ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ޔޯގާއަށް ތާއިދު ކުރެއްވި މައްސަލަ ރައްޔިތުންގެ އިއްތިހާދުގެ ފަރާތުން ފުލުހަށް ހުށަހަޅައިފި އެވެ.
ރައްޔިތުންގެ އިއްތިހާދުން މި މައްސަލަ ފުލުހަށް ހުށަހަޅަފައި ވަނީ، ނަޝިދު ދެއްކެވި ވާހަކައަކީ ދީނީ އެއްބައިވަންތަކަމުގެ ގާނޫނާއި ގާނޫނުއަސާސީ އާއި އެނޫން ވެސް ދީނީ މަސްލަހަތުތަކާ ފުށުއަރާ ކަމެއް ކަމަށް ބުނެ އެވެ. އެ އިއްތިހާދުން ފުލުހަށް ފޮނުވި ސިޓީގައި ނަޝީދުގެ މައްސަލަ ތަހުގީގުކޮށް، އެމަނިކުފާނުގެ މައްޗަށް ދައުވާ އުފުލައިދިނުމަށް އެދިފައިވެ އެވެ.
ޔޯގާ އާއި ކަސްރަތު ކުރުމަކީ އިސްލާމްދީނާ ހިލާފު ކަމެއް ކަމަށް ކަނޑައަޅައި، ދިވެހިންގެ އާންމު ދިރިއުޅުމަށް ބުރޫއަރާގޮތަށް ކަންކަން ކުރަން ފެށުމަކީ ގައުމު ހާލަކުގެ މިސްރާބަށް ދާނެ ކަމެއް ކަމަށް ނަޝީދު ވިދާޅުވީ އެމްޑީޕީގެ 17 ވަނަ އަހަރީ ދުވަހުގެ މުނާސަބަތުގައި ބޭއްވި ދިދަ ނެގުމުގެ ހަފްލާގައި ވާހަކަ ދައްކަވަމުންނެވެ. ނަޝީދު ވިދާޅުވީ އެފަދަ ކަންކަމުގައި އެހެން ގައުމުތައް ބާކީވެ، އެކަހެރިވެގެން ހަލާކުގެ އައްސޭރިއަށް ދިޔަ މަންޒަރު ފެނިގެން ގޮސްފައިވާ ކަމަށެވެ.
އެމަނިކުފާނު ވިދާޅުވި ގޮތުގައި ރާއްޖެ ވެސް ހަލާކުގެ އައްސޭރިއަށް ދިއުމަށް ޖާގަ ދެވިގެން ނުވާނެ އެވެ. އަދި ދިވެހިން އެދޭ ފަދަ ރާއްޖެއަށް ގާއިމުކޮށް ދިނުމަކީ އެމްޑީޕީގެ އަބަދުވެސް އަމާޒު ކަމަށާއި، އެކަން ރައްޔިތުންނަށް ހާސިލުކޮށް ދިނުމަށްޓަކައި އެ ޕާޓީން ފަހަތަށް ނުޖެހޭނެ ކަމުގެ ޔަގީންކަން ނަޝީދު ދެއްވި އެވެ.
ނަޝިދު މިހެން ވިދާޅުވެފައިވާއިރު، ޔޯގާއަކީ ހަރާމް އެއްޗެއް ކަމަށާއި އެއީ ހިންދޫ ދީނުގެ އަޅުކަމުގެ ތެރޭގައި ހިމެނޭ ކަމެއް ކަމަށް ބުނެ، އެ ހަރަކާތް ހިންގާ ފަރާތްތަކާމެދު ފިޔަވަޅު އަޅައި ދިނުމަށް އެދި އިސްލާމިކް މިނިސްޓްރީން ވަނީ މިމަހު 16ގައި ފުލުހުންނަށް ސިޓީއެއް ފޮނުވާފަ އެވެ.
ރާއްޖޭގެ ދީނީ އެއްބައިވަންތަކަމުގެ ގާނޫނުގައިވާ ގޮތުން މިފަދަ ދީނީ ހިޔާލުތަފާތުވުންތައް ހިމެނޭ މައްސަލަތަކުގައި މިނިސްޓްރީން އަމަލު ކުރަން ޖެހޭ ގޮތަކީ ފަތުވާ މަޖިލީހުގެ ބަހެއް ހޯދުމެވެ. ނަމަވެސް، ޔޯގާ މައްސަލަގައި އިސްލާމިކް މިނިސްޓްރީން ފަތުވާ މަޖިލީހުގެ ބަހެއް ހޯދާފައި ނުވާކަން ވަނީ ހާމަވެފަ އެވެ.
