މެމްބަރުން ހަމަކުރުމަށް އިލެކްޝަންސް ކޮމިޝަނުން ދީފައި އޮތް މުއްދަތުގެ ތެރޭގައި ނޯޓިސްދިން ހުރިހާ ޕާޓީތަކަކުންވެސް 3000 މެމްބަރުން ހަމަކޮށްފައިވާ ކަމަށް އިލެކްޝަން ކޮމިޝަނުން މިއަދު ބުނެފި އެވެ.
އީސީން ވަނީ 3،000 މެމްބަރުން ހަމަނުވާ ހަތަރު ޕާޓީއަކަށް ނޯޓިސް ދީ، ތިން މަސް ދުވަހުގެ ތެރޭގައި މީހުން ހަމަކުރަން މެމްބަރުންގެ އަދަދު ފުރިހަމަ ކުރުމަށް އަންގައިފަ އެވެ. އަދި އެ އަދަދަށް މެމްބަރުން ހަމަނުކޮށްފިނަމަ އެ ޕާޓީތައް އުވާލެވޭނެ ކަމަށް ބުނެފަ އެވެ.
އެ ހަތަރު ޕާޓީއަކީ މޯލްޑިވްސް ރިފޯމް މޫވްމެންޓް (އެމްއާރުއެމް)، މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)، ދިވެހި ރައްޔިތުންގެ ޕާޓީ (ޑީއާރުޕީ) އަދި މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީ (އެމްއެލްއެސްޑީޕީ) އެވެ.
އީސީން މިއަދު ބުނީ ގާނޫނުގައިވާ އަދަދަށް މެމްބަރުން ހަމަކުރުމަށް ނޯޓިސް ދީފައިވާ ސިޔާސީ ޕާޓީތަކުން ރޭގެ 10:00ގެ ނިޔަލަށް މީހުން ހަމަކޮށްފައިވާ ކަމަށެވެ.
މިގޮތުން، ޑީއާރްޕީގައި އޭރު ތިބީ ޖުމްލަ 2269 މެމްބަރުންނެވެ. ރޭގެ ނިޔަލަށް ހުށަހެޅި 788 ފޯމާ އެކު އެ ޕާޓީގައި މިހާރު ތިބީ 3057 މެމްބަރުންނެވެ. އެމްޓީޑީ ޖުމްލަ ތިބީ 2457 މެމްބަރުންނެވެ. ރޭގެ ނިޔަލަށް ހުށަހެޅި 962 ފޯމާ އެކު އެ ޕާޓީގައި މިހާރު ތިބީ 3419 މެމްބަރުންނެވެ.
ލޭބާ ޕާޓީގައި އޭރު ތިބީ ޖުމްލަ 2691 މެމްބަރުންނެވެ. ރޭގެ ނިޔަލަށް ހުށަހެޅި 376 ފޯމާ އެކު އެ ޕާޓީގައި މިހާރު ތިބީ 3067 މެމްބަރުންނެވެ. އެމްއާރްއެމްގައި ޖުމްލަ ތިބީ 2280 މެމްބަރުންނެވެ. ރޭގެ ނިޔަލަށް ހުށަހެޅި 1397 ފޯމާ އެކު އެ ޕާޓީގައި މިހާރު ތިބީ 3677 މެމްބަރުންނެވެ.
