ތުއްތު ދަރިފުޅުގެ ހަޔާތުގެ ފުރަތަމަ 100 ދުވަހަށް ހާއްސަކޮށް އެސްޓީއޯ އިން ތައްޔާރު ކޮށްފައިވާ "ތުއްތު ދަރިފުޅު" ފޮތް ލޯންޗުކޮށްފި އެވެ.
މިއީ ކުޑަދަރިފުޅުގެ ހަޔާތުގެ ފުރަތަމަ ދުވަސްވަރު ދިމާވެދާނެ ކަންތައްތަކާއި، އަދި އެކަންތައްތަކާ ގުޅިގެން އަމަލުކުރަންވީ ގޮތުގެ މުއަލޫމާތު އެކުލެވޭނެހެން، އާއިލާތަކުގެ ހޭލުންތެރިކަން އިތުރުކޮށްދިނުމުގެ މަގުސަދުގައި ތައްޔާރުކޮށްފައިވާ ފޮތެއް ކަމަށް އެސްޓީއޯ އިން ބުނެ އެވެ.
ހޮސްޕިޓަލުގައި ތުއްތު ދަރިފުޅު އުފަންވާ ވަގުތު ދެވޭ ފަރުވާއިން ފެށިގެން، ހޮސްޕިޓަލުން ދޫކޮއްލުމަށްފަހު ދަރިފުޅު ގެންގުޅުމުގައި ސަމާލުކަންދޭންޖެހޭ ކަންކަން މި ފޮތުގައި ވަރަށް ތަފްސީލުކޮށް ހިމަނާފައިވާނެ ކަމަށް ވެސް އެސްޓީއޯ އިން ބުންޏެވެ.
އެގޮތުން، ދަރިފުޅަށް ގާތުން ދިނުމާއި ބެހޭގޮތުން އެންގެންޖެހޭ މުހިއްމު މައުލޫމާތުތައް އަދި ފުރަތަމަ ދުވަސްކޮޅުގައި ދަރިފުޅުގެ ހެދިބޮޑުވުމަށް އަންނާނެ ތޮބީއީ ބަދަލުތަކުގެ ތަފްސީލު ވެސް ހިމަނާފައިވެ އެވެ.
އޭގެ އިތުރުން، ފުރަތަމަ ދުވަސްކޮޅުގައި ދަރިފުޅުގެ ހަށިގަނޑު ތަޖުރިބާ ކުރާނެ ކަންތައްތަކާއި އަދި މި ކަންކަމުގައި އާއިލާއިން ކަންކުރަންވީ ގޮތް ވެސް ހިމަނާފައިވެ އެވެ. އަދި، ދަރިފުޅުގެ މަންމަ ދުޅަހެޔޮ ސިއްހަތެއްގައި ހުރުމަށް ސަމާލުކަން ދޭންވީ ކަންކަންވެސް މި ފޮތުގައި ހިމެނިފައިވެ އެވެ.
މި ފޮތް އެސްޓީއޯ އިން ތައްޔާރުކުރީ ރާއްޖޭގައި އެންމެ ފާހަގަކޮށްލެވޭ ކުޑަކުދިންގެ ޑޮކްޓަރު ކަމަށްވާ ޑރ. އަބްދުﷲ ނިޔާފްގެ އެހީތެރިކަމާ އެކު އެވެ.
ކުރިއަށް އޮތް ތަނުގައި، އެސްޓީއޯއިން އަލަށް އުފަންވާ ކުދިންނަށް ދޭ ހަދިޔާ ގެ ތެރޭގައި "ތުއްތު ދަރިފުޅު" ފޮތް ހިމަނާނެ ކަމަށް އެ ކުންފުނިން ބުންޏެވެ.
