މެމްބަރުންގެ ސުވާލުތަކަށް ޖަވާބު ދެއްވަން ރައްޔިތުންގެ މަޖިލީހަށް އެންމެ ގިނައިން ވަޑައިގަންނަވާ އެއް ވަޒީރަކީ ހައުސިން އަދި ޕްލޭނިން މިނިސްޓަރު މުހައްމަދު އަސްލަމެވެ. އެގޮތަށް މަޖިލީހަށް ވަޑައިގަންނަވާ އިރު މީގެ ކުރިން އާންމު ގޮތެއްގައި އޭނާއަކީ މަޖިލީހުގެ ރިޔާސަތުން ރައީސް މުހައްމަދު ނަޝީދުގެ ތައުރީފު ލިބިވަޑައިގަންނަވާ ބޭފުޅެކެވެ. އެހެން ނަމަވެސް މިއަދު އަސްލަމް ދެއްވި ބައެއް ޖަވާބުތަކާ މެދު އެމަނިކުފާނު ވަރަށް ބޮޑަށް ނުރުހުން ފާޅުކުރެއްވި އެވެ.
މިއަދުގެ ޖަލްސާގައި ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފު ސުވާލުކުރެއްވީ ބޭރުގެ ކުންފުންޏަކާ ހަވާލުކޮށްގެން ތިނަދޫގައި ހިންގަން އުޅުނު މަޝްރޫއަކަށް ގެންގޮސްފައި ހުރި ތަކެތި، ހައުސިން މިނިސްޓްރީން އެހެން ތަނަކަށް ގެންދިޔަ އިރު، އެރަށު ކައުންސިލާ މަޝްވަރާ ނުކުރީ ކީއްވެތޯ އެވެ. އެ ސުވާލަށް އަސްލަމް ދެއްވި ޖަވާބުގެ ވަކި ހިސާބަކުން ނަޝީދު ވިދާޅުވީ، ސަނީފުގެ ސުވާލުގައި ހިމެނޭ މައްސަލައަކީ އެމަނިކުފާނަށް ވަރަށް ރަނގަޅަށް އެނގިވަޑައިގަންނަވާ މައްސަލައެއް ކަމަށެވެ. އެކަމާ ތިނަދޫ ރައްޔިތުން ތަކުރާރުކޮށް ގުޅާ ކަމަށް ވެސް އެމަނިކުފާނު ވިދާޅުވި އެވެ.
"އެހެންވީމާ ސާފު ބަހުން، ރީތިކޮށް މިކަން އޮޅުން ފިލުވައިދިނުމަކީ ވަރަށް ބޭނުންތެރިކަމެއް،" ނަޝީދު ވިދާޅުވި އެވެ.
އަސްލަމް ވިދާޅުވީ ކުރިއަށް މި ގެންދަނީ "އެ މަސައްކަތް"[ ސުވާލަށް ސާފުކޮށް ޖަވާބުދިނުމުގެ މަސައްކަތް] ކަމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޖަލްސާއެއްގެ ރިޔާސަތު ބަލަހައްޓަވަނީ
ސަނީފުގެ ސުވާލުގައި އެއްސެވީ އޯސިސް އިންފްރާ ސްޓްރަކްޗާ އެލަޔަންސް، އިން ތިނަދޫއަށް ގެންގޮސްފައި ހުރި މުދާތަކަކީ ޕްލޭނިން މިނިސްޓްރީގެ މުދާތަކެއްތޯ އެވެ. ނޫނީ އެއީ ދިވެހި ދައުލަތުގެ މުދާތަކެއްތޯއާއި ތިނަދޫ ކައުންސިލާ މަޝްވަރާކޮށްގެން، އެ މުދާތަކާ މެދު ގޮތެއް ނުނިމި ހުއްޓާ އެހެން ތަންތަނަކަށް ގެންދަނީ ކޮން އުސޫލަކުންތޯ ވެސް އޭނާ އެއްސެވި އެވެ.
އެ ސުވާލަށް ޖަވާބުދެއްވަން ފައްޓަވަމުން އަސްލަމް ވިދާޅުވީ އެ ތަކެއްޗަކީ ދައުލަތުން ތިނަދޫގައި ހިންގަން އުޅުނު މަޝްރޫއަކަށް ގެންދިޔަ ތަކެތި ކަމަށެވެ. އެ ވާހަކައިގެ ތެރެއަށް ނަޝީދު ވެންނެވީ ޖަވާބުގެ މެދު ތެރެއިންނެވެ.
