މާލޭ ރައްޔިތުންނަށް ދޫކުރާ ގޯތިތަކަށް ކުރިމަތިލުމުގެ ފުރުސަތު މިމަހުގެ 26 ގައި ހުޅުވައިލެވޭނެ ކަމަށް އުއްމީދުކުރައްވާ ކަމަށް ހައުސިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ މާލޭ ރައްޔިތުންނަށް ބޯހިޔާވަހިކަން ފޯރުކޮށްދިނުމަށްޓަކައި ކުރަމުން އަންނަ އެއް މަސައްކަތަކީ މެދު ފަންތީގެ އާމްދަނީ ލިބޭ ފަރާތްތަކަށް ދޫކުރާ ހައުސިން ޔުނިޓްތަކެއް ދޫކުރާނެ ފަރާތްތައް ކަނޑައެޅުން ކަމަށެވެ. އެއީ އޭނާ ވިދާޅުވި ގޮތުގައި 1،340 ހައުސިން ޔުނިޓެއްގެ މަސައްކަތެވެ. އެއީ މިހާރު ނިމުމުގެ މަރުހަލާގައިވާ ކަމެއް ކަމަށާއި އޭގެ އިތުރުން 4،000 ހައުސިން ޔުނިޓެއްގެ މަސައްކަތް ބާރަށް އެބަ ކުރިއަށް ދާ ކަމަށް ވެސް އޭނާ ވިދާޅުވި އެވެ.
"މާލެ ސަރަހައްދުން ގޯތި ދިނުމުގެ މަސައްކަތް ދެން އޮތީ. އެ މަސައްކަތް، ރައީސުލް ޖުމްހޫރިއްޔާ ދާދި ފަހުން އިއުލާނުކުރައްވާފައި ވަނީ މިމަހުގެ ތެރޭގައި އެކަމަށް ކުރިިމަތިލުމަށް ފުރުސަތު ހުޅުވައިލާނެ ކަމަށް. އަޅުގަނޑު މި އުއްމީދުކުރަނީ 26 ގައި އެ އިއުލާނު އަޅުގަނޑުމެންނަށް ކުރެވިގެންދާނެ ކަމަށް،" އަސްލަމް ވިދާޅުވި އެވެ.
މާލެ ސަރަހައްދަށް އަމާޒުކޮށް ސަރުކާރުން ކުރިއަށް ގެންދާ އަދި ރާވާފައިވާ މަޝްރޫއުތަކުގެ ތަފްސީލު، ރައީސް ސޯލިހު ދެއްވީ ރައްޔިތުންގެ މަޖިލިސް މިއަހަރަށް ހުޅުވަން މިދިޔަ އޭޕްރިލްމަހު ބޭއްވި ޖަލްސާގައި ދެއްވި ރިޔާސީ ބަޔާނުގަ އެވެ.
އެގޮތުން، ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދޭނެ ކަމަށް ރައީސް އެ ދުވަހު އިއުލާނުކުރެއްވި އެވެ.
ގިނަ ދުވަސް ތަކަކަށްފަހު މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ ކުރިން އިއުލާން ކުރެވި މާލޭގެ ރަށްވެހިންނަށް ބޯހިޔާވަހި ކަމާއި ގެދޮރުވެރިކަން ހޯދައިދިނުމަށް ހިންގާ މަޝްރޫއުގެ އަމަލީ މަސައްކަތް މި މަހު ފެށިގެން ދާނެ ކަމަށެވެ.
