ރާއްޖޭގައި ކޮވިޑް ކޭސްތައް ފެންނަ މިންވަރު އަނެއްކާ ވެސް އިތުރުވާން ފަށާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ އިއްޔެ އެވެ.

ރާއްޖޭން ކޮވިޑް ފެނުމާއެކު މާލެ ސިޓީ ލޮކްޑައުންކޮށް 2020 ވަނަ އަހަރު ތެރޭ ބޮޑެތި ފިޔަވަޅުތަކެއް އަޅަމުން ދިޔަ އެވެ. އެކި ދުވަސްވަރު ކޮވިޑްގެ ކޭސްތައް އިންތިހާއަށް ގިނަވުމުން ވަރަށް ހަރުކަށި އުސޫލުތައް ވެސް ގެންގުޅުނެވެ.

ނަމަވެސް, މި އަހަރުގެ މާޗް މަހުގެ ތެރޭގައި ރާއްޖޭގައި ކޮވިޑްގެ ހާލަތު އާންމު ހާލަތަކަށް އައިކަން އިއުލާންކުރި އެވެ. އަދި ދެ އަހަރަށްފަހު ސިއްހީ ކުއްލި ނުރައްކަލުގެ ހާލަތު އުވާލައި, މާސްކު އެޅުން މަޖުބޫރުކޮށްފައި އޮތް އޮތުން ނިމުމަކަށް ގެނަ އެވެ.

އޭގެފަހުން, ރާއްޖޭގައި ކޮވިޑް ކޭސްތައް ފެންނަ މިންވަރު ދަށްވެފައި އޮތުމަށްފަހު އަނެއްކާވެސް ކޭސްތައް ގިނަވަމުންދާކަން ތަފާސްހިސާބުތަކުން ވަނީ ދައްކާފަ އެވެ. އެޗްޕީއޭއިން މިއަދު ނެރުނު ބަޔާނެއްގައި ބުނީ މިދިޔަ ހަފުތާ ކޮވިޑްގެ 142 ކޭސް ފެނިފައިވާ ކަމާއި އެއީ އޭގެ ކުރީ ހަފުތާއާ އަޅާބަލާއިރު 69 ޕަސެންޓްގެ އިތުރުވުމެއް ކަމަށެވެ.

"...މިއާއެކު ސާމްޕަލް ޕޮސިޓިވިޓީ އާއި ހޮސްޕިޓަލްގައި އެނދުމަތި ކޮށްގެން ފަރުވާދޭ މީހުންގެ އަދަދު ވެސް އިތުރުވަމުންދާކަން ވަނީ ފާހަގަކުރެވިފައި," އެޗްޕީއޭއިން ބުންޏެވެ.

މިދިޔަ މެއި މަހު އެނދުމަތިކޮށްގެން ކޮވިޑް ބަލީގައި ފަރުވާދީފައިވަނީ ޖުމްލަ 15 މީހުންނަށެވެ. ނަމަވެސް, މި ޖޫން މަހުގެ މިހާތަނަށް 12 މީހަކު އެނދުމަތިކޮށްގެން ފަރުވާދޭން ޖެހުނުކަން އެޗްޕީއޭއިން ފާހަގަކުރެ އެވެ.

އެހެންވެ, އެޗްޕީއޭއިން ވަނީ ކޮވިޑުން ރައްކާތެރިވުމަށް ސަމާލުވުމަށް އަންގާފަ އެވެ. އެގޮތުން;

• ބަލީގެ އެއްވެސް އަލާމާތެއް ފެނިއްޖެނަމަ، ވީހާ އަވަހަކަށް އެހެން މީހުންނާ އެކަހެރިވެ، ޓެސްޓް ކުރުން
• މާސްކް އެޅުން: ހާއްސަކޮށް ބަލީގެ އަލާމާތްތައް ހުރި ފަރާތްތަކުން އަދި ބަލީގެ ސަބަބުން ނުރައްކާވެދާނެ ފަރާތްތަކާއި އެފަދަ ފރާތްތަކާއެކު ދިރިއުޅޭ ނުވަތަ އެފަދަ މީހުން ބަލަހައްޓާ މީހުންނާއި ސިއްހީ ހިދުމަތްދޭ މަރުކަޒުތަކުގަ އާއި އެތަންތަނަށް ޒިޔާރަތް ކުރާއިރު.
• ވެކްސިންގެ ޑޯޒުތައް ފުރިހަމަ ނުވާ ފަރާތްތަކުން ވެކްސިން ފުރިހަމަ ކުރުން: 12 އަހަރުން މަތީގެ ފަރާތްތަކަށް ވެކްސިންގެ ދެ ޑޯޒް އަދި 18 އަހަރުން މަތީގެ ފަރާތްތަކުގެ ތެރެއިން ދެ ޑޯޒް ފުރިހަމަކޮށް، ހަ މަސްވެފައިވާ މީހުން ބޫސްޓާ ޖެހުން.