"އިއްޒަތްތެރި ރައީސް އެ މަސައްކަތް އަަޅުގަނޑު މިކުރިއަށް ގެންދަނީ،" ސާފު ބަހުން ޖަވާބު ދެއްވަން ނަޝީދު ވިދާޅުވުމުން އަސްލަމް ވިދާޅުވި އެވެ.
"އުހުން، ފުރަތަމަ ތިޔަ ވިދާޅުވީ އެއީ ދައުލަތުގެ އެއްޗެކޭ،" އަސްލަމްގެ ވާހަކަ ދެވަނަ ފަހަރަށް ހުއްޓުވާފައި ނަޝީދު ވިދާޅުވި އެވެ.
އަސްލަމް ވިދާޅުވީ އެެއީ ދައުލަތުުން ކުރިއަށް ގެންދަން އުޅުނު މަޝްރޫއެއް ހިންގަން ހަވާލުވި ބަޔަކު ތިނަދޫއަށް ގެންދިޔަ ތަކެތި ކަމަށާއި އެ މަޝްރޫއު ކުރިއަށް ނުދިޔަ ކަމަށެވެ. ތަކެތި އެހެން ތަނަކަށް ގެންދިޔައީ އެހެންވެ ކަމަށް ވެސް އޭނާ ވިދާޅުވި އެވެ.
ސުވާލުގެ ވަށައިގެން އިތުރު ވާހަކަތަކެއް ދައްކަވާ ކަމުގެ ތުހުމަތު
އަސްލަމް ޖަވާބު ދެއްވި ގޮތާ މެދު ނަޝީދު މިއަދު ފުރަތަމަ ނުރުހުންފާޅުކުރެއްވީ ކާށިދޫ ދާއިރާގެ މެމްބަރު އަބްދުﷲ ޖާބިރު ކުރެއްވި ސުވާލަށް ޖަވާބު ދެއްވަން ފެއްޓެވި ވަގުތުގަ އެވެ. ޖާބިރު ދެ ސުވާލެއް ކުރެއްވި އިރު ދެވަނަ ސުވާލުގައި އެއްސެވީ ރައީސް އިބްރާހީމް މުހައްމަދު ސޯލިހު ދެވަނަ ދައުރަކަށް ކުރިމަތިލައްވާކަން އިއުލާނުކުރައްވާފައި ވާއިރު އެމަނިކުފާނުގެ ވައުދުތައް ފުއްދިއްޖެތޯ އެވެ.
އެ ސުވާލަށް ޖަވާބު ދެއްވަމުން އަސްލަމް ވިދާޅުވީ ސަރުކާރުގެ ވައުދުތައް ފުއްދަން އޭނާ ބާރަށް މަސައްކަތް ކުރައްވަމުން ގެންދަވާ ކަމަށެެވެ. އެހެން ނަމަވެސް ފުއްދިފައި ވަނީ ވައުދުތަކުގެ ކިތައް ޕަސެންޓްކަން ވިދާޅުނުވާނެ ކަމަށެވެ.
"އިއްޒަތްތެރި ވަޒީރު، އިއްޒަތްތެރި މެމްބަރުގެ ސުވާލަށް ޖަވާބެއް ދެއްވުން ބޭނުންތެރި، ކޮންމެ ސުވާލެއްގެ ވަށައިގެން ވަރަށް ދިގު އިތުރު ވާހަކަ ދެއްކުމުގެ ބަދަލުގައި، ސާފު ސާދާކޮށް ސުވާލަށް ޖަވާބު ދެއްވުން އެދެން،" އަސްލަމްގެ ވާހަކައިގެ މެދު ތެރެއިން ނަޝީދު ވިދާޅުވި އެެވެ.
ވައުދުތަކާ ބެހޭ ގޮތުން މީގެ ކުރިން އެހެން ޖަލްސާއެއްގައި މެމްބަރަކު އަސްލަމާ ސުވާލުކުރެއްވުމުން، އޭނާ ޖަވާބު ދެއްވަން ފުރުސަތު ދެއްވުމުގެ ކުރިން ނަޝީދު ވިދާޅުވީ "ވައުދުތައް ފުއްދާނެ ކަމާ މެދު ޝައްކުނުކުރާ" ކަމަށެވެ.
އަސްލަމްގެ ބައެއް ޖަވާބުތަކާމެދު ނަޝީދުގެ ހިތްހަމަނުޖެހުން ފާހަގަވެފައިމިވަނީ، އަންނަ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއީދު ކުރައްވާ ކަމަށް ވިދާޅުވެ، މިހާތަނަށް ނުކުންނެވި ވަޒީރުންގެ ތެރޭގައި އަސްލަމް ވެސް ހިމެނިވަޑައިގެންފައިވާ ވަނިކޮށެވެ.
