ކާބުލް، އަފްގާނިސްތާން (ޖޫން 25) - އެމެރިކާއިން ހިންގާ އަނިޔާވެރި ގުއަންޓަނާމޯ ބޭ ޖަލުގައި 15 އަހަރު ހޭދަކުރި އަފްގާން މީހަކު މިނިވަން ކުރުމުން އޭނާއަށް ބަތަލެއްގެ މަރުހަބާ ކިޔައިފި އެވެ.
ކިއުބާގައި ހުންނަ ޖަލުގައި އަސަދުﷲ ހާރޫން ހޭދަކުރި މުއްދަތުގައި އެއްވެސް ދައުވާއެއް އުފުލާފައެއް ނުވެ އެވެ. މާމުއިގެ ވިޔަފާރި ކުރުމަށް ޕާކިސްތާނާއި އަފްގާނިސްތާނާ ދެމެދު ގަވާއިދުން ދަަތުރު ކުރަމުން ދަނިކޮށް އޭނާ ހައްޔަރު ކުރީ 2006 ވަނަ އަހަރު އެވެ.
އެމެރިކާއިން ތުހުމަތު ކުރި ގޮތުގައި އޭނާއަކީ އަލްގައިދާއާ ގުޅުން ހުރި މީހެކެވެ. އަދި ހެޒްބޭ އިސްލާމީ ހަނގުރާމަވެރި ގްރޫޕުގެ ކޮމާންޑަރެއްގެ ގޮތުގައި އޭނާ އުޅޭ ކަމަށް ވެސް ބުންޏެވެ.
ގުއަންޓަނާމޯ ޖަލުގައި ބަންދު ކުރާ ގިނަ މީހުން ފަދައިން އޭނާއާ ދެކޮޅަށް ދައުވާއެއް ނުއުފުލަ އެވެ. އޭނާ މިނިވަން ކުރުމަށް ގޮވާލައި ވަކީލުން ގިނަ މައްސަލަތައް ކޯޓަށް ހުށަހެޅި އެވެ.
"ގުއަންޓަނާމޯގައި އަހަރެން ބަންދުކޮށްފައި ހުރީ ކޮން ކަމެއްގެ މައްޗަށް ބިނާކޮށްތޯ؟ އެއީ އަހަރެންގެ ފުރަތަމަ ސުވާލު،" ކާބުލްއަށް އެނބުރި ގޮސް، އެއާޕޯޓުގެ ރަންވޭ މަތީގައި ހުރެ ހާރޫން ނޫސްވެރިންނަށް ބުންޏެވެ.
އަފްގާނިސްތާނުގެ ތާލިބާން އޮފިޝަލުން ވަނީ ގަތަރުން ފުރި ޕްރައިވެޓް ޖެޓެއްގައި އޭނާ ކާބުލްއަށް ދަތުރު ކުރާ މަންޒަރު ފެންނަ ފޮޓޯތައް އާއްމުކޮށްފަ އެވެ. އެ ޖެޓުގައި ތާލިބާން އިސްވެރިން ވެސް ތިއްބެވެ.
"އަހަރެންގެ އާއިލާ އާއި ތިމާގެ މީހުން އުޅުނީ ވަރަށް ވޭނުގައި،" ކަރުގައި ފެހި ކުލައިގެ މާ ފައްޗެއް އަޅައިގެން ހުރި ހާރޫން ނޫސްވެރިންނަށް ބުންޏެވެ.
ކާބުލް އެއާޕޯޓުން ނުކުމެ، ދަތުރު ކުރަން އޮންނަ މައި މަގުގައި ހާރޫންގެ ބޮޑެތި ޕޯސްޓަރުތައް ހަރުކޮށްފައި ހުއްޓެވެ. ހާރޫން މިނިވަން ކުރިކަން އެނގުމުން އާއިލާއިން އުފާ ފާޅު ކުރަން ފެށީ ހުކުރު ދުވަހު އެވެ.
"ހީވަނީ މި ގެއަށް އީދެއް އައިސްގެން އުޅޭހެން، ބޮޑު ކައިވެނި ހަފްލާއެއް ކުރިއަށްދާހެން. މިއީ އަހަރުމެންނަށް ވަރަށް ފުން އަސަރުތަކެއް ކުރާ ވަގުތެއް،" ޕާކިސްތާނުގެ ޕެޝާވަރުގައި ރެފިއުޖީންގެ ގޮތުގައި ދިރިއުޅޭ ހާރޫންގެ އާއިލާގެ ފަރާތުން އޭނާގެ ބޭބެ ރޯމަން ހާން އޭއެފްޕީއަށް ބުންޏެވެ.
އެ އާއިލާއިން އަފްގާނިސްތާން ދޫކޮށް ޕާކިސްތާނަށް ހިޖުރަ ކުރީ 1979 ވަނަ އަހަރު ރަޝިއާގެ ސިފައިން އަފްގާނިސްތާނަށް އެރުމުންނެވެ.
ހާރޫނަކީ ހެޒްބޭ އިސްލާމީގެ މެމްބަރެއް ކަމަށް އެ އާއިލާއިން ބުނެ އެވެ. ނަމަވެސް އޭނާއާ އަލްގައިދާއާ ގުޅުން އޮންނަ ވާހަކަ ދޮގުކުރެ އެވެ.
ހާރޫން ދޫކޮށްލުމުން، މިހާރު ގުއަންޓަނާމޯ ޖަލުގައި ހުރީ އަފްގާން އެންމެ މީހެކެވެ. އެއީ އަލްގައިދާގެ ފައުންޑަރު އުސާމާ ބިން ލާދިންއާ ގާތް ގުޅުމެއް އޮންނަ ކަމަށް ސީއައިއިން ތުހުމަތު ކުރި މުހައްމަދު ރަހީމް އެވެ.
