ވޮޝިންޓަން، އެމެރިކާ (ޖޫން 22) - އެމެރިކާގެ އިންފްލޭޝަން ލުއި ކުރަން އަޅާ ފިޔަވަޅުތަކުގެ ތެރެއިން ޗައިނާގެ ބައެއް މުދަލުން ނަގާ ޓެކްސް ކުޑަ ކުރަން ވިސްނަމުންދާ ދަނޑިވަޅެއްގައި، ޗައިނާގެ ރައީސް ޝީ ޖިންޕިންއާ ވާހަކަ ދައްކަވާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެ އެވެ.
"އަޅުގަނޑު ވިސްނައިގެން މި ހުރީ ރައީސް ޝީއާ އެކު ވާހަކަ ދައްކަން. އެކަމަށް އަދި ވަގުތެއް ކަނޑަނާޅަން،" ބައިޑެން ނޫސްވެރިންނަށް ވިދާޅުވި އެވެ.
ނަމަވެސް ވަރަށް އަވަހަށް ފޯނު މެދުވެރިކޮށް ވާހަކަ ދައްކަވާނެ ކަމަށް ބައިޑެން ވިދާޅުވި އެވެ.
ޗައިނާ އާއި އެމެރިކާގެ ވެރިންގެ މެދުގައި އެންމެ ފަހުން މަޝްވަރާއެއް އޮތީ މާޗް 18 ވަނަ ދުވަހު އެވެ. އެ ދުވަހު ބައިޑެން ވަނީ ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައިގައި ޗައިނާއިން ރަޝިއާއަށް އެހީވުމާ ދެކޮޅަށް ޝީއަށް އިންޒާރު ދެއްވާފަ އެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި ޗައިނާގެ އެތައް ބިލިއަން ޑޮލަރެއްގެ އިމްޕޯޓްތަކުން 25 ޕަސެންޓް ޑިއުޓީގެ ގޮތުގައި ނަގަން ފެށި އެވެ.
އޭރު އެމެރިކާއިން ބުނީ އެއީ ޗައިނާއިން ގެންގުޅޭ ނަހަމަ ވިޔަފާރީގެ އުސޫލުތައް ކުށްވެރިކޮށް އެމެރިކާގެ ވިޔަފާރިވެރިން ހިމާޔަތް ކުރަން އެޅި ފިޔަވަޅެއް ކަމަށެވެ.
އެ ފިޔަވަޅަށް ސިޔާސީ ގޮތުން މަގްބޫލްކަން އޮތް ނަމަވެސް، 40 އަހަރުގެ ތެރޭގައި އިންފްލޭޝަން މަތި ނުވާ މިންވަރަށް މަތިވެފައި ވާތީ، ތަކެތީގެ އަގު ތިރި ކުރުމުގެ ގޮތުން އެ ފިޔަވަޅަށް ބަދަލު ގެންނަން މަޖުބޫރުވާ ކަމަށް ތަޖުރިބާކާރުން ބުނެ އެވެ.
