނެ އިންވެސްޓްމަންޓެއް،" ބައިޑެން ވިދާޅުވި އެވެ.
އެ ސްކީމްގެ ސަބަބުން "ޑިމޮކްރަސީތަކާ ގުޅުން ބަދަހި ކުރުމުގެ ފައިދާ ގައުމުތަކަށް ފެންނާނެ" ކަމަށް ބައިޑެން ވިދާޅުވި އެވެ.
ލީޑަރުން ނިންމި ރޭވުމުގެ ދަށުން ޖީ7 ގައުމުތަކުން ފަސް އަހަރުގެ ތެރޭގައި 600 ބިލިއަން ޑޮލަރުގެ ފަންޑެއް ގާއިމްކުރަން ޖެހެ އެވެ. އެ ފަންޑުން މަޝްރޫއުތައް ހިންގާނީ ތަރައްގީވަމުންދާ ގައުމުތަކުގަ އެވެ.
އެމެރިކާއިން ވައުދުވީ 200 ބިލިއަން ޑޮލަރު ހޯދުމަށެވެ. ޔޫރަޕިއަން ޔޫނިއަން (އީޔޫ) އިން ވައުދުވީ 300 ބިލިއަން ޑޮލަރު ހޯދުމަށެވެ.
އެ ފަންޑުގެ ދަށުން ހިންގާ މަޝްރޫއުތަކުގެ އަމާޒަކީ ސިއްހީ ދާއިރާ އާއި ޖިންސުގެ ހަމަހަމަކަަން ކުރިއަރުވައި، މޫސުމީ ބަދަލުން ކުރާ އަސަރު ކުޑަކޮށް، ޑިޖިޓަލް އިންފްރާސްޓްރަކްޗާ ބިނާ ކުރުމެވެ.
