އިނގިރޭސިވިލާތުގެ ކަމާބެހޭ އިދާރާތަކުން މަޝްހޫރު އިންފްލުއެންސަރު އެންޑްރޫ ޓޭޓް އާއި އޭނާގެ ބޭބެ ޓްރިސްޓަން ޓޭޓްގެ މައްޗަށް އިތުރު ދައުވާތަކެއް އުފުލުމަށް ނިންމުމާ ގުޅިގެން، އެމެރިކާގެ ފުލުހުން އެ ދެ މީހުން ހައްޔަރުކޮށްފި އެވެ.
އިނގިރޭސިވިލާތުގެ ކްރައުން ޕްރޮސެކިއުޝަން ސާވިސް (ސީޕީއެސް) އިން ބުނި ގޮތުގައި، އެންޑްރޫ ޓޭޓްގެ މައްޗަށް ރޭޕްކުރުމުގެ އިތުރު ހަތް ދައުވާއެއް ވަނީ އުފުލާފަ އެވެ. މީގެ އިތުރުން އިންސާނީ ވަގުފާރި ކުރުމާއި، ކުޑަކުދިން ބޭނުންކޮށްގެން ބަދުއަހުލާގީ މަންޒަރުތައް އުފެއްދުން ފަދަ ސީރިއަސް ކުށްތަކުގެ ތުހުމަތު ވެސް އޭނާގެ މައްޗަށް ވަނީ ކޮށްފަ އެވެ.
ޓްރިސްޓަން ޓޭޓްގެ މައްޗަށް އުފުލާފައިވަނީ ޖިންސީ ގޯނާކުރުމުގެ އެއް ދައުވާ އާއި، ރޭޕްކުރުމުގެ ދެ ދައުވާއެއްގެ އިތުރުން ޖިންސީ ފުރައްސާރަ ކުރުމަށްޓަކައި އިންސާނީ ވަގުފާރި ކުރުމަށް މަގުފަހިކޮށްދިނުމުގެ ތިން ދައުވާއެކެވެ.
މި ކުށްތައް ހިނގާފައިވާ ކަމަށް ބެލެވެނީ 2010 ވަނަ އަހަރުގެ ޖުލައި މަހާއި 2017 ވަނަ އަހަރުގެ އޮގަސްޓް މަހާ ދެމެދުގަ އެވެ. ނަމަވެސް، ޓޭޓްގެ ދެބެއިން މީގެ ކުރިން ވެސް ވަނީ އެ މީހުންގެ މައްޗަށް ކުރެވޭ ހުރިހާ ތުހުމަތުތަކަކަށް އިންކާރުކޮށްފަ އެވެ.
ކްރައުން ޕްރޮސެކިއުޝަން ސާވިސްގެ ސްޕެޝަލް ކްރައިމް ޑިވިޝަންގެ ހެޑް، މެލްކަމް މެކްހެފީ ވިދާޅުވީ، މި ދައުވާތައް އުފުލަން ނިންމީ ބެޑްފޯޑްޝަޔާ ފުލުހުން ފޮނުވި އިތުރު ހެކިތަކަކަށް ބިނާކޮށް ކަމަށެވެ. އަދި މި މައްސަލައިގައި އަނިޔާ ލިބުނު ކަމަށް ބެލެވޭ މީހުންގެ ޖުމްލަ އަދަދު މިހާރު ހަތަކަށް އަރާފައިވާ ކަމަށް ވެސް އޭނާ ވިދާޅުވި އެވެ.
އެމެރިކާގެ ޖަސްޓިސް ޑިޕާޓްމަންޓުގެ ތަރުޖަމާނަކު ބުނީ، އެ ދެބެއިން ހައްޔަރުކުރީ އިނގިރޭސިވިލާތާ ހަވާލުކުރުމުގެ އިޖުރާއަތްތަކުގެ ދަށުން ކަމަށެވެ.
އިނގިރޭސިވިލާތާއި އެމެރިކާގެ ރައްޔިތުކަން އޮންނަ މި ދެބެއިން، އިނގިރޭސިވިލާތުގެ ގާނޫނުގެ ކުރިމައްޗަށް ހާޒިރުކުރުމަށްޓަކައި އެމެރިކާއިން އެމީހުން ފޮނުވައިދިނުމަށް (އެކްސްޓްރަޑިޝަން) އެދިފައިވާނެ ކަމަށް ސީޕީއެސްގެ ބަޔާނުގައި ބުނެފައިވެ އެވެ.
ހޮނިހިރު ދުވަހުގެ ރޭ އެ ދެބެއިން ހައްޔަރުކުރުމާ ގުޅިގެން، އެމީހުންގެ ވަކީލު ޖޯސެފް މެކްބްރައިޑް ނެރުނު ބަޔާނެއްގައި ބުނެފައިވަނީ އެންޑްރޫ އާއި ޓްރިސްޓަން އަކީ ކުށެއް ނެތް ބައެއްކަން މުޅި ދުނިޔެއަށް ވެސް އެނގޭ ކަމަށެވެ.
