މޮނާކޯ (ޖޫން 21) - މި މަހުގެ ނިޔަލަށް މޮނާކޯއާ އެކު ކޮންޓްރެކްޓްގައި ހުރި ސްޕެއިނުގެ މިޑްފީލްޑަރު، ސެސްކް ފަބްރެގަސް އަށް ކޯޗިންގެ ހުށަހެޅުންތައް ލިބުނު ކަމުގައި ވިޔަސް ވިސްނުމަކީ އަދިވެސް ކުޅުމުގެ ކެރިއަރު ކުރިއަށް ގެންދިއުން ކަމަށް ބުނެފި އެވެ.
އުމުރުން 36 އަހަރުގެ ފަބްރެގަސް، ފްރާންސްގެ މޮނާކޯއާ އެކު ކޮންޓްރެކްޓް ހަަމަވި ނަމަވެސް އެ ޓީމުން އޭނާ އަށް އާ އެއްބަސްވުމެއް ދޭން ބޭނުމެއް ނުވެ އެވެ. ފަބްރެގަސް ބުނީ ރަނގަޅު ހުށަހެޅުމެއްގެ އިންތިޒާރުގައި ހުރީ ކުޅުމުގެ ކެރިއަރު ކުރިއަށް ގެންދިއުމަށް ކަމަށެވެ.
"ހަގީގަތަށް ބުނަންޏާ އަހަންނަށް ތިން ހަތަރު ފޯން ކޯލު އައިސްފި ކޯޗިން ހުށަހެޅުންތަކަކާ އެކު. އަހަންނަށް ގުޅަނީ ކުރިން އަހަންނަށް އިރުޝާދުދިން ކޯޗުން. އެ މީހުން ބޭނުންވަނީ އަހަރެން އެ މީހުންގެ ކޯޗިން ޓީމާ ގުޅެން،" 21 ވަނަ ގަރުނުގައި އުފެދުނު އެންމެ މޮޅު މިޑްފީލްޑަރުންގެ ތެރޭގައި ހިމެނޭ ފަބްރެގަސް ބުންޏެވެ.
"މި ސީޒަން މި ނިމުނީ އެހާ ރަނގަޅަކަށް ނޫން. އަހަރެންގެ ކެރިއަރު ވަރަށް ރަނގަޅަށް ގޮސްފައި. މި ކަހަލަ ގޯސްކޮށް ދިޔަ ސީޒަނަކަށް ފަހު ކުޅުން ހުއްޓާލަން ބޭނުމެއް ނޫން. އާ ޗެލެންޖެއްގެ އިންތިޒާރުގައި މި ހުރީ، ރަނގަޅު އޮފާތައް އަންނާނެ،"
ފްރެންޗް ލީގުގެ މެޗެއްގެ ތެރެއިން ޕީއެސްޖީ (ކ)ގެ ނޭމާ އަތުން ބޯޅަ ހޯދަން މޮނާކޯގެ ފަބްރެގަސް މަސައްކަތް ކުރަނީ.
ބާސެލޯނާގެ ޔޫތު ޓީމުގައި ހުއްޓައި، ފަބްރެގަސް ޒުވާން އުމުރުގައި 2003 ވަނަ އަހަރު އާސެނަލަށް ގެނައީ އޭރު އެ ޓީމުގެ ކޯޗަކަށް ހުރި އާސެން ވެންގާ އެވެ. ވެންގާގެ ބެލުމުގެ ދަށުން ޑިވެލޮޕްވެ، ތަފާތު މޮޅަށް ކުޅުނު ފަބްރެގަސް ވަނީ އާސެނަލް ކެޕްޓަން ބޭންޑް އަޅައިގެން ވެސް ކުޅެފަ އެވެ.
އާސެނަލް ދޫކޮށް ފަބްރެގަސް 2011 ވަނަ އަހަރު ބާސެލޯނާ އަށް ބަދަލުވީ 35 މިލިއަން ޑޮލަރުގެ ފީ އަކަށެވެ. އެކަމަކު، ތިން ސީޒަނަށް ފަހު ފަބްރެގަސް އަށް ޖެހުނީ ބާސެލޯނާ ދޫކޮށްލާށެވެ. އޭނާ އަލުން 2014 ވަނަ އަހަރު ޗެލްސީ އަށް ބަދަލުވީ 40 މިލިއަން ޑޮލަރުގެ އަގަކަށެވެ. އެ ފަހަރު ޗެލްސީން ފަބްރެގަސް ގަތީ، އާސެނަލް އަލުން ފަބްރެގަސް ގަންނަން ބޭނުމެއް ނުވުމުންނެވެ.
ޗެލްސީ އަށް 2018 ވަނަ އަހަރުގެ ނިޔަލަށް ކުޅުނު ފަބްރެގަސް ދެން ބަދަލުވީ އެންމެ ފަހުން ކުޅުނު މޮނާކޯ އަށެވެ. އެ ގޮތުން 2019 ވަނަ އަހަރުގެ ޖެނުއަރީ މަހުގެ ތެރޭގައި މޮނާކޯ އިން ފަބްރެގަސްގެ ސޮއި ހޯދީ ފުރަތަމަ ލޯން ޑީލެއްގަ އެވެ. އެކަމަކު، މޮނާކޯ އިން ފަހުން އެ އެއްބަސްވުން ދާއިމީ ކުރީ މި މަހުގެ ނިޔަލަށެވެ.
އާސެނަލާ އެކު ފަބްރެގަސް ވަނީ އެފްއޭ ކަޕް ޗެމްޕިއަންކަން ހޯދައިފަ އެވެ. ބާސެލޯނާއާ އެކު ސްޕެނިޝް ލީގާއި ކޮޕަ ޑެލް ރޭ (ސްޕެނިޝް ކަޕް)، ސްޕެނިޝް ސުޕަ ކަޕް، ޔުއެފާ ސުޕަ ކަޕް އަދި ކްލަބް ވޯލްޑް ކަޕް ޗެމްޕިއަންކަން ހޯދި އެވެ. ޗެލްސީއާ އެކު ޕްރިމިއާ ލީގު ދެ ފަހަރާއި އެފްއޭ ކަޕާއި ލީގު ކަޕް އަދި ޔޫރޮޕާ ލީގު ހޯދި އެވެ.
ފަބްރެގަސް އަކީ ސްޕެއިނުން 2008 ގެ ޔޫރޯ އާއި 2010 ގެ ފީފާ ވޯލްޑް ކަޕާއި 2012 ވަނަ އަހަރުގެ ޔޫރޯ ކާމިޔާބުކުރި ރަން ޖީލަށް ނިސްބަތްވާ ޓީމުގެ މެމްބަރެކެވެ.
