އެއްފަހަރު ބޭނުން ކުރާ ޕްލާސްޓިކުގެ ބާވަތްތައް ޖޫން މަހުން ފެށިގެން ރާއްޖެއަށް އެތެރެކުރުން މަނާ ކުރުމަށް ރައީސް އިބްރާހިމް މުހައްމަދު ސޯލިހު މިދިޔަ ޑިސެމްބަރު މަހު ނެރުއްވި ގަރާރަށް އިއްޔެ އަމަލު ކުރަން ފަށައިފި އެވެ.
އެކި މަރުހަލާތަކަށް ބަހާލައިގެން ޕްލާސްޓިކް ރާއްޖޭގައި އުފެއްދުމާއި މަނާ ކުރުމުގެ ކަންކަން ކުރިއަށް ގެންދާއިރު، އިއްޔެއިން ފެށިގެން އަށް ބާވަތެއްގެ ތަކެތި މަނާވާނެ އެވެ.
ޖޫން މަހުން ފެށިގެން އެތެރެ ކުރުން މަނާ ތަކެތި
- ޕްލާސްޓިކް ހޮޅި
- ޕްލާސްޓިކް ތަށި، ސަމުސާ، ވަޅި، އޫ، ޕްލާސްޓިކް ދަނޑިކޮޅު
- ސްޓައިރަފޯމް (ޕާރުސަލް) ފޮށި
- 30 ސެންޓިމީޓަރަށްވުރެ ކުދި ޕްލާސްޓިކް ކޮތަޅު
- ޕްލާސްޓިކްގައި ބަންދުކޮށްފައި ހުންނަ ސުޕާރީ
- 250 މިލިލީޓަރަށްވުރެ ކުޑަ ޕްލާސްޓިކް ތަށި
- ޕްލާސްޓިކް ދަނޑިކޮޅު ލާފައިވާ ކަފަބުރު
- 50 މިލިލީޓަރާއި 50 މިލިލީޓަރަށްވުރެ ކުދި ޝޭމްޕޫ އާއި ސައިބޯނި ފުޅި
- 500 މިލިލީޓަރަށްވުރެ ކުދި ޕީއީޓީ ފުޅީގައި ބަންދުކޮށްފައި ހުންނަ ބުއިމަށް ބޭނުންކުރާ ހުރިހާ ދިޔާ ތަކެތި (ފެނާއި ލުއިބުއިން ހިމެނޭގޮތަށް)
މީގެ އިތުރުން ދެ ވައްތަރެއްގެ ޕްލާސްޓިކް އުފެއްދުން ވެސް އިއްޔެއިން ފެށީގެން ރާއްޖޭގައި އުފެއްދުން މަނާ ވާނެ އެވެ. އޭގެ ތެރޭގައި ހިމެނެނީ 500 މިލިލީޓަރަށްވުރެ ކުދި، ޕްލާސްޓިކު ފުޅީގައި ބަންދުކޮށްފައި ހުންނަ ފެނާއި އެ ސައިޒުގެ ފުޅީގައި ބަންދު ކުރާ ތައްޔާރީ ބުއިންތަކެވެ. މި ތަކެތި އުފެއްދުން މަނާ ކުރި ނަމަވެސް، ބާޒާރަށް ނެރުން މަނާ ވާނީ އަންނަ ސެޕްޓެމްބަރު މަހުން ފެށިގެންނެވެ.
އެންވައިރަމެންޓް މިނިސްޓްރީން ބުނި ގޮތުގައި އެއް ލީޓަރާއި އަދި އެއަށް ވުރެ ކުދި ސައިޒުގެ ޕްލާސްޓިކް ފުޅީގައި ބަންދުކުރާ ފެން، އަންނަ އަހަރުގެ ނިޔަލަށް ރާއްޖޭގައި އުފެއްުދުން މަނާ ކުރެވި، 2024 ވަނަ އަހަރުގެ މާޗު މަހުން ފެށިގެން ބާޒާރަށް ނެރުން ހުއްޓުވޭނެ އެވެ.
އެއްފަހަރު ބޭނުން ކުރާ ޕްލާސްޓިކުގެ ބާވަތްތައް ރާއްޖޭގައި އުފެއްދުމާއި އެތެރެކުރުން މަނާ ކުރި ނަމަވެސް ކުދި ވިޔަފާރިތަކުގައި އުފައްދާތަކެތި ބަންދުކުރުމަށް ބޭނުންކުރާ ޕްލާސްޓިކުގެ ބާވަތްތައް އޭގެ ތެރޭގައި އިސްތިސްނާ ވާނެ އެވެ.
އެއްފަހަރު ބޭނުން ކުރާ ޕްލާސްޓިކުގެ ބައެއް ބާވަތްތައް ރާއްޖެ އެތެރެކުރުން މަނާ ކުރުމަށް އިމްޕޯޓް/އެކްސްޕޯޓް ގާނޫނަށް ގެނައި އިސްލާހު ގެޒެޓުކޮށްފައި ވަނީ މިދިޔަ ޑިސެމްބަރު، 22، ގަ އެވެ.
ސިންގަލް ޔޫސް ޕްލާސްޓިކް ރާއްޖޭގައި ބޭނުން ކުރުން 2023 ވަނަ އަހަރުގެ ނިޔަލަށް ހުއްޓާލާނެކަން އދ. ގެ އާއްމު މަޖިލީހުގެ 74 ވަނަ ބައްދަލުވުމުގެ ހަވާސާގައި ސެޕްޓެމްބަރު 23، 2019 ވަނަ ދުވަހު ބޭއްވި ކްލައިމެޓް ސަމިޓުގައި ރައީސް އިބްރާހިމް މުހައްމަދު ސޯލިހް ވަނީ އިއުލާނު ކުރައްވައިފަ އެވެ.