އެޗްޕީއޭއިން ބުނި ގޮތުގައި ޕެންޑެމިކްގެ ހާލަތު އަދިވެސް ދެމިއޮތްއިރު ބައެއް ގައުމުތަކުގައި ވެސް ކޮވިޑްގެ ހާލަތު އަނެއްކާވެސް ދަނީ ގޯސްވަމުންނެވެ. ނަމަވެސް, ރާއްޖޭގައި ކޮވިޑްގެ ހާލަތު ގޯސްވިޔަ ނުދިނުމަށްޓަކައި ބަލީގެ ނުރައްކާ މީހުންނާއި އެހެން މީހުން ވެސް ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކުރާ ކަމަށް އެޗްޕީއޭއިން ބުންޏެވެ.

ބައެއް މުހިންމު ހަބަރުތައް

• އެމްޑީޕީ ޕާލިމެންޓްރީ ގްރޫޕުން ނެރޭ ވިޕްލައިންތަކާ ހިތްހަމަނުޖެހޭކަން ފާޅުކުރައްވައި, އެމްޑީޕީގެ ރައީސް މުހައްމަދު ނަޝީދަށް ތާއިދު ކުރައްވާ މެންބަރުން އެ ވިޕްލައިންތަކާ ހިލާފަށް އަމަލު ކުރައްވާނެކަން އިއުލާނުކުރެއްވީ އިއްޔެ އެވެ.

• ކުރީގެ ރައީސް އަބްދުﷲ ޔާމީނާއި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމްގެ މައްޗަށް ހިންގާ ޝަރީއަތުގައި، ޔާމީންގެ ފަރާތުން ހުށަހެޅި ޝަރީއަތުގެ ކުރިން ހުށަހަޅާ ހުށަހެޅުންތައް ބޭރުކޮށްލަން ކްރިމިނަލް ކޯޓުން ނިންމި މައްސަލަ ހައިކޯޓަށް ބަލައިނުގަންނަން ނިންމީ އިއްޔެ އެވެ.

• ޕްރޮސިކިއުޓާ ޖެނަރަލް ހުސެއިން ޝަމީމް މަގާމުން ވަކިކުރުމުގެ މައްސަލަ ރައްޔިތުންގެ މަޖިލީހަށް ހުށަހަޅަން އެމްޑީޕީ ޕާލިމެންޓްރީ ގްރޫޕުން ނިންމީ އިއްޔެ އެވެ.

ދުވަހުގެ ކޯޓޭޝަން

އެމްޑީޕީ ޕާލިމެންޓްރީ ގްރޫޕުން ނެރޭ ވިޕްލައިންތަކާ ހިތްހަމަނުޖެހޭކަން ފާޅުކުރައްވައި, އެމްޑީޕީގެ ރައީސް މުހައްމަދު ނަޝީދަށް ތާއިދު ކުރައްވާ މެންބަރުން އެ ވިޕްލައިންތަކާ ހިލާފަށް އަމަލު ކުރައްވާނެކަން އިއުލާނުކުރައްވަމުން ވިދާޅުވީ:

...އާންމު މެންބަރުންނަށް ސާފުވާނެ އަޅުގަނޑުމެން އެގޮތަށް ވޯޓުލާ ސަބަބު, އަޅުގަނޑު އުއްމީދުކުރަނީ އާންމު މެންބަރުން އަޅުގަނޑުމެން ޕާޓީން ވަކި ނުކުރާނެ ކަމަށް,

ދުވަހުގެ ފޮޓޯ

ވޮލީބޯލް އެސޯސިއޭޝަން ކަޕްގައި ދިވެހި ސިފައިންގެ ކްލަބާއި ސްޕޯޓްސް ކްލަބް ސިޓީ ބައްދަލުކުރި މެޗުގައި ގައުމީ ޓީމުގެ ސްޕައިކަރު ހުޒަންޓޭ ބޯޅަ ފޮނުވާލަނީ. އެންމެފަހުގެ ޗެމްޕިއަން ކަމަށްވާ ސިފައިންގެ ކްލަބް އަތުން ސްޕޯޓްސް ކްލަބް ސިޓީ މޮޅުވީ ސީދާ ތިން ސެޓުން --- ފޮޓޯ: އަދަދު