ގާނޫނީ ވަކީލް ނާޒިމް ސައްތާރުގެ ޓްވީޓާ އެކައުންޓުން ކީރިތި ރަސޫލާއަށް ފުރައްސާރަކޮށްފައިވާ ކަމަށް ބުނާ މައްސަލަ ބަލަމުންދާ ކަމަށް ފުލުހުން ބުނެފި އެވެ.
ދެހާސްބާރަވަނަ އަހަރުގެ ތެރޭގައި ނާޒިމް ސައްތާރު ކޮށްފައިވާ ޓްވީޓް މި ފަހުން ފެންމަތިވެގެން މި އުޅެނީ ސޯޝަލް މީޑިއާގައި ނާޒިމް ކަމަށް ބެލެވޭ މީހަކު އެހެން ފިރިހެނަކާ އެކު ބަދު އަހުލާގީ އަމަލު ހިންގާ މަންޒަރު ފެންނަ ވީޑިއޯއެއް ލީކުކޮށް އެ ވާހަކަ ހޫނުވެފައިވާ ދަނޑިވަޅެއްގަ އެވެ.
"މާތް ނަބިއްޔާ މުހައްމަދު ﷺ އަށް ފުރައްސާރަ ކުރި މައްސަލަ ފުލުހުން ދަނީ ތަހުގީގު ކުރަމުން،" ދީނީ އެކި ޖަމިއްޔާތައް އެކުވެގެން އުފައްދާފައިވާ ރައްޔިތުންގެ އިއްތިހާދުން ހުށަހަޅާފައިވާ މައްސަލައާ ގުޅޭ ގޮތުން ނޫސްވެރިން ސުވާލު ކުރުމުން ފުލުހުންގެ މީޑިއާ އޮފިޝަލް ފޮނުވި މެސެޖްގައިވެ އެވެ.
ރައްޔިތުންގެ އިއްތިހާދުން ފުލުހަށް ފޮނުވި މައްސަލާގައި ބުނެފައިވާ ގޮތުން ޖެނުއަރީ 2، 2012 ގައި ހެނދުނު 10:59 ގައި ކުރި އެ ޓްވީޓް މިއަދު ހެނދުނު 8:25 ހާ ހަމައަށް ބެލިއިރު ވެސް ޑިލީޓް ނުކުރާ ކަމަށެވެ. އެކަމަކު އޭގެ ދެ މިނެޓް ފަހުން އެ ޓްވީޓް ޑިލީޓް ކޮށްފައިވާ ކަމަށް ވެސް އެ މައްސަލާގައި ބުނެފައިވެ އެވެ.
މި މައްސަލައާ ގުޅިގެން ނާޒިމް ސައްތާރު ވިދާޅުވި ގޮތުގައި, އޭނާގެ މުޅި ހަޔާތުގައި ވެސް ރަސޫލާއަށް ފުރައްސާރަކޮށްފައި ނުވާނެ އެވެ. އަދި, މާކުރީގެ ޓްވީޓެއްގެ މައްސަލަ މިހާރު ބެލޭނެ ގާނޫނީ ހަމައެއް ނެތް ކަމަށް ވެސް އޭނާ ގަބޫލުކުރައްވަ އެވެ.
ނާޒިމް ކަމަށް ބެލެވޭ މީހަކު ފެންނަ ވީޑިއޯއާ ގުޅިގެން އެ ބަދު އަހުލާގީ އަމަލުގެ މައްސަލަ ވެސް ފުލުހުން ދަނީ ބަލަމުންނެވެ. އެކަމާ ގުޅިގެން ޖިނާއީ ބޮޑު ތަހުގީގެއް ފަށައި ރޭގެ ވަގުތެއްގައި ނާޒިމް ވަނީ ފުލުހުންގެ އިދާރާއަށް ވެސް ހާޒިރުކޮށްފަ އެވެ.
އެ މައްސަލައިގައި ފުލުހުން އިއްޔެ ބުނެފައި ވަނީ ސޯޝަލް މީޑިއާގައި ދައުރުވަމުންދާ ވީޑިއޯގައި ހިމެނޭ މީހުންގެ މައްސަލަތައް ތަހުގީގު ކުރަން ފަށާފައިވާ ކަމަށެވެ. އަދި ގިނަ އަދަދެއްގެ ބަޔަކަށް ބްލެކްމެއިލް ކުރާ މައްސަލައެއް ވެސް ހުށަހަޅާފައިވާތީ އެ މައްސަލަ ވެސް ތަހުގީގު ކުރަމުންދާ ކަމަށް ފުލުހުން ބުންޏެވެ.
ބްލެކްމެއިލް މައްސަލައިގައި އިތުރު ތަފްސީލެއް ފުލުހުން ނުދިން ނަމަވެސް ބެލެވެނީ އެއީ ބަދުއަހުލާގީ އަމަލު ހިންގާ ވީޑިއޯ ބޭނުންކޮށްގެން ބްލެކްމެއިލް ކުރަން އުޅުނު މައްސަލަތަކެއް ކަމަށެވެ.
ނާޒިމް ސައްތާރަކީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ އެއްބަނޑު އެއްބަފާ ކޮއްކޮ އެވެ. ރައީސް ނަޝީދު އަވަހާރަކޮށްލުމަށް މެއި 6، 2021 ގައި ދިން ހަމަލާގެ މައްސަލައިގައި ނަޝީދު ތަމްސީލު ކުރައްވާ ވަކީލެއްގެ ގޮތުގައި ވެސް ނާޒިމް ހަރަކާތްތެރިވެ އެވެ.
