ޖަޕާނުގެ ވެރިރަށް ޓޯކިޔޯ އާއި ވަށައިގެންވާ ސަރަހައްދުގައި ދިރިއުޅޭ މީހުން ކަރަންޓު ބޭނުން ކުރުން މަދު ކުރަން ސަރުކާރުން އެދެފި އެވެ.
މިނިސްޓްރީ އޮފް އިކޮނޮމީ، ޓްރޭޑް އެންޑް އިންޑަސްޓްރީން ބުނީ ބައެއް ހިސާބުތަކަށް ވަރަށް ބޮޑަށް ހޫނުވަމުން ދާތީ ހޯމަ ދުވަހު މެންދުރު ފަހު ކަރަންޓުގެ ޑިމާންޑް ވަރަށް ބޮޑަށް އުފުލޭނެ ކަމަށް ލަފާ ކުރެވޭ ކަމަށެވެ.
އެހެންވެ، ބޭކާރުކޮށް ބޮކިތައް ނުދިއްލުމަށް އެދުނެވެ. ނަމަވެސް މާ ބޮޑަށް ހޫނުވާ ނަމަ ހީޓްސްޓްރޯކް ފަދަ ސިއްހީ މައްސަލަތަކުން ދުރުވުމަށް އޭސީ ޖެއްސުމަށް ވެސް އެދުނެވެ.
ޖަޕާނުގައި ހޫނު ވާން ފެށުމާ އެކު ކަރަންޓުގެ ޑިމާންޑް ވަރަށް ބޮޑަށް އުފުލޭނެ ކަމަށް އޮފިޝަލުން ބުނަމުން ދާތާ ހަފްތާތަކެއް ވެއްޖެ އެވެ.
ފާއިތުވި ހަފްތާ ބަންދުގައި ޓޯކިޔޯގެ މެދުތެރޭގައި ފިނިހޫނުމިން 35 ޑިގްރީ ސެލްސިއަސްއަށް އެރި އެވެ. ޓޯކިޔޯގެ ހުޅަނގު އުތުރުން އޮންނަ އިސެސާކީ ސިޓީއަށް ރެކޯޑް މިންވަރަށް ހޫނުވެ، 40.2 ޑިގްރީ ސެލްސިއަސްއަށް އެރި އެވެ. އެއީ ޖޫން މަހުގައި ޖަޕާނުގައި ރެކޯޑް ކުރި އެންމެ ހޫނު ޓެމްޕެރޭޗާ އެވެ.
ޖަޕާނުގެ ހޫނު މޫސުން އާއްމުކޮށް ފަށަނީ ޖޫން މަހު އެވެ. އެ މަހު އާއްމުކޮށް ފިނިހޫނުމިން ހުންނަނީ 30 ޑިގްރީ ސެލްސިއަސްއަށް ވުރެ ދަށުގަ އެވެ.
