ވެރިކަން ކުރާ މައި ޕާޓީ، އެމްޑީޕީގެ ކޮންގްރެސްއާ ދިމާކޮށް އެ ޕާޓީގެ އަސާސީ ގަވާއިދަށް އިސްލާހު ހުށަހަޅަން ބޭނުންވާ އެ ޕާޓީގެ މެންބަރުންނަށް އެ ފުރުސަތު ހުޅުވާލައިފި އެވެ.

އެމްޑީޕީގެ ސެކްރެޓޭރިއެޓުން ނެރުނު އިއުލާނެއްގައިވާ ގޮތުން އެ ފުރުސަތު ހުޅުވާލާފައި ވަނީ މިއަދުން ފެށިގެން މި ހިނގާ ޖޫން މަހުގެ ނިޔަލަށެވެ. ސުންގަޑިއަކީ ޖޫން 30 ގެ މެންދުރު 2:00 ޖަހާއިރު ކަމަށެވެ.

ގޫގަލް ފޯމެއް މެދުވެރިކޮށް އިސްލާހު ހުށަހަޅަން ހުޅުވާލާފައިވާއިރު، އިސްލާހު ހުށަހަޅާ މާއްދާ ނުވަތަ މާއްދާތައް އެނގޭނެ ގޮތަކަށް އެއް ފޯމަކުން ހުށަހަޅަން އެދިފައިވެ އެވެ.

"އިސްލާހުގެ ޕީޑީއެފް އަދި ވާރޑް ފައިލްވެސް އެޓޭޗް ކުރެއްވުން އެދެމެވެ." ރާއްޖޭގައި އެންމެ މެންބަރުން ގިނަ ޕާޓީގެ ގޮތުގައި އިލެކްޝަންސް ދަފްތަރުގައި އޮތް އެމްޑީޕީން ނެރުނު ބަޔާނުގައިވެ އެވެ.

އެމްޑީޕީގެ ކޮންގްރެސް އޮންނާނީ އަންނަ އޮގަސްޓް މަހު 19 ގަ އެވެ. ކޮންގްރެސްގައި ބައިވެރިވެވެނީ އިލެކްޝަންސް ކޮމިޝަން (އީސީ)ގެ ދަފްތަރުގައި ތިބި މެންބަރުންނަށެވެ. އީސީގެ ދަފްތަރުގައި އެ ޕާޓީގެ މެންބަރުންތަކެއް ނެތް މައްސަލަ ފެންމަތިވެ އެ ކަމުގެ ކަންބޮޑުވުން ވެސް ވަނީ އިތުރުވެފަ އެވެ.

ކޮންގްރެސްގެ ކުރިމަތީގައި ބޮޑެތި ނިންމުންތަކެއް

"ދެވަނަ އުކުޅަސް ކޮންގްރެސް" ގައި ރާއްޖޭގެ ވެރިކަން ކުރާ ނިޒާމް ބަރުލަމާނީ ނިޒާމަށް ބަދަލުކޮށް, ރިޔާސީ އިންތިހާބެއްގައި ދެވަނަ ބުރެއްގެ ވޯޓަކަށް ނުގޮސް އިންތިހާބު ކާމިޔާބު ކުރެވޭނެ މަގެއް ކަނޑައަޅެމުގެ މަސައްކަތާ ގުޅޭ ގޮތުން މަޝްވަރާކޮށް ނިންމުންތައް ނިންމަން ވަނީ ތާވަލުކޮށްފަ އެވެ.

ގާނޫނު އަސާސީ އަށް ގެންނަން އެފަދަ ބަދަލުތަކެއް ހުށަހެޅުއްވީ އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ.

ގާނޫނުއަސާސީއަށް ގެންނަން ނަޝީދު ބޭނުންވާ ބަދަލުތައް

• މިނިވަން މުއައްސަސާތަކުގެ އަދަދާ އެކުލެވިގެން ވާގޮތަށް ގެންނާން ޖެހޭ އިސްލާހުތައް ކޮންގްރެސްއިން ފާސްކުރުން. (ހާއްސަ ގޮތެއްގައި ޖުޑިޝިއަލް ސާވިސަސް ކޮމިޝަން އެކުލެވިގެންވާ ގޮތަށް ގެނަން ޖެހޭ އިސްލާހުތައް.)

• ސުޕްރީމް ކޯޓުގެ ފަނޑިޔާރުންގެ އަދަދު ގާނޫނުއަސާސީގައި ކަނޑައެމަށް ނިންމާ ނިންމުން.

• ވާދަކުރާ ކެންޑިޑޭޓުންގެ ތެރެއިން އެންމެ ގިނަ ވޯޓް ލިބޭ ކެންޑިޑޭޓަކީ ޖުމްލަ ވޯޓްގެ 30% އަށް ވުރެން މަދު ނޫން އަދަދަކަށް ވޯޓް ހޯދާފައިވާ ކެންޑިޑޭޓެއްނަމަ، އެ ކެންޑިޑޭޓްއަކީ މޮޅުވި ކެންޑިޑޭޓްގެ ގޮތުގައި ގާނޫނުއަސާސީގައި ކަނޑައެޅުމަށް ކޮންގްރެސްއިން ނިންމުން.

• (މިފަދަ ކަނޑައެޅުމެއްގައި، އެއްވެސް ކެންޑިޑޭޓްއަކަށް 30% ގެ މިންވަރަށް ވޯޓް ނުލިބިއްޖެނަމަ އެންމެ ގިނަ ވޯޓް ހޯދާ ދެ ކެންޑިޑޭޓުންގެ މެދުގައި ދެވަނަ ބުރަކަށް ވޯޓް ނަގާ އެންމެ ގިނަ ވޯޓް ހޯދި ކެންޑިޑޭޓް އެއީ މޮޅުވި ކެންޑިޑޭޓްގެ ގޮތުގައިވެސް ގާނޫނުއަސާސީގައި ކަންޑައެޅުން.)

• ގާނޫންއަސާސީގައި ކަނޑައަޅާނެ ލާކާމަރުކަޒީ އިތުރު އުސޫލްތައް ކަނޑައެޅުން.

• ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓެއް ނެގުމަށާއި އަދި އެފެންނަ ނުފެންނަ ވޯޓް ނަގާނެ ތާރީހެއް، އަދި ނެގޭ ފެންނަ ނުފެންނަ ވޯޓުގެ ނަތީޖާ އާއި އެއްގޮތައް ގާނޫނުއަސާސީގެ ވެރިކަމުގެ ނިޒާމް ކަނޑައެޅުމަށް ކޮންގްރެސްއިން އެއްބަސްވުން.