ނަދުރުކޮޅަކީ ފިރިހެން ކުދިންގެ ބޮލުގެ ފުއްކިބައިގައި ދިގުކޮށްފައި ހުންނަ ހުޅި އެކެވެ. މި ހުޅި ފިޔަވައި މުޅި ބޯ ހުންނާނީ ތުނިކޮށް ކޮށައިފައެވެ. ނުވަތަ ބާލައިފަ އެވެ. ނަދުރުކޮޅު ހުންނާނީ އައްސާލުމަށްފަހު ފަހަތަށް އެލުވާލައިފައެވެ.
ކުދިންގެ ބޮލުގައި ނަދުރުކޮޅު ބަހައްޓާ އުޅެނީ އެ ކުދިން، ބޮޑެތި ނުރައްކާތެރި ބަލިތަކުންނާއި ޖިންނި ޝައިތާނުންގެ ކިބައިން ރައްކާތެރި ކުރުމަށާއި އެކިއެކި މީސްމީހުންގެ އެސްފިންނާއިން ސަލާމަތްކޮށް ދުޅަހެޔޮ ޞިއްޙަތެއްގެ މަތީގައި ދަރިފުޅު ބެހެއްޓުމުގެ ބޭނުމުގަ އެވެ. މި ގޮތުން މިކަން ކޮށް އުޅުނީ ބުނެ އުޅޭ ނަދުރެއްގެ ގޮތުގަ އެވެ.
މި ނަދުރުކޮޅު ކޮށާލަނީ ކުއްޖާ ވާރުގަލައްވާވަރު ވުމުންނެވެ. ނަދަރު ފުއްދުމުގެ ގޮތުން ނަދުރުކޮޅު ބެހެއްޓި މީހުން މިހާރުވެސް ދުނިޔޭގައި އެބަތިއްބެވެ. އެންމެ ފަހުން މި ރަށުގައި (ކަނޑިތީމު) ނަދުރުކޮޅު ބެހެއްޓި މީހާގެ އުމުރު، މިހާރު ފަންސާސް އަހަރަށް ވުރެ މައްޗެވެ.
އާދައިގެ މަތިން އެ ދުވަސްވަރު އަންހެން ކުދިން ތިބޭނީ ބޯ ބާލައިފައެވެ. ފިރިހެން ކުދިންގެ ބޯ ހުންނާނީ ކުރުކޮށް ކޮށައިފައެވެ. އަންހެން ކުދިންގެ އިސްތަށިގަނޑު ދިގުކުރާނީ ލިބާސް ލެއްވުމަށް ފަހުގަ އެވެ.
އެ ދުވަހުވެސް އަދި މިއަދުވެސް މައިން ބަފައިންނަކީ އެމީހުންގެ ދަރިންނަށްޓަކައި ވާންޖެހުނު ކޮންމެ ގުރުބާނީއެއް ވާބައެކެވެ. ބަލާ ބަލިމަޑުކަމުން މިންޖުކޮށް ދުޅަހެޔޮ ޞިއްޙަތެއްގައި ދަރިން ބޮޑެތި ކުރުމަކީ ކޮންމެ މަޔަކާއި ބަފަޔަކުގެ އެންމެ ފޮނި އުއްމީދެވެ.
