ވައިޓް ހައުސްގެ ޓެލެޕްރޮމްޕްޓަރު އޮޕަރޭޓަރެއްގެ ގޮތުގައި މަސައްކަތްކުރި މުވައްޒަފަކު، އެމެރިކާގެ ރައީސް ޑޮނަލްޑް ޓްރަމްޕް ދެއްވާ ތަގުރީރުތަކުގައި ބޭނުންކުރައްވާނެ ބަސްތަކަށް ބެޓްކޮށްގެން ގާތްގަނޑަކަށް އެއްލައްކަ ޑޮލަރު ހޯދި މައްސަލައެއް ފެންމަތިވެއްޖެ އެވެ.
މި މައްސަލައިގައި ތުހުމަތު ކުރެވިފައިވަނީ 2016 ވަނަ އަހަރުން ފެށިގެން ވައިޓް ހައުސްގައި މަސައްކަތް ކުރަމުން އައި ގޭބްރިއަލް ޕެރޭޒްގެ މައްޗަށެވެ. އޭނާގެ މައްޗަށް ތުހުމަތު ކުރެވެނީ ލިބިފައިވާ އެތެރޭގެ މައުލޫމާތު ބޭނުންކޮށްގެން ނާޖާއިޒު ފައިދާ ހޯދި ކަމަށެވެ.
މި މުވައްޒަފު ބެޓް ކޮށްފައިވަނީ ދުނިޔޭގެ އެކި ހާދިސާތަކާ ގުޅޭގޮތުން ބެޓްކުރުން ކުރިއަށް ގެންދާ ކަލްޝީ މެދުވެރިކޮށެވެ. އޭނާ ވަނީ ރައީސް ޓްރަމްޕް ދެއްވާ މުހިންމު ތަގުރީރުތަކުގައި، ހާއްސަކޮށް ސްޓޭޓް އޮފް ދަ ޔޫނިއަން ފަދަ ބޮޑެތި ހިތާބުތަކުގައި ބޭނުންކުރައްވާނެ ވަކިވަކި ބަސްތަކާއި އިބާރާތްތަކަށް އަމާޒުކޮށް ފައިސާ ޖަހާފައެވެ. މީގެ ތެރޭގައި ވަކި ގައުމުތަކުގެ ނަންތަކާއި، އިގްތިސާދީ ބަސްތަކާއި، އަދި ކެމްޕޭންގައި ބޭނުންކުރާ ޝިއާރުތައް ހިމެނެއެވެ.
ކަލްޝީ އިން ބުނި ގޮތުގައި މިދިޔަ މާޗު މަހުގެ ތެރޭގައި އެ ކުންފުނީގެ އެނަލިސްޓުންނަށް ވަނީ ތަގުރީރުތަކުގައި ބޭނުންކުރާ ބަސްތަކާ ގުޅޭ މާކެޓްތަކުގައި އާދަޔާ ހިލާފު މުއާމަލާތްތަކެއް ހިނގަމުންދާކަން ފާހަގަކުރެވިފައެވެ. އެ ކުންފުނިން ބުނީ ރައީސުންނާއި ފެޑެރަލް ރިޒާވްގެ ވެރިން ފަދަ ބޭފުޅުން ވިދާޅުވާ ބަސްތަކަކީ ބޭރު ފައިސާގެ ބާޒާރާއި، ތެލުގެ އަގާއި، އަދި ހިއްސާގެ ބާޒާރަށް ބިލިއަނުން އަސަރުކުރާ ކަންކަން ކަމަށެވެ. އެހެންކަމުން މިފަދަ މައުލޫމާތު ކުރިއާލާ އެނގިގެން ފައިސާ ހޯދުމަކީ ބޮޑު މައްސަލައެކެވެ.
އެކައުންޓްތަކުގެ މައުލޫމާތު ދިރާސާކުރުމުން އެ މުއާމަލާތްތައް ހިންގާފައިވަނީ ވައިޓް ހައުސްގެ ޓެލެޕްރޮމްޕްޓަރު އޮޕަރޭޓްކުރާ ފެޑެރަލް މުވައްޒަފެއްކަން ވަނީ ކަށަވަރުވެފައެވެ. މިކަން ފަޅާއެރުމާއެކު ކަލްޝީ އިން ވަނީ ޕެރޭޒްގެ އެކައުންޓްގައި ހުރި 90،000 އަށްވުރެ ގިނަ ޑޮލަރު ފްރީޒްކޮށްފައެވެ. އެހެންކަމުން އޭނާއަށް އެ ފައިސާ ނެގޭގޮތެއް ނުވިއެވެ. ކަލްޝީގެ އެންފޯސްމަންޓް ހެޑް ރޮބާޓް ޑިނޯލްޓް ވިދާޅުވީ މި މައްސަލައިގެ ހެކިތައް މިހާރު ރެގިއުލޭޓަރީ އިދާރާތަކާ ހަވާލުކޮށްފައިވާ ކަމަށެވެ.
ވައިޓް ހައުސްގެ ޕްރެސް ސެކްރެޓަރީ ކެރޮލީން ފީލްޑް ވިދާޅުވީ މި މައްސަލައިގެ މައުލޫމާތު ރައީސް ޓްރަމްޕަށް ލިބިވަޑައިގެންފައިވާ ކަމަށެވެ. އަދި އެ މުވައްޒަފު މިހާރު ހުރީ މުސާރަ ނުލިބޭ ގޮތަށް ސަސްޕެންޑްކޮށްފައި ކަމަށާއި، މުސްތަގުބަލުގައި އޭނާ ވައިޓް ހައުސްގައި މަސައްކަތް ނުކުރާނެ ކަމަށްވެސް އޭނާ ވިދާޅުވިއެވެ.
މި މައްސަލަ އެންމެ ފުރަތަމަ ރިޕޯޓްކުރީ އޭބީސީ ނިއުސް އިންނެވެ. އެ ނޫހުން ބުނި ގޮތުގައި މެންހަޓަންގެ ފެޑެރަލް ޕްރޮސެކިއުޓަރުން ވަނީ މި މައްސަލައިގައި ޖިނާއީ ދައުވާއެއް ނުއުފުލުމަށް ނިންމާފައެވެ. ނަމަވެސް ކޮމޮޑިޓީ ފިއުޗާސް ޓްރޭޑިން ކޮމިޝަނުން މި މައްސަލަ ތަހުގީގު ކުރަމުންދާ ކަމަށް މައުލޫމާތު ލިބެއެވެ. އެ ކޮމިޝަނުން ރަސްމީކޮށް ބުނީ ވަކި މައްސަލައެއް ތަހުގީގު ކުރާކަން ކަށަވަރުކޮށް ނުދެވޭނެ ކަމަށެވެ.
މި މައްސަލައިގެ ތަހުގީގަށް ޕެރޭޒް ފުރިހަމައަށް އެއްބާރުލުން ދެމުންދާ ކަމަށް މައުލޫމާތު ލިބެއެވެ. މި ހާދިސާއަކީ އެމެރިކާގެ ސަރުކާރުގެ އެންމެ މަތީ ފަންތީގެ މައުލޫމާތުތައް ރައްކާތެރިކުރުމާއި، އެފަދަ މައުލޫމާތު ބޭނުންކޮށްގެން މާލީ ފައިދާ ހޯދުން ހުއްޓުވުމާ ގުޅޭގޮތުން ބޮޑެތި ސުވާލުތަކެއް އުފެދިގެންދިޔަ ކަމެކެވެ.
