މި ފަހަރުގެ ވޮލީބޯޅަ ސީޒަނުގައި ގުޑީސް ސްޕޯޓްސް ކްލަބްގެ ކޯޗަކަށް ރާއްޖޭގެ ފިރިހެން ވޮލީބޯޅަ ޓީމަށް މިހާތަނަށް ގެނައި އެންމެ މަތީ ފެންވަރުގެ ކޯޗު ސާބިއާގެ މިލޮރަޑް ކިޔާޗް ހަމަޖައްސައިފި އެވެ.
ގުޑީސްގެ ކޯޗަކަށް މިލޮރަޑް ހަމަޖެއްސިއިރު، މިއީ ރާއްޖޭގެ ލޯކަލް ވޮލީ ޓީމަކުން މަތީ ފެންވަރުގެ ކޯޗެެއް ފެންނާނެ ފުރަތަމަ ފަހަރެވެ. މިލޮރަޑް ވަނީ 2019 ވަނަ އަހަރުން ފެށިގެން 2020 ވަނަ އަހަރުގެ ކުރީކޮޅާ ހަމައަށް ގައުމީ ފިރިހެން ޓީމަށް ކޯޗުކޮށްދީފަ އެވެ. އެ ގޮތުން ގައުމީ ޓީމުން 2019 ވަނަ އަހަރުގެ ސައުތު އޭޝިއަން ގޭމްސްގައި ވާދަކޮށްފައިވަނީ މިލޮރަޑްގެ އިރުޝާދުގެ ދަށުންނެވެ.
މިލޮރަޑް، ގައުމީ ފިރިހެން ޓީމަށް އިރުޝާދުދިންއިރު، އަންހެން ޓީމަށް ވެސް ޓެކްނިކަލް އެހީތެރިކަން ފޯރުކޮށްދީފައިވެ އެވެ.
ޔޫގޯސްލާވިއާ އާއި ސާބިއާ ޓީމުގެ ސެޓަރަކަށް މީގެ ކުރިން ކުޅުނު މިލޮރަޑް އޭނާގެ ކޯޗިން ކެރިއަރު ފަށާފައިވަނީ 1989 ވަނަ އަހަރު އެވެ. ސާބިއާގެ އެކި ޓީމުތަކަށް ކޯޗުކޮށްއިރު އަށް ފަހަރު އެ ގައުމުގެ ޗެމްޕިއަންކަން ހޯދައިދިނުމަށް ފަހު އޭނާގެ ފުރަތަމަ ބޮޑު މަސައްކަތަކީ ޔޫގޯސްލާވިއާ ޖޫނިއާ ޓީމުތަކުގެ ކޯޗުކަމެވެ.
އޭގެ ފަހުން، ޔޫގޯސްލާވިއާ ޓީމު ގޮވައިގެން 1996 ވަނަ އަހަރު ވޯލްޑް ކަޕްގެ ތިން ވަނަ ހޯދި އެވެ. ފަހުން ބަލްގޭރިއާގެ ކްލަބްތަކަށް ކޯޗުކޮށްދީ އެ ގައުމުގެ ޗެމްޕިއަންކަން ވެސް ހޯދައި ބަލްގޭރިއާ ގައުމީ ޓީމާ ހަވާލުވީ 2002 ވަނަ އަހަރު އެވެ. އަދި އެ ޓީމު ގޮވައިގެން ވޯލްޑް ލީގުގެ ފަސް ވަނަ ހޯދި އެެވެ. އޭނާ އީރާން ޓީމާ ހަވާލުވީ 2006 ވަނަ އަހަރު އެވެ. އޭގެ ފަހުން ޔޫއޭއީގެ ކްލަބްތަކުގައި ވެސް ވަނީ މަސައްކަތްތަކެއް ކޮށްފަ އެވެ.
ގުޑީސްގައި މި ފަހަރު ހިމެނޭ ފާހަަކޮށްލެވޭ ކުޅުންތެރިންނަކީ، ގައުމީ ޓީމުގެ ސެޓަރު، ހުސެއިން ވިޝާމް (ބުޅިކެ) އާއި އޭނާގެ ކޮއްކޮ، ހަސަން ނިލާމް (ޕާޓޭ) ހިމެނެ އެވެ.
ސިޓީގެ އެސިސްޓަންޓް ކޯޗެއްގެ ގޮތުގައި ފެނިގެންދާނީ ލަންކާގެ ވޮލީބޯޅަ ކޯޗު ސްމިތު ޖަޔާލާލް.
ސިޓީގެ ބެންޗުން ލަންކާގެ ވޮލީ ތަޖުރިބާކާރެއް
މި ފަަހަރުގެ ވޮލީބޯޅަ ސީޒަނުގައި ޓީމުތަކަށް ކޯޗުކޮށްދޭން މެޖޯރިޓީ ތިބީ ދިވެހި ކޯޗުންނާއި ކޯޗިން ސްޓާފުންނެވެ. އެހެން ނަމަވެސް ބޭރުގެ ދެ ތަޖުރިބާކާރަކު ވެސް ވޮލީ ސީޒަނުގައި ހަރަކާތްތެރިވާނެ އެވެ. އެ ގޮތުން ގުޑީސްގެ ކޯޗު މިލޮރަޑްގެ އިތުރުން ދެން ފެންނާނެ ބިދޭސީ ކޯޗަކީ، ސިޓީގެ އެސިސްޓަންޓް ކޯޗުގެ ގޮތުގައި މަސައްކަތް ކުރަން ހަމަޖެހިފައިވާ، ސުމިތު ޖަޔަލާލް އެވެ.
ސުމިތު، 55، ވަނީ މީގެ ކުރިން ލަންކާގެ އެކި ލެވަލްގެ ޓީމުތަކަށް ކޯޗުކޮށްދީފަ އެވެ. އެ ގޮތުން ލަންކާ ގައުމީ އަންހެން ޓީމުގެ ހެޑް ކޯޗުގެ މަގާމުގައި ދާދި ފަހުން ވެސް ހުރި ސުމިތު ވަނީ ލަންކާގެ ފިރިހެން ޓީމުގެ ވެސް ޓެކްނިކަލް ޓީމުގެ މެމްބަރެއްގެ ގޮތުގައި މަސައްކަތްކޮށްފަ އެވެ. އަދި ލަންކާގެ ވޮލީބޯޅައިގެ ޑިވެލޮޕްމަންޓް މަސައްކަތްތަކުގައި އަބަދުވެސް ހަރަކާތްތެރި ފަރާތެކެވެ.
މި ފަހަރުގެ ރާއްޖޭގެ ވޮލީ ސީޒަނުގައި ސިޓީގެ ބެންޗުގައި، ސުމިތު ހުންނާނީ އެ ޓީމުގެ ކޯޗު ހުސެއިން ޝަރީފްގެ އެހީތެރިއަކަށެވެ. ކޯޗު ހުސެއިން ޝަރީފްގެ އެހީތެރިއަކަށް ސުމިތު ހުރުމަކީ އެ ޓީމުން މި ފަަހަރުގެ ސީޒަނުގައި ކާމިޔާބު ހޯދަން ކުރާ މަސައްކަތަށް ލިބޭނެ ހިތްވަރެކެވެ. ސިޓީ ޓީމުގައި ހިމެނޭ ފާހަގަކޮށްލެވޭ ކުޅުންތެރިއަކީ، ގައުމީ ޓީމުގެ ވައިސް ކެޕްޓަން، އަލީ ހުޒާމް (ހުޒަންޓެ) އެވެ.
