މިހާރަކަށް އައިސް އާއިލާއާއެކު ޗުއްޓީއަށް ދާއިރު، ކުދިންގެ ފޮޓޯތަކާއި ވީޑިއޯތައް ސޯޝަލް މީޑިއާގައި ހިއްސާކުރުމަކީ ދިވެހިންގެ ތެރޭގައި ވެސް ވަރަށް އާންމު ކަމެކެވެ. ރާއްޖޭގެ ރީތި ރަށްރަށަށް ނުވަތަ ރާއްޖޭން ބޭރަށް ދާއިރު، އެ ހޭދަކުރާ އުފާވެރި ވަގުތުތައް މީހުންނަށް ދައްކާލުމަކީ ގިނަ ބަޔަކަށް ލިބޭ ހިތްހަމަޖެހުމެކެވެ. ނަމަވެސް، މިގޮތަށް ހުރިހާ ކަމެއް "ޕޯސްޓް" ކުރުމުގެ ސަބަބުން ޗުއްޓީގެ އަސްލު މަގުސަދު ގެއްލި، ބައެއް ފަހަރު ނަފުސާނީ ބުރައަކަށް ވެސް މިކަން ވެގެންދެއެވެ.
މީހުންނަށް މިހާރު އިހުސާސް ކުރެވެނީ ދާ ކޮންމެ ތަނެއްގެ ފޮޓޯއެއް ސޯޝަލް މީޑިއާއަށް ނުލައިފި ނަމަ، އެ ތަނަކަށް ދިޔުމުގެ ފުރިހަމަކަން ނުލިބޭ ކަމަށެވެ. މީގެ މައިގަނޑު ސަބަބުތަކަކީ އެހެން މީހުން އެފަދަ ޕޯސްޓް ކުރާތީ، ތިމާ ވެސް އެކަން ކުރަން ޖެހޭ ކަމުގެ އިހުސާސްވުމެވެ. އަނެއް ސަބަބަކީ ފޮޓޯއަކަށް ލިބޭ ލައިކްތަކުންނާއި މީހުން ކުރާ ތައުރީފުން ލިބޭ ވަގުތީ ހިތްހަމަޖެހުމެވެ. އޭގެ އިތުރުން ކުދިންނަށް ރަނގަޅު ޗުއްޓީއެއް ދެވޭކަމާއި، "ޕާފެކްޓް" އާއިލާއެއްގެ ގޮތުގައި ފެންނަން ބޭނުންވުމެވެ.
ދިރާސާތަކުން ދައްކާގޮތުގައި، ޗުއްޓީގެ ކޮންމެ ވަގުތެއް މީސްމީޑިއާގައި ހިއްސާކުރަން އުޅޭ މީހުންނަށް ސްޓްރެސް އާއި މާޔޫސްކަން ކުރިމަތިވުން ގާތެވެ. އޭގެ ބަދަލުގައި ފޯނާ ދުރުވެލުމުން ލިބޭ ފައިސާތައް ގިނަ އެވެ.
ފޯނަށް ބަލަން އިނުމުގެ ބަދަލުގައި، ދަރިންނާއެކު މޫދަށް އެރުމާއި ކުޅުމުގައި ފުރިހަމައަށް ބައިވެރިވެވޭނެއެވެ. ފޮޓޯ ނަގަން އުޅުމުގެ ބަދަލުގައި، އެ ވަގުތު ހިތުގައި ބިންވަޅު ނެގިގެންދާ ހަނދާންތަކެއް އުފެދޭނެއެވެ. އަދި މީހުން ބުނާނެ އެއްޗަކަށް ނުވަތަ ލިބޭ ލައިކްސްއަށް ބެލުމުގެ ބަދަލުގައި، އަމިއްލަ ނަފްސަށްޓަކައި ޗުއްޓީ ހޭދަކުރެވޭނެއެވެ.
ކުއްލިއަކަށް ސޯޝަލް މީޑިއާ އެއްކޮށް ހުއްޓާލުމަކީ އުނދަގޫ ކަމަކަށް ވެދާނެއެވެ. އެހެންކަމުން މި ކަންކަން ތަޖުރިބާކޮށްލެވިދާނެއެވެ. ފޮޓޯ ނަގާށެވެ. ނަމަވެސް އެ ވަގުތުން ވަގުތަށް ޕޯސްޓް ކުރުމުގެ ބަދަލުގައި، ފޯނުގައި ވަކި ފޯލްޑަރަކަށް ލާފައި ބަހައްޓާށެވެ. ގެއަށް އައިސް ހަމަޖެހިލައިގެން އޭގެ ތެރެއިން އެންމެ ރީތި ފޮޓޯތައް ފަހުން ހިއްސާކުރެވިދާނެއެވެ.
ދުވާލަކު އެއްފަހަރު ނުވަތަ ދެފަހަރު (މިސާލަކަށް ނިދުމުގެ ކުރިން) ސޯޝަލް މީޑިއާ ބަލާލުމަށް ވަގުތުކޮޅެއް ހުސްކުރާށެވެ. އިތުރު ވަގުތުތަކުގައި ފޯނު ދުރުގައި ބާއްވާށެވެ.
ފޯނަށް ލުމުގެ ބަދަލުގައި، ދަތުރުގައި ކުރެވުނު ތަޖުރިބާތައް ފޮތެއްގައި ލިޔެލާށެވެ. މިއީ މުސްތަގުބަލުގައި ބަލާލަން މާ ހިތްގައިމު އެއްޗަކަށް ވާނެއެވެ. ފޮޓޯއެއް ނުލެވިގެން ނުވަތަ މީހުންނަށް ނުދެއްކިގެން ދެރަވާކަށް ނުޖެހެއެވެ. އެންމެ މުހިންމީ އާއިލާއާއެކު ހޭދަކުރާ ގޮތްތަކެވެ.
ކޮންމެހެން ސޯޝަލް މީޑިއާ ބޭނުންކުރުން ހުއްޓާލާކަށް ނުޖެހެއެވެ. ނަމަވެސް، ފޯނުގެ ސްކްރީނަށް މޫނު ޖަހައިގެން ދަރިން ބޮޑުވާ މަންޒަރު ބެލުމުގެ ބަދަލުގައި، އެ ކުދިންނާއެކު އެ ވަގުތުތަކުގައި އަމަލީ ގޮތުން ބައިވެރިވުމަކީ ލިބޭނެ އެންމެ ބޮޑު ނިއުމަތެވެ.
މިފަހަރުގެ ޗުއްޓީގައި ފޯނު ދުރުގައި ބާއްވާލާފައި، އާއިލާއަށް ފުރިހަމަ ވަގުތު ދޭން ތައްޔާރު ހެއްޔެވެ؟ ބޭނުން ނަމަ، މިގޮތަށް ޑިޖިޓަލް ޑީޓޮކްސްއެއް ރާވާލާށެވެ.
